- उत्पत्ति 49
49
मोंड़ों हों याकूब की आसीस
1फिन याकूब ने अपने मोंड़ों हों जौ कहकें बुलाओ, “इकट्ठे हो जाओ, मैं तुम हों बताहों कि अन्त के दिनन में तुम पै का-का बीतहै।
2हे याकूब के मोंड़ों, इकट्ठे होकें सुनो,
अपने बाप इस्राएल कुदाऊं कान लगाओ।
3हे रूबेन, तें मोरो जेठो,
मोरो बल और मोरे पौरुस कौ फल आय;
परतिस्ठा कौ नोंनो हींसा और सक्ति कौ भी नोंनो हींसा तेंई आय।
4तें जो पानूं के जैसो बे-लगाम आय,
ई लाने दूसरों सें अच्छो नें ठैरहै;
कायसे तें अपने बाप की खटिया पै चढ़ो,
तब तेंने ऊहों असुद्ध करो;
ऊ मोरे बिछौने पै चढ़ गओ।
5शिमोन और लेवी तौ भईया-भईया आंय,
उनकी तलवारें तौ उपद्रव के हथयार आंय।
6हे मोरे मन, उनकी सलाह नें मान, हे मोरी मईमा, उनकी सभा में नें मिल;
कायसे उनोंरन ने गुस्सा होकें मान्सन हों मार डालो,
और अपनी इच्छा पै चलकें बैलों हों लूलो कर दओ आय।
7धिक्कार उनके गुस्सा हों, जो प्रचण्ड हतो;
और उनके गुस्सा हों, जीमें दया नें हती;
मैं उनहों याकूब सें अलग-अलग और इस्राएल में इतै-उतै कर दैहों।
8हे यहूदा, तोरे भईया तोरी बड़वाई करहें,
तोरो हाथ तोरे बैरियन की घींच पै पड़है;
तोरे बाप के मोंड़ा तोहों दंडवत करहें।
9यहूदा नाहर कौ बच्चा आय।
हे मोरे मोंड़ा तें सिकार करके गुफा में गओ आय:
ऊ नाहर या सेरनी के जैसो दुबककें बैठ गओ;
फिन को ऊहों छोड़है।
10जब लौ शीलो#49:10 इब्रानी भाषा में मतलब दान या भेंट नें आए तब लौ नें तौ यहूदा सें राजदण्ड छूटहै,
नें ऊके बंस सें ब्यवस्था दैबेवारो अलग हुईये;
और राज्य-राज्य के मान्सन ऊके बस में हो जैहें।
11ऊ अपने जवान गधे हों दाख की बेल सें,
और अपनी गधईया के बच्चे हों ऊंची जाति की दाख की बेल सें बांधे करहै;
ऊने अपने उन्ना दाखमधु में,
और अपनो पहराबो दाख के रस में धोओ आय।
12ऊकी आंखें दाखमधु सें चमकीली,
और ऊके दांत दूध जैसे सुपेद हुईयें।
13जबूलून समंदर के तीर पै बास करहै,
ऊ जहाजों के लाने बन्दरगाह कौ काम दैहै,
और ऊकौ छोर सीदोन के लिगां पोंचहै।
14इस्साकार एक ताकतवारो गधा आय,
जो गाड़रों के बाड़ों के मजारें दुबको रैत आय।
15ऊने एक आराम की जागां हेरकें,
कि अच्छो आय, और एक देस, कि सुन्दर आय,
अपने कन्धे हों बोझा उठाबे के लाने झुकाओ,
और बेगारी में दास जैसो काम करन लगो।
16दान इस्राएल कौ एक गोत्र होकें अपने मान्सन कौ न्याय करहै।
17दान गैल में कौ एक सांप,
और गैल में कौ एक नाग हुईये,
जो घुड़वा के गोड़े हों डसत आय,
जीसें ऊकौ सवार पछाड़ खाकें गिर पड़त आय।
18हे यहोवा परमेसुर,
मैं तोरेई सें उद्धार पाबे की बाट-हेरत रओं आंव।
19गाद पै एक दल चढ़ाई तौ करहै;
परन्त ऊ ओई दल के पिछले हींसा पै छापा मारहै।
20आशेर सें जो अन्न पैदा हुईये ऊ अच्छो हुईये,
और ऊ राजा के जोग स्वादवारो भोजन दए करहै।
21नप्ताली एक छूटी भई हिरनी आय,
बा सुन्दर बातें बोलत आय।
22यूसुफ ताकतवारी बौल की एक डाल आय,
बा झिन्ना के लिगां लगी भई फलबेवारी बौल की एक डाल आय;
ऊकी डालियां भींत पै सें चढ़कें फैल जात आंय।
23धनुसधारियन ने ऊहों दुखी करो,
और ऊपै तीर चलाए, और ऊके पाछें पड़े आंय।
24परन्त ऊकौ धनुस मजबूत रओ,
और ऊकी बांह और हाथ याकूब के ओई सर्वसक्तिमान परमेसुर के हाथों के द्वारा फुर्तीले भए,
जीके लिगां सें ऊ चरवाहा आहै,
जो इस्राएल की चट्टान भी ठैरहै।
25जौ तोरे बाप के ऊ यहोवा परमेसुर कौ काम आय,
जो तोरी सहायता करहै,
ऊ सर्वसक्तिमान कौ जो तोहों ऊपर सें आकास में की आसीसें,
और खालें सें गहरे पानूं में की आसीसें,
और स्तनों और गरभ की आसीसें दैहै।
26तोरे बाप के आसीरवाद,
मोरे पुरखन के आसीरवाद सें बिलात बढ़ गए आंय और कभऊं नें मिटबेवारे पहड़वों की मनचाही बस्तों जैसे बने रैहें:
बे यूसुफ की मूंड़ पै, जो अपने भईयों सें न्यारो करो गओ हतो,
ऊकी मूंड़ के मुकुट पै फूलहें-फलहें।
27बिन्यामीन फाड़बेवारो भेड़िया आय,
भुन्सारे तौ ऊ सिकार खाहै,
और संझा हों लूट बांट लैहै।”
याकूब की मौत और गाड़ो जाबो
28इस्राएल के बारह गोत्र जेई आंय और उनके बाप ने जौन जौन बचन सें उनहों आसीरवाद दओ, बे जेई आंय; एक-एक हों ऊके जोग आसीरवाद के अनसार याकूब ने आसीरवाद दओ। 29तब ऊने जौ कहकें उनहों हुकम दओ, “मैं अपने पुरखन के संगै मिलबे पै आंव; ई लाने मोहों हित्ती एप्रोन की जमीनवारी गुफा में मोरे बाप-दादों के संगै माटी दईयो, 30मतलब ओई गुफा में जो कनान देस में मम्रे के सामूंवारी मकपेला की जमीन में आय; ऊ जमीन हों अब्राहम ने हित्ती एप्रोन के हाथ सें ऐई लाने खरीद लई हती कि बा कब्रिस्तान के लाने ऊकी निजी जमीन होए। 31उतै अब्राहम और ऊकी बईयर सारा हों माटी दई गई हती; और उतईं इसहाक और ऊकी बईयर रिबका हों भी माटी दई गई; और उतईं मैंने लिआ हों भी माटी दई। 32बा जमीन और ऊमें की गुफा हित्तियों के हाथ सें खरीद लई गई हती।” 33जौ हुकम जब याकूब अपने मोंड़ों हों दै चुको, तब अपने गोड़े हों खटिया पै रखकें प्रान छोड़ दए, और अपने पुरखन में जा मिलो।
Valgt i Øjeblikket:
- उत्पत्ति 49: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators