Oblíbené biblické verše z 2 Bitut 1

Mat chet A̱gwaza hwa, nang Yesu nnang zi̱t kuzang kyang nang zi̱ chat mi̱ swat khwi ku myim gu a̱ni. Zi̱ ka̱n san kuzang kyang mat si̱sak nang zi̱ ndyen gu a̱ni. Nggu wa yorong zi̱t da̱ a̱vwuo nggu zi̱ shya̱ shi ma̱ng yet a̱tan nggu hu, ku swak si̱ konyan a̱ni. A̱wot mat nang A̱gwaza nshi a̱ si̱ bu swak ma̱ng yet a̱tan a̱ni, a̱ si̱ nyia̱ nzi̱t a̱cha̱chet ma̱ng á̱tsatsak a̱li̱ka̱uli nggu ba. Á̱tsatsak a̱li̱ka̱uli bani bya na tyia̱ nyi nyia̱ a̱tan nang A̱gwaza a̱ni. A̱wot nyi shot a̱ka̱tuk nshyuo á̱nietbishyi mi̱ swanta, ji̱ byian za̱kwa nyin ji a̱ni.

Mat a̱mgba̱m a̱yaali̱ka̱uli bani nang A̱gwaza nyia̱ nzi̱t ndyo a̱ni, nyi mbeang nwuak fwuo nyin hu di̱ Yesu mat ntangka̱i za̱kwa nani; nyi nwuak fwuo di̱ Yesu ma̱nyin nggu bah, nyi mbeang nyia̱ a̱tan ta̱m mameang. Nyi nyia̱ a̱tan ta̱m ma̱nyin hu bah, nyi mbeang lyen A̱gwaza mameang. Nyi lyen A̱gwaza ma̱nyin nggu bah, nyi mbeang ya̱baat á̱pyia̱ mameang. Nyi ya̱baat á̱pyia̱ ma̱nyin hu bah, nyi mbeang gbang a̱lyia̱ mameang. Nyi gbang a̱lyia̱ ma̱nyin hu bah, nyi mbeang khwi A̱gwaza di̱n vak hu myim gu a̱ni. A̱wot nyi khwi A̱gwaza di̱n vak ku myim gu a̱ni ma̱nyin hu bah, nyi mbeang fa̱k da̱ á̱na̱nyiuk nyin ba, ba̱ yet á̱niet khwi a̱ni mameang. Nyi fa̱k da̱ á̱na̱nyiuk ba̱ yet á̱niet khwi a̱ni ma̱nyin mba bah, nyi mbeang chat konyan mameang.

Ma̱nang nyi mban ma̱ng ntangka̱i za̱kwa nani gba̱mgbam a̱ni, ma a̱nia wa ku na tyia̱ nyi nyia̱ ta̱m shansham, nyi mban ma̱ng a̱fi̱ng di̱ lyen Yesu Kristi, A̱tyoli nzi̱t wu.

Mat a̱nia, nyin á̱niet khwi Yesu ba nang n chat a̱ni, nyi kwan ba̱t nyi nyia̱ ta̱m ma̱ng tangka̱i za̱kwa huni. Nyi tak chi̱k nang A̱gwaza wa ngyei nyin, a̱ si̱ bu khai nyin. Mat ki̱ nyi nyia̱ a̱nia, nyi si̱ mi̱n mak kwa, nyi bwuok lilyim di̱ nwuak a̱chuchuk nyin hu bah, ku ma̱ chunchwiit.