Engaado 7
7
1Mwaana waange, diiraanga emboosi chaange
haandi otebiriraanga ohuliinda ebilagiro bi huberesa.
2Niwooseresa ebilagiro byaange, ao ochia ohuyiindira,
liindaanga ebiindu bi hulagira, koti lu wahaliinda emoni yao.
3Byeboyeenge hu muhono kwao,
haandi obyandiikeenge mu mwooyo kwao mukati bweene.
4Boolera makesi oti, “Niiwe mboocho yaange,”
haandi laangaanga ohumanya oti omwiicha wao mweene.
5Bichia ohuhuliinda bihuwonie omuhasi mucheke,
haandi bihuwonie omuhasi ohusendaseenda neende emboosi chinyunyuula.
Omuhasi mucheke
6Olwoola, ndalingaalira mu dirisa,
edirisa lyohu nyuumba yaange.
7Ndabona mu basaacha babula obumanyirifu,
ndabona mu baraaga,
mulala obulamo amakesi.
8Yali nang'alalaanga hu ngira n'abita hu koona aambi neende enyuumba yae,
n'adiirire engira yichia ena nyuumba w'omuhasi wuundi.
9Byali ebiha by'engoloobe,
esiirima nisimalire ohudiira.
10Mani bone, omuhasi yabukaanana nae,
niyefwaalire koti malaya, naali neende omwooyo mweetekefu.
11Yalomalomaanga n'ahuumula haandi n'abula esoni,
buli ludaalo n'akeendaanga, ataali ohwiihala mu ngo wae.
12Ebiha biindi yeyemeeresaanga hu ngira, haandi ebiindi niyeyemeeresa mu siito,
haandi yeyalisaanga hu buli koona n'aliindiriire.
13Mani omuhasi oyo n'adiira omuraaga n'amukwa mu sirifu,
n'amutingaala tiiri mu moni, n'amuboolera ati,
14“Nyaanireyo olwaleero ebiyaanwa by'ohusaasania,
haandi malire ohwooseresa obweyamo bwaange;
15bulaanu sakira njichire ohuhubukaanira.
Ohuteemaho ohuhukoonya, mani ndahunyoola.
16Malire ohwaala obuliri bwaange neende amasuuka,
k'eraangi ndai akatula Misiri.
17Mu buliri bwaange, ndeeremo eby'esing'aari, neende miira,
aloe, neende sinamooni.
18Hola bwaangu, leha hukonane esiro syoosi ohwoola echuli;
leha abeene hwesangaasire mu budya.
19Olwohuba wamwaange haba saali engo;
achiire hu lukeendo lw'eyale, ali eyale.
20Achiire neende eseende enyiingi muno;
achia ohumalayo ejuma chibiri, amale akobole.”
21Omuhasi oyo n'amuserera neende emboosi chae ndai mani n'afukiirira;
mani omuraaga oyo n'afukiirira hulw'emboosi chinyunyuula echo omuhasi oyo.
22Mani amaangu ako, ni omuraaga oyo amuloondaho,
koti endaawu yicha ohusiinjwa,
oba koti esolo yichia ohudiiswa mu muteego
23ohwoola lu hasaale hahayifumite yaafwa.
Omuraaga oyo yali koti eyoni lyaanguya ohukwa mu luhaanda;
yali nataamanyire ati ali ohufwa, ati obulamu bwae buli ohuwaao.
24Mani bulaanu, eng'we baana baange, wulire bi mboola,
haandi tekeerese emboosi chi nomanoma.
25Mutafukiiriraanga amakesi k'omuhasi koti oyo kayira emyooyo kyeeng'we,
mutaloondakanaanga neende engeri chae;
26olwohuba yasihirisa abasaacha baangi muno;
eee, bayafumita baafwa haba simunyala mwababala mwabamala.
27Ohuchia mu nyuumba yae niyo engira yiihirira emakoombe,
niyo eyibasudya aambi neende ohufwa.
©Bible Society of Kenya, 2019
©Bible Society of Uganda, 2019