لوقا 7
7
روم امپراطورلیگیندَن، بیر اَفسرینگ نوکری شفا توتیر
1عیسا بوتون بو سؤزلَری خَلخه دئیَندن سورا، کَفَرناحوم شَهرینه گلدی. 2بیر روملی اَفسر اؤردا ایدی. بو کیشیده بیر عَزیز نوکر وار ایدی. بو نوکر مَریض اولموشدو و آز قالمیشدی اؤله. 3او روملی اَفسر، عیسا بارهسینده ائشیدَنده، یهودیلار شیخلَرینینگ نئچه نفرینی، عیسا یانینا یوللادی تا اؤنا یالوارالّار تا گله و او نوکری شفا وئره. 4اوللار دا عیسا یانینا گلدیلَر، عیسایا چوخ یالواردیلار و دئدیلَر: «بو کیشی لایق دیر کی سَن بو لُطفی اؤنونگ حَقّینده ائدَینگ، 5بو خاطره کی او بیزیم ملّتیمیزی چوخ سئیر و بو کیشی، ائله او آدام دیر کی بیزیم عبادتگاهمیزی دؤزهتمیش.» 6عیسا دا اوللار اینان یولا دؤشدو و اوندا کی اؤنونگ ائوینه یاخین اولدو، او اَفسر اؤز یولداشلارینینگ نئچه نفرینی، عیسا یانینا یوللادی تا اؤنا دئیَلَّر کی: «آقا، بوندان آرتیق زَحمت چَکمه. من لایق دهییلَم کی سَن مَنیم ائویم سَقفی آلتینا قیچ قؤیانگ. 7بو سَبریه ده اؤزومو لایق گؤرمهدیم کی سَنینگ خدمتینگه گلَم. آما سَن فقط بیر کلام دئ، نوکریم خوب اولور. 8بونونگ ایچی کی مَنیم اؤزوم مأمورام و بیر پارا سرباز دا اؤز اَمریمده واریم و بیرینه دئییرم ”گئد“، گئدیر و اوبیرسینه دئییرم ”گَل“، گلیر و نوکریمه دئییرم فلان ایشی گؤر، او دا یئرینه ائتیشتیریر.» 9عیسا بونو ائشیدَنده حیران قالدی و ایزینی دالی آردیندان گلَن جمعیته ساری ائدی و دئدی: «سیزه دئییرم، من بیر بئله ایمانی، تارئ خَلخی آراسیندا ده گؤرمهمیشَم.» 10یولداشلاری ائوه گئری دؤننده گؤردولَر کی او نوکر ساغ دیر.
بیر دول آروادینگ اوغلونو دئرّیتمَک
11بیر آز مُدّتدَن سورا، عیسا اؤز شاگردلَری اینَن و بیر بویوک جمعیت اینن کی اؤنونگ یانی سورا گئدیرلَردی، بیر نائین آدلی شَهره گئتدی. 12شَهر دروازهسینه یاخین اولاندا، گؤردو کی بیر اؤلویی آپاریرلار. اؤلَن، بیر دول آروادینگ تَک اوغلو ایدی. او شَهرینگ آداملاریندان، بیر بویوک جمعیت ده او آروادینگ یانی سورا گئدیرلَردی. 13رَب عیسا او آروادی گؤرَنده، اؤرهکی اؤنا یاندی و بئلَسینه دئدی: «آغلاما.» 14اوندان سورا عیسا ایلَری گلدی و اَلینی تابوت اوستونه قؤیدو. تابوتی آپاران آداملار توردولار. عیسا دئدی: «ای جاهال، سنه دئییرم، تور آیاقی.» 15او اؤلو اوتوردو و دانیشماکا باشلادی. عیسا اؤنو آناسینا گئری وئردی. 16بوتون خَلخینگ جانینا قورخو دؤشدو و تارئیی حمد و ثنا ائدیلَر و دئییرلَردی: «بیر بویوک پیغمبر بیزیم آرامیزدا ظهور ائدمیش!» و «تارئ اؤز خَلخینینگ کؤمَکینه گلمیش!» 17عیسا گؤرَن ایشینگ خَبری، بوتون یهودیه و او دئییر و بَردهکی ولایتلَرده داغیلدی.
یحیا، عیسایا پیغام یوللاییر
18یحیا شاگردلَری، یحیایی بو ایشلَرینگ واریسیندان خبر ائدیلَر. یحیا دا ایکّی نفر شاگردلَریندَن چاغیردی 19و اوللاری بو پیغام اینان رَب عیسا یانینا یوللادی کی اؤنا دئیهلَّر: «آیا او کی گلَسی سَنَینگ یا بیر آیری گلَنینگ یولونو گؤزلهیَسیک؟» 20او ایکّی آدام دا عیسا یانینا گلدیلَر و دئدیلَر: «تَعمید وئرَن یحیا بیزی سَنینگ یانینا یوللامیش تا سَندَن خبر آلاک کی، ”آیا او کی گلَسی سَنَینگ یا بیر آیری گلَنینگ یولونو گؤزلهیَسیک؟“» 21ائله او موقع عیسا چوخ آداملاری، مَریضلیگلَردن، دردلَردن و شیطانلی روحلاردان شفا وئردی و چوخ کور آداملارینگ گؤزلَرینی آچدی. 22عیسا اوللارا جواب وئردی: «گئدینز و گؤردوگونز و ائشیتدیگینز زادلاری یحیا ایچی دئیینز کی کورلار گؤرورلَر، آخساقلار یول گئدیرلَر، جُذاملیلار شفا توتیرلار، کَرلَر ائشیدیرلَر و اؤلولَر دئرّیلیرلَر و یوخسوللارا خوش خبر وئریلیر. 23خوش او آدام حالینا کی مندن ایز بؤکمهیه.» 24یحیا ائلچیلَرینینگ گئدمَکیندَن سورا، عیسا، یحیا بارهسینده خَلخ ایچی دانیشدی و دئدی: «سیز بیابانا کیمینگ گؤرمَکی ایچی گئدینز؟ بیر کیشینینگ گؤرمَکی ایچی کی بیابانداکی قَمیش لهیین دیر کی یئل اَسَنده هر یانا اؤینیا؟ 25پس نَمنهنینگ گؤرمَکی ایچی یازّیا چیخدینز؟ بیر کیشینینگ گؤرمَکی ایچی کی بیر گران رَخت گئیمیش؟ او آداملار کی اَعیانی رَختلَر گئییرلَر و دَبدَبه اینَن زندَلیگ ائدیرلَر، پادشاهلار قَصرلَرینده دیرلَر. 26پس نَمنهنینگ گؤرمَکی ایچی یازّیا چیخدینز؟ بیر پیغمبر؟ بَله، سیزه دئییرم کی او، پیغمبردَن ده آرتیق دیر. 27یحیا ائله او کیشی دیر کی مُقدّس یازیلیلاردا، اؤنونگ حَقّینده یازیلمیش کی:
”سَندن ایلَری اؤز ائلچیمی یولا سالیرام.
او سَنینگ یولونگی، سَنینگ ایچی آماده ائدهر.“
28سیزه دئییرم، یحیادان بویوکتر آدام، آنادان اولماموش؛ آما تارئ پادشاهلیگیندا، ائنگ کوچوک آدام، اوندان بویوکتر دیر.» 29اوندا کی بوتون خَلخ و حتّی باج ییغَنلَر ده عیسا دئدیگی گپلَری ائشیتدیلَر، اعلام ائدیلَر کی تارئ حَق دیر چونکی یحیا اَلیندَن تَعمید غُسلی توتموشلاردی، 30آما فَریسی فِرقهسینینگ عالِملَری و شَریعت عالِملَری، تارئ هَدفینی اؤزلَری ایچی رَد ائدیلَر چونکی قبول ائدمهمیشلَردی کی یحیا اَلیندَن تَعمید توتالّار. 31و عیسا دئدی: «بو نَسلینگ آداملارینی نَمنهیه بَنزهدَم؟ اوللار نهیه بَنزهییرلَر؟ 32اوللار میدانلاردا اوتوران اوشاقلارا بَنزهییرلَر کی، بیر بیری چاغیریرلار و دئییرلَر:
”بیز سیزینگ ایچی نِی چالدیک، اؤینامادینز؛
سیزینگ ایچی نوحه اوخودوک، آغلامادینز!“
33چونکی تَعمید وئرَن یحیا گلمیش، نه چؤرهک یئییر، نه ده شراب ایچیر، دئییرینز: ”اوندا شیطانلی روح وار.“ 34انسان اوغلو گلمیش، کی هم یئییر و هم ده ایچیر، دئییرینز: ”بونا باخینز، بیر قارنَکی و بیر عَرَق خور آدام دیر، باج ییغَنلَرینگ و گُناهکارلارینگ یولداشی دیر.“ 35سیزینگ عَمللَرینز ثابت ائدیر کی سیزده عَقل و حِکمَت یوخدور.»
فَریسی شَمعون ائوینده
36فَریسی عالِملَرینینگ بیرسی عیسایی خورَکی یئمَک ایچی قوناقلادی. عیسا دا او فَریسی ائوینه گئتدی و سُفره قیراقینا اوتوردو. 37او شَهرده بیر گُناهکار آرواد زندلیگ ائدیردی. اوندا کی او آرواد ائشیتدی کی عیسا او فَریسی ائوینه قوناق دور، بیر آغ مَرمَر دَرفینگ دؤلوسو عَطرلی یاغ گتیردی. 38آرواد آغلایا-آغلایا عیسانینگ دالی آردیندان، اؤنونگ آیاقی ایجینه توردو. گؤزلَرینینگ یاشی عیسا قیچلَری اوستونه توکّالادی. او، ساچلاری اینان اؤنونگ قیچلَرینی قورّودو، قیچلَرینی ماچ ائدی و عَطرلی یاغ سؤرتدو. 39عیسایی قوناقلایان فَریسی بونو گؤرَنده، اؤزو اینَن دئدی: «اگر کی بو کیشی گرچَکدَن بیر پیغمبر ایدی، بیلَردی کی بو آرواد کی بئلَسینه اَل وورور کیم دیر و نهیین آرواد دیر. بو بیر گُناهکار آرواد دیر.» 40عیسا او فَریسیه دئدی: «شَمعون، سئیرَم سنه بیر زاد دئیهم.» او دا دئدی: «بویور، اُستاد.» 41عیسا دئدی: «بیر نفر، ایکّی آدامدان آلاجاق ایدی. او آداملارینگ بیری، بئش یوز دینار کی بیر فَحلهنینگ اون سکّیز آیینینگ دستمزدی ایدی، اؤنا وئرهجَک ایدی، او بیرسی ده اَللی دینار کی بیر فَحلهنینگ بیر آی یاریم دستمزدی ایدی وئرهجَک ایدی. 42چونکی او ایکّی آدامینگ هئچ بیری قَرضلَرینی گئری وئره بیلمهییرلَردی، او آلاجاق آدام، ایکّیسینینگ قَرضینی ده باغیشلادی. ایندی سَن دئ گؤرَک، او ایکّی آدامینگ هانیسی او کیشییی آرتیق چوخ سئیَر؟» 43شَمعون جواب وئردی: «گمان ائدیرَم او کی آرتیق وئرهجَک ایدی و باغیشلاندی.» عیسا دئدی: «دؤز حکم ائدینگ.» 44اوندان سورا عیسا ایزینی او آروادا ساری ائدی و شَمعونا دئدی: «بو آروادی گؤرورَینگ؟ من سَنینگ ائوینگه گلدیم، سَن قیچلَریمینگ یووماگی ایچی سو گتیرمهدینگ، آما بو آرواد قیچلَریمی گؤزلَرینینگ یاشی اینان یوودو و ساچلاری اینان ده قورّودو. 45سَن منیم ایزیمی ماچ ائدمهدینگ، آما بو آرواد، من ایچَری گلَندَن بَری، قیچلَریمینگ ماچ ائدمَکیندَن اَل گؤتورمئیر. 46سَن مَنیم باشیما یاغ سؤرتمهدینگ آما بو آرواد قیچلَریمه عَطرلی یاغ، سؤرتدو. 47پس سنه دئییرم کی، اؤنونگ بئله چوخ مُحبّتی گؤرسَدیر کی اؤنونگ گُناهلاری کی چوخ دور، باغیشلانمیش آما او آدام کی آز باغیشلانمیش، آز دا مُحبّت ائدیر.» 48و او آروادا دئدی: «سَنینگ گُناهلارینگ باغیشلانمیش.» 49سُفره قیراقینا اوتوران آداملار اؤز آرالاریندا دئییرلَردی: «بو کیم دیر کی حتّی گُناهلاری دا باغیشلاییر؟» 50عیسا او آروادا دئدی: «سَنینگ ایمانینگ سَنی نجات وئرمیش، سلامت گئد.»
دیاریکراوەکانی ئێستا:
لوقا 7: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company