Varoma 15
15
O fumadeke vakweni, kapisi nyamoge
1Ano ose ko ava tuna koro mepuro, atu kwafeni varupiranonkondo momaudigu gawo, kapisi tu lipakere mbili nyamwetu nyoselike. 2Nkenye ogu a pakere mbili mukwawo mokumuruganena uwa asi a kure mepuro. 3Yeeyi naKristusa si kapi ga lipakerere mwene mbili, nye moomu va mu tjanga asi: “Maswauro gava ngava ku swaura, kwange nye gana kara.” 4Nkenye eyi va tjangera momatjangwa, kwa yi tjangera asi yi tu ronge. Kwa yi tjangera asi tu kare nehuguvaro eli ali tundu medidimiko nehengagwido. 5Karunga gedidimiko nogu gehengagwido ngano ta mu pe malizuvho mokatji keni moomu ga yi harera Jesus Kristusa, 6asi namuvenye kumwe‐kumwe omu fumadeke Karunga, GuhyaHompa gwetu Jesus Kristusa. 7Litambura?-?tambureni nye, moomu ga mu tambura Kristusa, makura Karunga a fumanene po. 8Yeeyi ame tani mu tantere asi, Kristusa ga kara mukareli goVajuda o horore unasili waKarunga, age hena a koreke matumbwidiro aga va gavere kozinyakurwawo. 9Kwa yi ninka asi novapagani nawo ngava fumadekere po Karunga morwaufenkenda weni, moomu va tjanga asi:
“Yiyo nye ngani ku fumadekera mokatji kovapagani
oku tani dimbire edina lyoge epando.”
10Kwa tjanga hena asi:
“One vapagani, hafeni kumwe nomuhoko gwaKarunga.”
Hena asi:
11“One vapagani namuvenye, pandeni Hompa,
nomuhoko nadinye di mu fumadeke.”
12Jesaya kwa tanta hena asi:
“Gemezimo lyaIsayi nga wiza,
age ngava mu tumba nga pangere vapagani
nomuhoko nadinye ngadi mu huguvara.”
13Karunga ogu a mu pe ehuguvaro, ngano a mu zwide ehafo mudima nombili mepuro lyeni. Nonkondo doMpepo zoKupongoka di sikilise mo ehuguvaro lyeni.
Etumo lyaPaurusa
14Vakwetu, name nina yi mono nawa‐nawa asi, one kurugana yoyiwa, one hena kwa zura ediwo, mu vhure kulikorangeda‐korangeda. 15Ame kuna mu tjangere nouradi kombinga zimwe, ni mu diworokese yininke yimwe. Ame kwa yi ninka morwankenda ezi ga pa nge Karunga, 16ni kare mukereli gwaJesus Kristusa ogu ani rugana movapagani. Ame kwa kara moyirugana youpristeli woMbudi zoNgwa zaKarunga, asi vapagani ngava kare nzambo ezi a tambura Karunga, ezi za pongora Mpepo zoKupongoka. 17Ame na kara nokonda zokulikangangera mwaJesus Kristusa, moyirugana yange eyi ya hamena kwaKarunga. 18Yeeyi ame kapi na hara ni uyunge nayopeke, ya hana asi yeyi ga ruganesa nge Kristusa yokulimburukwisa vapagani kwaKarunga kononkango dange nokoyirugana yange. 19Karunga kwa ruganesa nge yidiviso noyitetu nononkondo doMpepo zoKupongoka. Ame makura yiyo na sikisa mo eudiso lyoMbudi zoNgwa zaKristusa kutunda moJerusarema nopoyiha yendi dogoro nokoIlilikumu. 20Efumano lyange nkenye apa lyeli lyokuudisa Mbudi zoNgwa pomavega aga va dira kuzuvha rumwe edina lyaKristusa, ni dire kutungira petateko eli ga tateka mukwetu gwapeke. 21Moomu ga tanta matjangwa asi:
“Ava va dira kumuvasansekera,
ngava mona;
ano ava va dira kumuzuvha,
ngava yi kwata egano.”
Efaneko lyorugendo rwaPaurusa rokoRoma
22Eyi yiyo nye ngayi dumwike nge rorunzi kuwiza kweni. 23Nye moomu na mana yirugana yange moyirongo eyi, neyi na kara nomvhura dononzi dorutjima rokuyamudingura ko, 24ngani ya mu pita apa ngani za koSipaniya. Na huguvara asi ngatu ya limoneni pokuyapita, one hena ngomu ya rongerere nge mokuza kwange oku na tumbura. Nye muhowo tanko ngaru pwe nge rutjima roku kweni ntani. 25Nye ntaantani koJerusarema na vyuka, ni tware ekwafo lyoyilikwafeso kovapongoki vako. 26Yeeyi nombungakriste domoMakedoniya nomoGereka kwa tokora di gave yigava kovapongoki wovahepwe womoJerusarema. 27Vene va yi tokwere, yeeyi nawo va kara nonzo zokuvakwafa. Yeeyi nsene asi vapagani nawo va gwana ko koyigava yopampepo eyi va gwana Vajuda, makura nawo yipo nye va karera nonzo zokukwafa Vajuda neyi yoparutu. 28Nsene ngani mana kukasikisa ko yigava eyi, ntani ngani ya mu pita pokuza koSipaniya. 29Ame na yi diva asi, nsene ngani wiza kweni, ngani wiza nomaswero gokusikilira mo gomwaKristusa.
30Vakwetu, tani mu likwamberere mwaHompa gwetu Jesus Kristusa nemeharo eli azi gava Mpepo, mu kondje kumwe name mokukandererera nge kwaKarunga. 31Kandererereni nge asi ni yoworoke mo mwava va hana epuro womoJudeya, noyigava eyi nina kutwara koJerusarema asi vapongoki va ka yi tambure mawoko gavali. 32Nsene asi yilyo eharo lyaKarunga, makura ngani wiza kweni nehafo, ni ya peperere kumwe neni. 33Karunga gombili a kare neni namuvenye. Amen.
© Egwanekerobibeli Lyanamibia 1987, 2003
© Bible Society of Namibia 1987, 2003