Matayo 6
6
Erĩkangĩrĩrya busana nʼerĩhĩtya
1Mũyĩtegaye Simukole ebibuya byenyũ embere syʼabandu erilolwako nabo. Mwamakola ebibuya byenyũ embere syʼabandu, simwendisyabana oluhembo lwa Tata wenyũ oyuli elubula.
2Neryo omugulu ũkahĩtaya, sigubuhe ngubi emuliro wawe, ngʼabakayĩtendereraya ko bakakola omo manyũmba wʼerĩhĩndanamo nʼomo syombalu, bati bapipawe nʼabandu. Kwenene ngababwira nyiti, bawite oluhembo lwabo losĩ. 3Nĩkwa omugulu ũkahĩtaya, Suleke ebyala byawe byʼamalembe bikaminya ebyo byala byʼamali bikakola. 4Neryo erĩhĩtya lyawe libye omo bũbĩso-bĩso. Na Tata wawe oyukalangira bũbĩso-bĩso asyakuhemba.
Erĩkangĩrĩrya omwatsi wʼerisaba
(Lk 11.2-4)
5Omugulu mukasaba, isimwabya ngʼabatebya! Kusangwa banzĩre erihangana nʼerisaba omo manyũmba wʼerĩhĩndanamo nʼomo syongonde syʼesyombalu, balolaweko nʼabandu. Kwenene ngababwira nyiti, Bawite oluhembo lwabo losĩ. 6Nĩkwa uwe, omugulu ukasaba, wingire omo kisenge kyawe, neryo wabikinga Olũyĩ, iwasaba Tata wawe oyuli mo bũbĩso-bĩso. Na Tata wawe oyukalangira mo bũbĩso-bĩso, asyakuhemba.
7Kandi omugulu mukasaba, Simubye mukasubirira omo bĩnywa bitya-bitya, ngoko Ebihanda bikakola, kusangwa bakaganĩraya bati basyogũbwa busana nʼebĩnywa byabo bingi. 8Neryo Simubye ngabo; kusangwa Tata wenyũ anasĩ ebibali bwaga, isimwemwamusaba. 9Neryo ko musabe mutya, muti,
Tata wetu oyuli elubula,
Erĩna lyawe ribye rĩbũyĩrĩre.
10Obwami bwawe bwase.
Erisonda lyawe liyirawe,
Omo kihugo ngoko liri omo lubula.
11Utuhe mũnabwĩre akalyo ketu akatutolere.
12Utubuyire amalolo ago twabirikola;
Ngoko tukabuyira abandi bʼamalolo ago bakatukolera.
13Sĩgũtwĩngĩraye omwʼirengwako, nĩkwa ũtũlamaye oko mubi.
Kusangwa obwami ni bwawe,
Nʼobũtokĩ, nʼolukengerwa, kera na kera. Amina.
14Kusangwa mwamabuyira abandu kwʼamalolo ago babiribakola, Tata wenyũ wʼelubula, asyababuyira nibya. 15Nĩkwa mwamatindabuyira abandi bʼamalolo bakabakolera, Tata wenyũ siendisyababuyira amalolo ago mwabirikola.
Erĩkangĩrĩrya busana nʼeritsira akalyo
16Omugulu mukatsira akalyo,
Simubye nʼobũsũ bũtsandĩre ngʼabatebya ko bakakola. Kusangwa bakatsandaya amũsũ wabo bati balolaweko nʼabandu ngʼabandu bakatsira akalyo. Kwenene ngabũga nenyũ nyiti, Banawite oluhembo lwabo losĩ. 17Nĩkwa uwe omugulu ukatsira akalyo, ũhakabaye omutwe wawe wʼamagũta, kandi ũnabaye obũsũ bwawe. 18Eritsira lyawe lyʼakalyo sirilolaweko nʼabandu, nĩkwa Tata wawe oyuli bũbĩso-bĩso asyaminya. Kandi Tata wawe Oyũkalebaya bũbĩso-bĩso, asyakuhemba.
Eribika ebindu byʼelubula
(Lk 12.33-34)
19Simuyibikire bindu muna-kihugo, aho ehinyurugunzu nʼamakenge bĩkaheraya, kandi aho abarahĩ bakatula nʼerĩĩba. 20Nĩkwa muyibikire ebindu elubula, aho ehinyurugunzu nʼamakenge bĩteheraya, kandi aho abarahĩ sibetula nʼerĩĩba. 21Kusangwa ahali ebindu byawe, ho mutima wawe asyabya nibya.
Etala yʼomubiri
(Lk 11.34-36)
22Etala yʼomubiri lye rĩso; omugulu erĩso lyawe lĩkakoleraya, omubiri wawe gosĩ asyũsũla nʼekyakakala. 23Nĩkwa erĩso lyawe lyamabya libi, omubiri wawe gosĩ asyũsũla mʼomwĩrĩmya. Neryo ekyakakala ekiri omwisi wawe kyamabya mwĩrĩmya, omwĩrĩmya oyo ni munene kutsibu!
Nyamuhanga nʼebindu.
(Lk 16.13; 12.22-31)
24Sihali mundu oyo wangatoka erikolera abakama babiri; kusangwa asyakwa omuguma yʼobusu, nʼerianza ogundi. Kutse asyabegera oko muguma, iniapona ogundi. Simwangatoka erikolera Nyamuhanga nʼebindu. 25Busana nʼomwatsi oyũ, ngababwira nyiti, Sĩmũyĩlũhaye nʼamaganĩryo busana nʼengebe yenyũ, muti, mwasyalyakĩ, kutse busana nʼomubiri, nga mwasyambalakĩ. Kusangwa engebe sĩyĩrengĩre byalya, nʼomubiri sĩalengĩre esyongimba kwehĩ? 26Musamalire esyonyonyũ syʼomo kyanya; kusangwa sisyebiba, kutse sisyegesa, kutse erĩhĩrabyo omo bigona; nĩkwa Tata wenyũ wʼelubula akalĩsayasyo. Nenyũ Simuli bʼobũgũlĩ bunene kwilabasyo kwehĩ? 27Kandi nindi kwĩnywe amayĩlũhya busana nʼamaganĩryo angatoka eriyitomekera oko myaka yiwe kwehĩ? 28Kandi busana nakĩ mũkayĩlũhaya omo maganĩryo busana nʼesyongimba kwehĩ? Mũlebaye ebiranga-ranga byʼomolĩ ngoko bikalasa. Sibyenuba, kutse eriluka esyongimba. 29Nĩkwa ngababwira nyiti, Solomono omo lukengerwa luwe losĩ mwatambala ndeke ngʼomusanga muguma oyũ. 30Nĩkwa Nyamuhanga oyũkambalaya ebiti byʼomolĩ, ebikabyaho mũnabwĩre nʼomo ngyakya bikagusawa omo lĩko, siendĩsyabambalya kwilaba aho ĩnywe bandu bʼerĩkĩrĩrya ĩke kwehĩ? 31Neryo sĩmũyĩlũhaye nʼamaganĩryo muti, Twasyalyakĩ, kutse Twasyapũlyakĩ, kutse twasyambalakĩ kwehĩ? 32Kusangwa ebihanda bikasonda-sondaya ebindu byosĩ ebĩ byo kutsibu. Tata wenyũ wʼelubula anasĩ ebyosĩ ebibali bwaga. 33Nĩkwa mũtsũke erisonda Obwami bwa Nyamuhanga nʼeritunganene riwe, naye asyabaha ebindu byosĩ ebĩ. 34Neryo sĩmũyĩlũhaye nʼamaganĩryo busana nʼomo ngyakya; kusangwa engyakya yasyabya nʼamaganĩryo wayo. Obuli kiro kiwite obũlĩge bungaho.
Právě zvoleno:
Matayo 6: KB80
Zvýraznění
Kopírovat
Porovnat
Sdílet
Chceš mít své zvýrazněné verše uložené na všech zařízeních? Zaregistruj se nebo se přihlas
Bible in Kinandi © Bible Society of the Democratic Republic of Congo, and Bible Society of Uganda, 1980.