Kalinlinima 16
16
Kɔra mini Datan ni Abiram taai duŋ
1Ka Kɔra ŋun daa nyɛ Izar bia ka nyɛ Kɔhat ŋun daa nyɛ Lɛvi zuliya nir’ yaaŋa la mini Ɛliab bihi Datan mini Abiram ni Pɛlɛt bia On 2bɛn daa yi Rubin zuliya ni na la daa ti zaŋ niriba mini Izraɛl ninvuɣ’ zuɣuri kɔbisiyi ni pihinu m-pa bɛmaŋ’ zuɣu chaŋ ti va n-zani Musa tooni. Niriba maa daa nyɛla bɛ ni pii shɛba, ka bɛ nyɛ niriba ni mi shɛb’ yɛla viɛnyɛliŋga. 3Ka bɛ daa laɣim taai duŋ niŋ Musa mini Aduna. Bɛ daa yɛli ba mi, “Yi va n-ʒi pam. Dama niriba ŋɔ zaa yinoyino nyɛla bɛn be kasi, ka Yawɛ be bɛ sani. Ka bɔzuɣu ka yi ti duhi yimaŋ’ Yawɛ niriba sani lala?”
4Musa ni daa wum li, o daa teemi dɔni n-zaŋ o nina kpa tiŋa, 5ka yɛli Kɔra min’ o nyaandoliba maa, “Biɛɣuni asiba Yawɛ sa ni wuh’ o ni pii so ni ŋun be kasi ni o ni yɛn chɛ ka so ka o sanna. O ni pii so, o ni chɛ ka dilan’ ka o sanna. 6Kɔra, a min’ a nyaandoliba maa zaa ni yɛn niŋ shɛm m-bɔŋɔ: 7Sa zaŋm’ labihi m-mooi buɣim niŋ di ni, ka niŋ tulaale zim pa di zuɣu n-zani Yawɛ tooni biɛɣuni, ka Yawɛ yi sa pii ninvuɣ’ so, ŋuna n-nyɛ ŋun be kasi. Yinim’ Lɛvi zuliya ŋɔ, yi va n-ʒi pam!”
8Ka Musa daa lan yɛli Kɔra, “Yinim’ Lɛvi zuliya ŋɔ, wummiya! 9Yi ʒiɛmla Izraɛl Naawuni ni pii ya ka woligi ya Izraɛlnim’ ni n-zaŋ ya mir’ omaŋa ni yi tumdi tuma ŋun’ Yawɛ chirigibu shee suɣili la ni, ka zaani niriba maa tooni n-tumdi tuma sɔŋdi ba la? 10Ŋuna n-zaŋ a min’ a mabihi bɛn zaa nyɛ Lɛvinim’ la mir’ omaŋa. Di zaa yoli ka yi lan bɔri maligumaanitali tuma gba? 11Dinzuɣu Yawɛ ka a min’ a nyaandoliba maa zaa taai duŋ niŋ maa. Ŋuni n-lee nyɛ Aduna ka yi ŋumdi yi kparima ni niŋd’ o?”
12Di saha ka Musa daa tim ti boli Ɛliab bihi, Datan mini Abiram. Ka bɛ daa yɛli, “Ti ku kana. 13A ni zaŋ ti yi tiŋgban’ shɛli din mali bihim mini shiri pam#16.13 TIŊGBAN’ SHƐLI DIN MALI BIHIM MINI SHIRI PAM: Di gbinni nyɛla, “Tiŋgban’ shɛli din mali anfaani mini atam”. ni na ni a ti ku ti yɔɣu ŋɔ ni la nyɛla yɛlibila, ka a ti lan bɔri ni a zaŋ amaŋ’ leei naa su ti? 14Din pahi nyɛla, a bi zaŋ tiŋgban’ shɛli din mali bihim mini shiri pam ti ti bee n-zaŋ puri mini tihi puri ti ti ka di leei ti dini. Pumpɔŋɔ a bɔrimi ni a yɔhim ti. Ti ku kana!”
15Ka Musa suhu daa yiɣisi pam, ka o yɛli Yawɛ, “Di deei bɛ sara maligu. N na ʒi n-deei bɛ so buŋa, m mi na ʒi n-niŋ bɛ ni so zaɣ’ biɛ’ shɛli.”
16Ka Musa daa yɛli Kɔra, “A min’ a nyaandoliba maa zaa ni Aduna sa kam’ Yawɛ tooni na biɛɣuni. 17Yi zaa yinoyino kpuɣim’ o labila, ka di kalinli yiɣisi kɔbisiyi ni pihinu ka yi niŋ tulaale zim niŋ di ni n-zaŋ li ka Yawɛ tooni na. Ka a gba mini Aduna gbibi yi tulaale lahi.” 18Ka sokam daa kpuɣ’ o laa m-mooi buɣim niŋ di ni, ka niŋ tulaale zim pa di zuɣu. Ka bɛ mini Musa ni Aduna daa zani Yawɛ chirigibu shee suɣili maa dunol’ ni. 19Di saha ka Kɔra daa laɣim ninvuɣ’ shɛb’ bɛn daa taai duŋ maa zaa Yawɛ chirigibu shee suɣili maa dunol’ ni. Ka Yawɛ jilima neesim daa neei niriba maa zaa sani. 20Di saha ka Yawɛ daa yɛli Musa mini Aduna, 21“Woligimiya yimaŋ’ ka chɛ niriba ŋɔ ka n ku ba pumpɔŋɔ.”
22Ka bɛ daa silim zaŋ bɛ nina kpa tiŋa ka yɛli, “Yaa Naawuni, nyin’ ŋun su vuhirigu kam zaa nyɛvili ŋɔ, wula ka ninvuɣ’ yino tum alahichi, ka a suhu yiɣisi bahi niriba ŋɔ zaa zuɣu?”
23Ka Yawɛ daa yɛli Musa, 24“Yɛlim’ niriba maa, miligimiya Kɔra mini Datan ni Abiram biɛhigu shee.”
25Di saha ka Musa daa yiɣisi ka Izraɛl kpamba daa dol’ o ka bɛ chaŋ Datan mini Abiram sani. 26Ka o daa yɛli niriba maa, “Miligimiya ninvuɣ’ biɛri ŋɔ suɣa shee, ka di shihiya bɛ binshɛɣu, di yi pa lala bɛ daalahichi maa zaa ni ʒin ya chaŋ.” 27Dinzuɣu ka bɛ daa miligi Kɔra mini Datan ni Abiram biɛhigu shee maa.
Datan mini Abiram ni bɛ paɣiba ni bɛ bisarinsi ni bɛ bibihi daa yimina ti ʒe bɛ suɣa dunoya ni. 28Ka Musa daa yɛli, “Dimbɔŋɔ n-yɛn chɛ ka yi baŋ ni Yawɛ n-shiri tim ma na ni n ti tum tuma ŋɔ zaa, ka di pala mmaŋmaŋ’ yubu ka n tumda. 29Niriba ŋɔ yi kpi kaman sokam zaa ni kpiri shɛm bee yɛl’ shɛli din paari sokam zaa yi paai ba, dindina, pa Yawɛ n-shiri tim ma na. 30Amaa Yawɛ yi chɛ ka so ni na ʒi n-nya yɛl’ shɛli niŋ ba, ka tiŋgbani yaai di noli vali ba tabili bɛ ni su binshɛɣukam zaa, ka bɛ kpe kpiimba biɛhigu shee zaɣ’ nɛma, dina n-ni chɛ ka yi baŋ ni bɛ ʒiɛm Yawɛ.”
31O ni daa yɛri maa, o noli daa na bi lu tiŋa, ka tiŋgbani bɔɣi bɛ naba ni. 32Tiŋgbani maa daa yaai di noli n-vali bɛ mini bɛ yiŋnima ni Kɔra ni daa su ninvuɣ’ shɛb’ zaa zaŋ tabili bɛ binshɛɣukam zaa. 33Ka bɛ mini bɛ binshɛɣukam zaa daa kpe kpiimba biɛhigu shee zaɣ’ nɛma, ka tiŋgbani mum ba niŋ, ka bɛ daa bahi yoli niriba maa ni. 34Ka Izraɛlnim’ zaa bɛn daa miri ba daa wum bɛ kuhigu ka guui; dama bɛ daa yɛlimi, “Tiŋgbani ni vali ti gba!”
35Di saha ka buɣim daa yi Yawɛ sanna ti di ninvuɣ’ kɔbisiyi ni pihinu bɛn daa tuɣili tulaale zim maa.
Buɣim moori bina
36Di nyaaŋa ka Yawɛ daa yɛli Musa, 37“Yɛlim’ maligumaana Aduna bia Ɛliɛza ni o yihim’ tulaale tuɣindi labihi maa buɣim niɛm maa ni n-kpaai di buɣim bahi katiŋa, dama di nyɛla din be kasi. 38Dama alahichinim’ maa tulaale tuɣindi labihi maa leela din be kasi bɛ nyɛviya kɔŋbu maa zuɣu. Dinzuɣu zaŋmi li kuri gbiŋgbarinlinsi n-zaŋ li pa sara maligu bimbini zuɣu, dama bɛ daa zaŋ li mi ti Yawɛ; di nyɛla din be kasi. Di yi niŋ lala, di ni leei shihirili Izraɛlnim’ sani.” 39Ka maligumaana Ɛliɛza daa zaŋ buɣim ni daa di ninvuɣ’ shɛb’ maa ni daa zaŋ daanya tulaale tuɣindi labihi shɛŋa ti Naawuni maa n-kuri gbiŋgbarinlinsi pa sara maligu bimbini zuɣu. 40Ka di teeri Izraɛlnima ni ninvuɣ’ so ŋun pa maligumaana, ka mi pa ŋun yi Aduna zuliya ni na ku lan kana ni o ti tuɣili tulaale zim Yawɛ tooni, ka din niŋ Kɔra min’ o nyaandoliba maa ti niŋ o kaman Yawɛ ni daa ka chɛ Musa yɛl’ o shɛm maa.
Aduna fa niriba bahi
41Ka biɛɣu daa neei ka Izraɛlnim’ zaa daa taai duŋ niŋ Musa mini Aduna yɛra, “Yinima n-ku Yawɛ niriba maa.” 42Niriba maa ni daa laɣim lu Musa mini Aduna zuɣu saha shɛli maa, ka bɛ daa ŋmaligi lihi Yawɛ chirigibu shee suɣili maa polo nya ka sagbani pun sirigina ti pani di zuɣu, ka Yawɛ jilima neesim neei. 43Ka Musa mini Aduna daa ka Yawɛ chirigibu shee suɣili maa tooni na. 44Ka Yawɛ daa yɛli Musa, 45“Miligim’ ka chɛ niriba ŋɔ, ka n ku ba pumpɔŋɔ!”
Ka bɛ daa lu n-zaŋ bɛ nina kpa tiŋa. 46Ka Musa daa yɛli Aduna. “Zaŋm’ a tulaale tuɣindi labila m-mooi buɣim bimbini zuɣu niŋ tulaale zim pa di zuɣu n-zaŋ li chaŋ niriba maa sani yomyom ti mali sara ti ba, dama Yawɛ suhu yiɣisi bahi bɛ zuɣu, ka alɔbo pun piligi.” 47Ka Aduna daa zaŋ li guui ti kpe niriba maa sunsuuni kaman Musa ni daa yɛl’ o shɛm maa, ka alɔbo maa daa pun lu niriba maa zuɣu, ka o daa niŋ tulaale zim maa pa buɣim maa zuɣu m-mali sara ti niriba maa. 48Ka o daa zani kpiimba mini ninvuɣ’ nɛma sunsuuni, ka alɔbo maa chɛ. 49Alɔbo maa ni daa ku ninvuɣ’ shɛb’ kalinli daa yiɣisila ninvuɣ’ tuhi’ pinaanahi ni kɔbisiyopɔin ka naanyi chɛ ninvuɣ’ shɛb’ bɛn daa kpi Kɔra duŋ taabu ni la. 50Alɔbo maa ni daa chɛ, ka Aduna labi Musa sani Yawɛ min’ o niriba chirigibu shee suɣili maa dunol’ ni.
Red Letter Dagbani Bible © Bible Society of Ghana, 2011