- यहोशू 2
2
यरीहो कौ भेद लओ जाबो
1तब नून के मोंड़ा यहोशू ने दो भेदियों हों शित्तीम सें चुपके सें पठै दओ, और उनसें कई, “जाकें ऊ देस और यरीहो हों हेरो।” तुरतईं बे चल दए, और राहाब नाओं बेस्या के घर जाकें सो गए। 2तब कोऊ ने यरीहो के राजा सें कई, “हेरो, आज रात कछु इस्राएली हमाए देस कौ भेद लैबे हों इतै आए भए आंय।” 3तब यरीहो के राजा ने राहाब के लिगां एैसो कहला पठैओ, “जौन मान्सन तोरे इतै आएहें उनहों बायरें ल्या; कायसे बे पूरे देस कौ भेद लैबे हों आए भए आंय।” 4ऊ बईयर ने दोई मान्सन हों छिपा रखो; और ई तरहां कई, “मोरे लिगां कई मान्स आए तौ हते, परन्त मैं नईं जानत कि बे कितै के हते; 5और जब अंधयारो भओ, और फाटक बन्द होन लगो, तब बे कड़ गए; मोए पता नईयां कि बे कितै गए; तुम फुरती करके उनकौ पीछा करौ तौ उनहों पकड़ पाहौ।” 6ऊने उनहों घर की छत पै चढ़ाकें सनई की लकड़ियों के तरें छिपा दओ हतो जो ऊने छत पै सजाकें रखी हतीं। 7बे मान्सन तौ यरदन की गैल पकड़कें उनकी खोज में घाट लौ चले गए; और जैसई उनहों खोजबेवारे फाटक सें कड़े बैसई फाटक बन्द करो गओ।
8जे लेट नें पाए हते कि बा बईयर छत पै इनके लिगां जाकें, 9इन मान्सन सें कैन लगी, “मोए तौ पक्को आय कि यहोवा परमेसुर ने तुमोंरन हों जौ देस दओ आय, और तुमाओ डर हमोंरन के मन में भर गओ आय, और ई देस के सबरे रैबेवारे तुमाए कारन घबरा रए आंय। 10कायसे हमने सुनो आय कि यहोवा परमेसुर ने तुमाए मिस्र सें कड़ती बेरां तुमाए सामूं लाल समंदर कौ पानूं सुखा दओ। और तुमोंरन ने सीहोन और ओग नाओं यरदन पार रैबेवारे एमोरियों के दोई राजाओं कौ सत्यानास कर दओ आय। 11जौ सुनतई हमाओ मन पिघल गओ, और तुमाए कारन कौनऊं के जी में जी नें रओ। कायसे तुमाओ यहोवा परमेसुर ऊपर के आकास कौ और नेंचें की पृथ्वी कौ यहोवा परमेसुर आय। 12अब मैंने जो तुम पै दया करी आय, ई लाने मोए सें यहोवा परमेसुर की कौल खाओ कि तुम भी मोरे बाप के घराने पै दया करहौ, और ईकी सच्ची चिनारी मोए देओ, 13कि तुम मोरे मताई-बाप, भईयों और बहनों हों, और जो कछु उनकौ आय उन सब हों भी जियत रख छोड़ो, और हम सब कौ प्रान मरबे सें बचाहौ।” 14तब उन मान्सन ने ऊसें कई, “जदि तें हमाई जा बात कौनऊं पै परगट नें करे, तौ तुमाए प्रान के बदले हमाओ प्रान जाए; और जब यहोवा परमेसुर हमें जौ देस दैहै, तब हम तोरे संगै किरपा और सच्चाई सें बरताव करहें।”
15तब राहाब जीकौ घर सहरपनाह पै बनो हतो, और बा उतईं रैत हती, ऊने उनहों जंगला सें गिरमा के बल उतारकें नगर के बायरें कर दओ। 16ऊने उनसें कई, “पहड़वा हों चले जाओ, एैसो नें होए कि खोजबेवारे तुम हों पाएं; ई लाने जब लौ तुमाए खोजबेवारे लौट नें आएं तब लौ, मतलब तीन दिना उतईं छिपे रईयो, ऊके बाद अपनी गैल लईयो।” 17उनोंरन ने ऊसें कई, “जौन कौल तेंने हम हों खिलाई आय ऊके बारे में हम तौ निरदोस रैहें, 18सुन, जब हमोंरें ई देस में आहें, तब जौन जंगला सें तेंने हम हों उतारो आय ऊमें जाई लाल रंग के सूत की डोरी बांध दईयो; और अपने मताई-बाप, भइयों, बल्कि अपने बाप के सबरे घराने हों ऐई घर में अपने लिगां इकट्ठो करके रखियो। 19तब जौन कोऊ तोरे घर के दोरे सें बायरें कड़े, ऊके खून कौ दोस ओई की मूंड़ पड़है, और हम निरदोस ठैरहें: परन्त जदि तोरे संगै घर में रैत भए कोऊ पै कोऊ कौ हाथ पड़े, तौ ऊके खून कौ दोस हमाई मूंड़ पै पड़है। 20फिन जदि तें हमाई जा बात कोऊ पै परगट करे, तौ जौन कौल तेंने हम हों खिलाई आय ऊसें हम स्वतंत्र ठैरहें।” 21ऊने कई, “तुमाए बचनों के अनसार होबै।” तब ऊने उनहों बिदा करो, और बे चले गए; और ऊने लाल रंग की डोरी हों जंगला में बांध दओ।
22बे जाकें पहड़वा पै पोंचे, और उतै खोजबेवारों के लौटबे लौ, मतलब तीन दिना लौ रए; और खोजबेवारे उनहों पूरी गैल में ढूंढ़त रए और कऊं नें पाओ। 23तब बे दोई मान्सन पहड़वा सें उतरे, और पार जाकें नून के मोंड़ा यहोशू के लिगां पोंचकें जो कछु उनपै बीतो हतो ऊकौ बखान करो। 24उनोंरन ने यहोशू सें कई, “पक्कौ यहोवा परमेसुर ने ऊ पूरो देस हमाए हाथ में कर दओ आय; फिन ईके अलावा ऊके सबरे रैबेवारे हमाए कारन घबरा रए आंय।”
Valgt i Øjeblikket:
- यहोशू 2: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators