- यहोशू 7
7
आकान कौ पाप
1परन्त इस्राएलियन ने अरपन करी भई बस्त के बारे में बिस्वासघात करो; मतलब यहूदा गोत्र कौ आकान, जौन जेरहवंसी जब्दी कौ पोता और कर्मी कौ मोंड़ा हतो, ऊने अरपन करी बस्तों में सें कछु ले लओ, ई कारन यहोवा परमेसुर कौ गुस्सा इस्राएलियन पै भड़क उठो।
2यहोशू ने यरीहो सें ऐ नाओं नगर के लिगां, जौन बेतावेन सें लगो भओ बेतेल के पूरब कुदाऊं आय, कछु मान्सन हों जौ कहकें पठैव, “जाकें देस कौ भेद ल्याओ।” उन मान्सन ने जाकें ऐ कौ भेद लओ। 3उनोंरन ने यहोशू के लिगां लौटकें कई, “सबरे मान्सन उतै नें जाएं, कोऊ दो या तीन हजार मान्स जाकें ऐ हों जीत सकत आंय; सबरे मान्सन हों उतै जाबे कौ कस्ट नें दे, कायसे बे मान्सन थोड़ेई आंय।” 4ई लाने कोऊ तीन हजार मान्स उतै गए; परन्त ऐ के रैबेवारों के सामूं सें भग आए, 5तब ऐ के रैबेवारों ने उनमें सें कोऊ छत्तीस मान्स मार डाले, और अपने फाटक सें शबारीम लौ उनकौ पीछा करके ढलान में उनहों मारत गए। तब मान्सन कौ मन पिघलकें पानूं सो हो गओ।
6तब यहोशू और इस्राएलियन स्याने मान्सन ने अपने-अपने उन्ना फाड़े, और यहोवा परमेसुर के बक्सा कुदाऊं मों के बल गिरकें पृथ्वी पै संझा लौ पड़े रए; और उनोंरन ने अपनी अपनी मूंड़ पै धूरा डाली। 7यहोशू ने कई, “हाय, पिरभु यहोवा परमेसुर, तें अपनी ई परजा हों यरदन पार काए ल्याओ? का हमें एमोरियों के बस में करके नास करबे के लाने ल्याओ आय? भलो होतो कि हम संतोस करके यरदन के ऊ पार रै जाते! 8हाय, पिरभु मैं का कहों, जब इस्राएलियन ने अपने बैरियों हों पीठ दिखाई आय! 9कायसे कनानी बल्कि ई देस के सबरे रैबेवारे जौ सुनकें हम हों घेर लैहें, और हमाओ नाओं पृथ्वी पै सें मिटा डालहें; फिन तें अपने बड़े नाओं के लाने का करहै?”
10यहोवा परमेसुर ने यहोशू सें कई, “उठ, ठांड़े हो जा, तें काए ई तरहां मों के बल पृथ्वी पै पड़ो आय? 11इस्राएलियन ने पाप करो आय, और जौन बाचा मैंने उनसें अपने संगै बंधाई हती ऊहों उनोंरन ने तोड़ दओ आय, उनोंरन ने अरपन की बस्तों में सें लै लओ, बल्कि चोरी सोई करी और छल करके ऊहों अपने समान में रख लओ आय। 12ई कारन इस्राएली अपने बैरियन के सामूं ठांड़े नईं रै सकत; बे अपने बैरियन हों पीठ दिखात आंय, ई लाने कि बे खुद अरपन करी भई बस्तें बन गए आंय। जदि तुम अपने मजारें में सें अरपन की बस्त कौ सत्यानास नें कर डालहौ, तौ मैं आंगू हों तुमाए संगै नें रैहों। 13उठ, परजा के मान्सन हों पवित्तर कर, उनसें कह, ‘भुन्सारे लौ अपने अपने हों पवित्तर करें रओ; कायसे इस्राएल कौ यहोवा परमेसुर जौ कैत आय, “हे इस्राएल, तोरे मजारें अरपन करी बस्त आय; ई लाने जब लौ तें अरपन करी बस्त हों अपने मजारें सें काड़ नें दे तब लौ तें अपने बैरियन के सामूं ठांड़ो नें रै पाहै।” 14ई लाने भुन्सारे हों तुम गोत्र-गोत्र के अनसार लिगां ठांड़े करे जैहौ; और जौन गोत्र के लाने यहोवा परमेसुर कुदाऊं सें चिठिया कड़े, ऊ एक-एक कुल करके लिगां आए; और जौन कुल हों यहोवा परमेसुर पकड़े, ऊ घराना-घराना करके लिगां आए, फिन जौन घराने हों यहोवा परमेसुर पकड़े, ऊ एक-एक मान्स करके लिगां आए। 15तब जौन मान्स अरपन करी बस्त रखे भए पकड़ो जैहै, ऊ और जो कछु ऊकौ होए सब आगी में डालकें जला दओ जाए; कायसे ऊने यहोवा परमेसुर की बाचा हों तोड़ो आय, और इस्राएल में बुरओ काम करो आय’।”
16यहोशू भुन्सारे उठकें इस्राएलियन हों गोत्र-गोत्र करके लिगां लै गओ, और यहूदा कौ गोत्र पकड़ो गओ। 17तब ऊने यहूदा के परिवार हों लिगां करो, और जेरहवंसियों कौ कुल पकड़ो गओ; फिन जेरहवंसियों के घराने के एक-एक मान्स हों लिगां लाओ, और जब्दी पकड़ो गओ; 18तब ऊने ऊके घराने के एक-एक मान्स हों लिगां ठांड़ो करो, और यहूदा गोत्र कौ आकान पकड़ो गओ, जौन जेरहवंसी जब्दी कौ पोता और कर्मी कौ मोंड़ा हतो, 19तब यहोशू आकान सें कैन लगो, “हे मोरे मोंड़ा, इस्राएल के यहोवा परमेसुर कौ आदर कर, और ऊके आंगू मान जा; और जो कछु तेंने करो आय ऊ मोए हों बता दे, और मोए सें कछु नें छिपा।” 20आकान ने यहोशू हों उत्तर दओ, “सांचऊं मैंने इस्राएल के यहोवा परमेसुर के बिरोध में पाप करो आय, और ई तरहां मैंने करो आय, 21कि जब मोहों लूट में शिनार देस कौ एक नोंनो ओढ़ना, और दो सौ शेकेल चांदी, और पचास शेकेल सोने की एक ईंट देखी हती, तब मैंने उनकौ लालच करके उनहों रख लओ, बे मोरे डेरे के भीतर धरती में गड़े आंय, और सबके खालें चांदी आय।”
22तब यहोशू ने दूत पठैय, और बे ऊ डेरे में दौड़े गए; और का हेरो कि बे बस्तें ऊके डेरे में गड़ी आंय, और सब के तरें चांदी आय। 23उनहों उनोंरन ने डेरे में सें काड़कें यहोशू और सब इस्राएलियन के लिगां ल्याकें यहोवा परमेसुर के सामूं रख दओ। 24तब सबरे इस्राएलियन समेंत यहोशू जेरहवंसी आकान हों, और बा चांदी और ओढ़ने और सोने की ईंट हों, और ऊके मोंड़ा-मोंड़ियों हों, और ऊके बैलों, गधों और गाड़र-छिरियों हों, और ऊके डेरे हों, मतलब जो कछु ऊकौ हतो ऊ सबहों आकोर नाओं तराई में लै गओ। 25तब यहोशू ने ऊसें कई, “तेंने हमें काए परेसान करो आय? आज के दिना यहोवा परमेसुर तोहों कस्ट दैहै।” तब सब इस्राएलियन ने उनपै पथराव करो; और उनहों आगी में डालकें जलाओ, और उनके ऊपर पथरा डाल दए। 26उनोंरन ने ऊके ऊपर पथरों कौ बड़ो ढेर लगा दओ जौन आज लौ बनो आय; तब यहोवा परमेसुर की भड़की भई खुन्स सान्त हो गई। ई कारन ऊ जागां कौ नाओं आज लौ आकोर तराई पड़ो आय।
Valgt i Øjeblikket:
- यहोशू 7: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators