Tí quitire Saulo to tʉhochʉta, Cohamacʉ Catia Macariro Espíritu Santo sehe to cahapʉ dija wihi mʉa wahaha. Ã dija wihirota, tirore sua yʉhdʉ mʉa wahachʉ yoaha. To ã suari pjaihta Saulo sehe to wachʉa pʉarore cjero mehne wajãha. Wajã tuhsʉrota, payʉ siri dʉte siteha. Dʉte site tuhsʉ, tí dihire cãina tiro mehne macainare wiaha. Ã wiaro, to coyea jia macari, jipihtia macaripʉ õ sehe ni yahu site tini dutiha tiro tinare:
—“Yʉhʉ Saulo mari coyea Jabe macaina pʉhtoa ti yahurocaa quitire tʉhoja. Ã tʉhoi, mipʉre Samue mehne waha, tópʉ tina amonita masa surara mehne cahma wajãi wahai tai nija. Ã jina mʉsa cʉ̃hʉ ne cʉ̃iro dʉhsaro marieno sãre cahma wajãdohona taga. Noa yʉhʉre cahma wajãdohoa ta duaeraina ñʉga ahri dihi yʉ dʉte sitea dihire. Noa yʉhʉre cahma wajãdohoa ta duaeraina ti wachʉa cʉ̃hʉre õ seheta yoaihtja yʉhʉ” nirocahre mari pʉhtoro Saulo mʉsare —ni yahu site tini dutiha Saulo tinare.
à yoa tí quitire yahu site tini duti to wa siterocarina sehe to dutiro seheta yahu site tinia wahaha jʉna. Ti ã yahu tinichʉ tʉhoa, israe masa sehe tʉho cʉa yʉhdʉa wahaha. à tʉho cʉaa, õ sehe niha tina:
—Mari pʉhtoro Saulore Yawe jiri jira ã ñaca waro suachʉ yoaro. Ã suachʉ yoaro, Yawe tiro Saulo mehne mari coyeare yʉhdʉ witichʉ yoaro taro niri jira. Ã jina mari cʉ̃hʉ tirore cahma wajãdohona wahajihna —niha tina.
à nia, ne cʉ̃iro dʉhsaro marieno Saulo cʉ̃hʉre cahma wajãdohoa wahaha.