လံာ်တၢ်ကူၣ်သ့အတၢ်ကတိၤ 9
9
တၢ်ကူၣ်သ့ဒီးတၢ်သူၣ်တထံသးတဆး
1တၢ်ကူၣ်သ့သူၣ်ထီၣ်အဟံၣ်လံဒီးမၤဝဲအထူၣ်နွံထူၣ်လၢအဂီၢ်လီၤ. 2မၤသံတ့ၢ်ဆၣ်ဖိကီၢ်ဖိတဒုလၢမူးတမူးအဂီၢ်, မၤဃါဃုာ်တၢ်နၢမူလၢစပံးထံအပူၤဒီးကတဲာ်ကတီၤအစီၢ်နီၤ ခိၣ်လံ. 3မၢလီၤဝဲအကုၢ်ပိာ်မုၣ်တဖၣ်လၢကလဲၤကိးထီၣ်ဝဲလၢဝ့ၢ်အလီၢ်ထီ ကတၢၢ်အဖီခိၣ်, 4“ပှၤလၢအတသ့လံာ်သ့လဲၢ်သ့ၣ်ဧၢ, ဟဲနုာ်တက့ၢ်.” ဒီးစံးဘၣ်ပှၤဟးဂီၤဖိတဖၣ်, 5“ဟဲ, အီၣ်ယတၢ်အီၣ်, ဒီးအီစပံးထံလၢယဃါဃုာ်တ့ၢ်အီၤတက့ၢ်. 6ပာ်တ့ၢ်ကွံာ်ပှၤလၢအတသ့လံာ်သ့လဲာ်အတၢ်အိၣ်ဖှိၣ်ဒီးမူနဲ တက့ၢ်. ပိာ်ထွဲတၢ်သ့ၣ်ညါနၢ်ပၢၢ်အကျဲတက့ၢ်.”
7နမ့ၢ်သိၣ်က့ၤသီက့ၤပှၤလၢအပာ်ထီၣ်ထီအသးတဂၤဒီး, နကဘၣ်တၢ်ဒုၣ်ဒွဲၣ်နၤလီၤ. နမ့ၢ်သိၣ်ဃီၣ်ပှၤအအၢအသီတဂၤဒီး, အိၣ်ဒၣ်နကဘၣ်ဒိဆါလီၤ. 8သိၣ်က့ၤသီက့ၤပှၤပာ်ထီၣ်ထီအသးတဂၤနီတစုတဂ့ၤ. ကသးဟ့နၤလၢတၢ်န့ၣ်အဃိလီၤ. မ့မ့ၢ်သိၣ်က့ၤသီက့ၤပှၤလၢအအိၣ်ဒီးတၢ်ကူၣ်သ့တဂၤတက့ၢ်. ဒီးအဝဲကပာ်ကဲနၤလီၤ. 9တၢ်တမံၤဂ့ၤတမံၤဂ့ၤလၢနစံးဘၣ်တဲဘၣ်ပှၤကူၣ်သ့တဂၤန့ၣ်, ကဒုးကူၣ်သ့အါထီၣ်အီၤလီၤ. တၢ်တမံၤဂ့ၤတမံၤဂ့ၤလၢနတဲဘၣ် ပှၤတီပှၤလိၤတဂၤန့ၣ်, ကပာ်ဖှိၣ်အါထီၣ်အတၢ်သ့ၣ်ညါနၢ်ပၢၢ်န့ၣ်လီၤ.
10ဒ်သိးနကအိၣ်ဒီးတၢ်ကူၣ်သ့ဒီး, နကဘၣ်ယူးယီၣ်ဆိယွၤန့ၣ်လီၤ. နမ့ၢ်သ့ၣ်ညါတၢ်စီဆှံတဂၤဒီး, နအိၣ်ဒီးတၢ်သ့ၣ်ညါနၢ်ပၢၢ်လီၤ. 11တၢ်ကူၣ်သ့ကဂံၢ်အါထီၣ်နတၢ်အိၣ်မူအနံၣ်အလါလီၤ.
12နမ့ၢ်အိၣ်ဒီးတၢ်ကူၣ်သ့ဒီး, နကမ့ၢ်ပှၤတဂၤလၢအဘၣ်ဘျုးလၢအီၤ လီၤ. နမ့ၢ်ညိကွံာ်အီၤဒီး, နကမ့ၢ်ပှၤလၢအတူၢ်ဘၣ်တၢ်လီၤ.
13တၢ်သူၣ်တထံသးတဆးန့ၣ်လီၤဂာ်ဒ်ပိာ်မုၣ်တဂၤလၢအသီၣ်သဲ, အတသ့လံာ်သ့လဲၢ်ဒီးအမဲာ်တဆှးဘၣ်အသိးလီၤ. 14ဆ့ၣ်နီၤဝဲလၢအဟံၣ်အတြဲၤအခီၣ်ထံးမ့တမ့ၢ်လၢတၢ်လီၢ်တပူၤ အိၣ်ဝဲလၢဝ့ၢ်အတၢ်လီၢ်အထီကတၢၢ်န့ၣ်လီၤ. 15ဒီးကိးထီၣ်ဝဲဆူပှၤတဖၣ်လၢအလဲၤတြူာ်အီၤ, ဒီးပှၤလၢအပာ်သူၣ်ပာ်သးဒၣ်အတၢ်ဖံးတၢ်မၤဒၣ်ဝဲအဂ့ၢ်, 16“ပှၤလၢအတသ့လံာ်သ့လဲၢ်သ့ၣ်ဧၢ, ဟဲနုာ်တက့ၢ်.” ဒီးဆူပှၤလၢအသးတဆးတဂၤန့ၣ်စံးဘၣ်ဝဲ, 17“ထံလၢပဟုၣ်အီအီၤန့ၣ်, ဆၢဒိၣ်မးလီၤ. ကိၣ်လၢပဟုၣ်အီၣ်အီၤ န့ၣ်, ဝံၣ်ဒိၣ်တက့ၢ်လီၤ.” 18ပှၤလၢအဝဲမၤန့ၢ်ဝဲတဖၣ်န့ၣ်, တသ့ၣ်ညါဝဲလၢပှၤလဲၤနုာ်လီၤဆူ အဟံၣ်ပူၤတဖၣ်သံဝဲ, ဒီးလၢပှၤလၢအလဲၤနုာ်လီၤတ့ၢ်လံတဖၣ်န့ၣ် အခဲအံၤလီၤဘျၢလၢဟီၣ်ခိၣ်တၢ်သံအကီၢ်ပူၤလံန့ၣ်ဘၣ်လီၤ.
Právě zvoleno:
လံာ်တၢ်ကူၣ်သ့အတၢ်ကတိၤ 9: KSWC
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Sgaw Karen Common Bible © Bible Society of Myanmar, 1992.