ESITERI 5
5
Esiteri Yagenihizaa Mwami harara na Hamani mu Lilia Linene
1Ku lidiku lia kavaga kohonga iliilia lilie, Esiteri yiviika ziganza zizie ziu vwami, ma nazia kusingira mu mugizi gwu mugati gwi inyumba yu vwami, nahenza keng'oze che endeve yu vwami. Umwami yaali ni yikaye kondeve yeeye yu vwami munyumba yu vwami, nahenzi uvwingiliru vwinyumba zana. 2Lwa yalora mwami wikikali Esiteri nasingiyi ichova muloze lwu mugati, Esiteri yaavugilirwa, kandi umwami yamugingira imbimbu yeeye yi izahabu igulu. Maku yisunda imbiri nadiira esonga yayo. 3Nu umwami yamuteeva, “Esiteri, ni kindu ki cha wenyaa? Mbolera cha wenyaa, na ulaheevwa, kali niiva ni nusu yu vwami vwange.”
4Esiteri yativura, “Niiva galayanziza ivi, mwami, ndakayanzi ivi umwami harara na Hamani muve avageni vange uvudiku vwa lero mu lilia linene munyumba yange, lia ngolombelaa.”
5Maku mwami yalanga Hamani yaaze vwangu, vaduuki kuva avageni va Esiteri. Umwami harara na Hamani vazia mu lilia lia hamugorova lia Esiteri yaali naalombi. 6Lwa vaali nivanweza iwaini, mwami yateeva Esiteri ativuli agaali nigaveeye mu mwoyo gwigwe. Mwami yavoola, “Mbolera icha wenyaa, na ulakenyoola. Ndakuha choteeva, kali niiva ni nusu yu vwami.”
7Navuzwa Esiteri yavoola, “Ilienya niliteeva liange ni yili: 8Niiva amali kumbugilira, kandi gakuyaanziza ivi umwami kutwekiza ilienya liange, ndakayanzi ivi mwami na Hamani muve avageni vange mu lilia linene lia nanombe mugamba hamugorova. Ulwene yilwo nilwo lwa nangovolere nyenya.”
Hamani Yalohiza machiriri kwiita Modekai
9Lwa Hamani yatura mu lilia linene yili, yaali nu vuyanzi kandi nu mwoyo mulahi. Navuzwa lwa yalora Modekai ha kirivwa chinyumba yu vwami, na lwa Modekai yavula kusingira anoho kumanyia uluyali kali hakuzu lwa yaali navitaa, Hamani yavihilirwa ligali. 10Navuzwa yikuzira ma nazia yengo. Maku yagenihiza avalina veve munyumba yeeye, kandi nalanga mukali weve Zereshi kuva mulala ku vageni. 11Yevoola imbiri wavo kuli aveeye nu vutugi vunyingi kandi kuli aveeye na vayaayi avanyingi, kali kuli umwami yamuginga higulu mu vwamihi nu kumunenehiza ku vanene na vatumikiri vandi vosi. 12Hamani yaazizagilira kovora, “Esiteri mukali wu mwami, si yangenihiza musaza wundi kwingira harara nu mwami mu lilia lia yaali nalombi mba, nitali inzi nzieng'ine. Kandi yangenihizi kuzia harara nu mwami mugamba. 13Navuzwa yaga goosi sigaveeye ni kivuni ku inzi lwa Modekai Muyuda achiikaye ha kirivwa chinyumba yu vwami mba.”
14Kunangwa mukali weve na valina veve vosi vamuha zing'anagani, nivavoora, “Kigira ki mwinuya gwu kusunga ku avandu gutuumbakwa ahimbi uvutambi izimita 22 kuzia igulu? Mugamba oteeve umwami asungi Modekai ku mwinuya gwene yigwo. Na lwanyima ivi uzie mu lilia linene noveeye nu vusangali vonene harara nu mwami.” Yaga goosi gayaanziza Hamani; nu umwinuya gwu kusunga ku avandu gwumbakwa.
©Bible Society of Kenya, 2019