- उत्पत्ति 23
23
सारा की मौत और मिट्टी दैबे कौ बर्णन
1सारा एक सौ सत्ताईस साल की उमर लौ पोंची; और जब सारा की इतेक उमर भई, 2तब बा किर्यत-अर्बा में मर गई। जो कनान देस में आय, और हेब्रोन भी कहात आय। ई लाने अब्राहम सारा के लाने रोबे पीटबे हों तम्बू में गओ। 3तब अब्राहम सारा के लिगां सें उठकें गओ और हित्तियों सें कई, 4“मैं तुमाए मजारें पाहुन और परदेसी आंव; मोहों अपने मजारें कब्रिस्तान के लाने एैसी जमीन मोल दै देओ जो मोरी निज की हो जाए, कि मैं अपने मुरदे हों गाड़कें अपनी आंख की ओट में करों।” 5हित्तियों ने अब्राहम सें कई, 6“हे हमाए पिरभु, हमाई सुन; तें तौ हमाए मजारें बड़ो परधान आय। हमाई कबरों में सें जीहों तें चाए ऊमें अपने मुरदा गाड़; हम में सें कोऊ तोहों अपनी कबर के लैबे सें नें रोकहै, कि तें अपने मुरदे हों ऊमें नें गाड़ पाए।” 7तब अब्राहम उठकें ठांड़ो भओ और हित्तियों के सामूं, जो ऊ देस के रैबेवारे हते, दंडवत करके कैन लगो, 8“जदि तुमाई जा इच्छा होए कि मैं अपने मुरदा हों गाड़कें अपनी आंख की ओट में करों, तौ मोरी बिन्तवाई आय कि सोहर के मोंड़ा एप्रोन सें मोरे लाने बिनती करो, 9कि ऊ अपनी मकपेलावारी गुफा, जो ऊकी जमीन की हद्द पै आय, ऊकौ पूरो दाम लैकें मोहों मोल दै दे, कि बा तुमाए मजारें कब्रिस्तान के लाने मोरी निजी जमीन हो जाए।” 10एप्रोन तौ हित्तियों के मजारें उतै बैठो भओ हतो, ई लाने जितेक हित्ती ऊके नगर के फाटक सें होकें भीतर जात हते, उन सबई के सामूं ऊने अब्राहम हों जवाब दओ, 11“हे मोरे पिरभु, एैसो नईंया, मोरी सुन; बा जमीन मैं तोहों देत आंव, और ऊमें जो गुफा आय, बा भी मैं तोहों देत आंव; अपने जात भईयों के सामूं मैं ऊहों तोए हों दए देत आंव; सो अपने मुरदा हों कबर में रख।” 12तब अब्राहम ने ऊ देस के रैबेवारों के सामूं दंडवत करो, 13और उनके सुनत भए एप्रोन सें कई, “जदि तें एैसो चाए, तौ मोरी सुन: बा जमीन की जो कीमत होए, बा मैं दैबो चाहत आंव; ऊहों मोए सें लै ले, तब मैं अपने मुरदा हों उतै गाड़हों।” 14एप्रोन ने अब्राहम हों जौ जवाब दओ, 15“हे मोरे पिरभु, मोरी बात सुन; बा जमीन की कीमत तौ चार सौ शेकेल (लगभग साढ़े चार किलो) चांदी आय; परन्त तोरे और मोरे मजारें जौ का आय? अपने मुरदा हों कबर में रख।” 16अब्राहम ने एप्रोन की मानकें ऊहों उतेक चांदी तौल दई, जितेक ऊने हित्तियों के सुनत भए कई हती, मतलब चार सौ एैसे शेकेल जो ब्योपारियों में ऊ बेरां चलत हते।
17ई तरहां एप्रोन की जमीन, जो पूरवी मम्रे के सामूं मकपेला में हती, बा गुफा समेंत और ऊपै लगे पेड़ों समेंत भी जो ऊमें और ऊकी चौहद्दी पै हते, 18जितेक हित्ती ऊके नगर के फाटक सें होकें भीतर जात हते, उन सबई के सामूं अब्राहम के अधकार में पक्के तरीका सें आ गई। 19ईके बाद अब्राहम ने अपनी बईयर सारा हों ऊ मकपेलावारी जमीन की गुफा में, जो पूरवी मम्रे के मतलब हेब्रोन के सामूं कनान देस में आय, माटी दई। 20ई तरहां बा जमीन गुफा समेंत जो ऊमें हती, हित्तियों की कोद सें कब्रिस्तान के लाने अब्राहम के अधकार में पक्के तरीका सें आ गई।
Valgt i Øjeblikket:
- उत्पत्ति 23: BHB
Markering
Kopiér
Sammenlign
Del
Vil du have dine markeringer gemt på tværs af alle dine enheder? Tilmeld dig eller log ind
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators