UGenesisi 3
3
Ukuwa Komuntu
1Inyoka yayiliqili ukwedlula zonke izinyamazana zeganga uThixo uNkulunkulu ayezenzile. Yathi kowesifazane, “Kambe uNkulunkulu watsho ngeqiniso ukuthi, ‘Lingadli noma yisiphi isihlahla esivandeni’?”
2Owesifazane wathi enyokeni, “Singadla izithelo zezihlahla esivandeni, 3kodwa uNkulunkulu wathi, ‘Lingazidli izithelo zesihlahla esiphakathi laphakathi kwesivande, njalo lingasithinti, hlezi life.’ ”
4Inyoka yathi kowesifazane, “Kalisoze life ngempela. 5Ngoba uNkulunkulu uyazi ukuthi lingasidla amehlo enu azavuleka, beselisiba njengoNkulunkulu, lazi okuhle lokubi.”
6Kwathi owesifazane ngokubona ukuthi izithelo zesihlahla leso zaziyikudla okuhle njalo zibukeka emehlweni, njalo kudingeka ukuzuza ukuhlakanipha, wakha ezinye wadla. Wapha njalo ezinye indoda yakhe ayelayo khonapho, layo yadla. 7Amehlo abo bobabili asevuleka, basebenanzelela ukuthi babenqunu; yikho basebethungela ndawonye amahlamvu omkhiwa bazenzela izembatho ngawo.
8Indoda lomkayo basebesizwa umsindo kaThixo uNkulunkulu ehamba esivandeni ilanga selithambeme, basebemcatshela uThixo uNkulunkulu phakathi kwezihlahla zesivande. 9Kodwa uThixo uNkulunkulu wayimemeza indoda wathi, “Ungaphi?”
10Yaphendula yathi, “Ngikuzwile esivandeni, ngesaba ngoba benginqunu; yikho ngasengicatsha.”
11Wasesithi, “Ngubani okutshelileyo ukuthi unqunu? Usudlile yini isihlahla engalilaya ukuthi lingasidli?”
12Indoda yathi, “Umfazi owangipha yena, ungiphile ezinye izithelo zesihlahla ngazidla.”
13Ngakho uThixo uNkulunkulu wathi kowesifazane, “Kuyini lokhu osukwenzile na?”
Owesifazane wathi, “Inyoka ingikhohlisile, ngadla.”
14Ngakho uThixo uNkulunkulu wasesithi enyokeni, “Ngoba usukwenzile lokhu,
Uqalekisiwe ngaphezu kwezifuyo zonke
kanye lezinyamazana zonke zeganga!
Uzahuba phansi ngesisu sakho
njalo uzakudla uthuli
zonke insuku zokuphila kwakho.
15Njalo ngizafaka ubutha
phakathi kwakho lowesifazane,
laphakathi kwenzalo yakho leyowesifazane;
uzacobodisa ikhanda lakho,
njalo wena uzagamula isithende sakhe.”
16Kowesifazane wathi,
“Ngizakwandisa ngokuphindiweyo inhlungu zakho nxa ubeletha;
ngobuhlungu uzazala abantwana.
Inkanuko yakho izakuba sendodeni yakho,
njalo yona izabusa phezu kwakho.”
17Ku-Adamu wathi, “Ngoba ulalele umkakho wadla isihlahla engakulaya ngathi, ‘Ungasidli,’
Uqalekisiwe umhlabathi ngenxa yakho;
ngokusebenza nzima uzakudla okuphuma kuwo
zonke insuku zokuphila kwakho.
18Uzamila ameva lezihlahlakazana zameva azahlaba wena,
njalo uzakudla izihlahla zeganga.
19Ngezithukuthuku zebunzi lakho
uzakudla ukudla kwakho
uze ubuyele emhlabathini,
njengoba wathathwa kuwo;
ngoba uluthuli
njalo uzabuyela othulini.”
20U-Adamu wamutha umkakhe wathi ngu-Eva, ngoba wayezakuba ngunina wabo bonke abaphilayo.
21 UThixo uNkulunkulu wenza imvunulo yesikhumba, wenzela u-Adamu lomkakhe, wabagqokisa. 22Njalo uThixo uNkulunkulu wathi, “Umuntu manje usenjengomunye wethu, usekwazi okuhle lokubi. Kangavunyelwa ukuthi elule isandla sakhe akhe njalo isihlahla sokuphila adle, aphile laphakade.” 23Ngakho uThixo uNkulunkulu wamxotsha eSivandeni se-Edeni ukuthi asebenze umhlabathi ayethethwe kuwo. 24Esemxotshile umuntu wamisa ngempumalanga kweSivande se-Edeni amakherubhi lenkemba ebhebhayo, iphazima isiyale lale ukulinda indlela eya esihlahleni sokuphila.
Valgt i Øjeblikket:
UGenesisi 3: BEN
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
IBhayibhili Elingcwele LesiNdebele™ BEN™
© 2003, 2006, 2022 Biblica, Inc.
Lisetshenziswe ngokusemthethweni. Wonke amalungelo agodliwe emhlabeni jikelele.
Ndebele Contemporary Bible™ BEN™
Copyright © 2003, 2006, 2022 by Biblica, Inc.
Used with permission. All rights reserved worldwide.