لوقا 6
6
عیسا مُقدّس شنبه گؤنونگ اَیهسی دیر
1یهودیلارینگ بیر مُقدّس شنبهسی گؤنونده عیسا اَکینلَر ایچیندَن گچیردی. اؤنونگ شاگردلَری، بوغدا خوشالارینینگ باشینی قوپاردیرلاردی، اؤوجلاریندا اوکّولئیرلاردی و یئییرلَردی. 2آما بیر پارا عالِم کی فَریسی فِرقهسیندَن ایدیلَر، اوللارا دئدیلَر: «نه ایچی بیر ایشی کی گؤرمَکی مُقدّس شنبه گؤنونده جایز دهییل، گؤرورَینز؟» 3عیسا اوللارا جواب وئردی: «بئیه اوخومامیشاینز، کی داوود پادشاه، اوندا کی اؤزو و یانینداکیلار آج ایدیلار، نیجه ائدی؟ 4او، تارئ ائوینینگ ایچینه گئتدی و مُقدّس چؤرهکی گؤتوردو یئدی و یانینداکیلارا دا وئردی، او چؤرهکی کی یئمَکی هئچ کَسه جایز دهییل، بهغیری کاهِنلَره، کی مَعبدینگ عالِملَری دیرلَر.» 5و عیسا اوللارا دئدی: «انسان اوغلو مُقدّس شنبه گؤنونونگ ده اَیهسی دیر.»
عیسا مُقدّس شنبه گؤنونده شفا وئریر
6بیر آیری مُقدّس شنبه گؤنونده، عیسا یهودیلارینگ عبادتگاهینا گئتدی و تَعلیم وئریردی. بیر کیشی اؤردایدی کی ساغ اَلی قورّوموشدو. 7تورات معلّملَری و فَریسی فِرقهسینینگ عالِملَری گؤزلهییرلَردی گؤرَلَّر عیسا شنبه گؤنونده بیرینی شفا وئریر یا یو، تا بلکم بیر ماهان بولالّار تا عیسایا بوهتان وورالّار. 8آما عیسا کی اوللارینگ فکرلَرینی آنگلادی، او کیشییه کی اَلی قورّوموشدو، دئدی: «گل، تور بورا.» او دا توردو آیاقی و اؤردا توردو. 9عیسا اوللارا دئدی: «سیزدَن خبر آلیرام، هانیسی مُقدّس شنبه گؤنونده جایز دیر؛ خوبلیگ ائدمَک یا پیسلیگ ائدمَک، بیر آدامینگ جانینی نجات وئرمَک یا اؤنو نابود ائدمَک؟» 10عیسا اؤز دئییریندهکی آداملارینگ واریسینا باخدی و اوندا او کیشییه دئدی: «اَلینگ اوزات!» او دا اؤز اَلینی اوزاتدی و اَلی خوب اولدو. 11آما تورات معلّملَری و فَریسیلَر سَخت غُصّالاندیلار و بیر بیر اینَن شوهْر ائدیرلَردی گؤرَلَّر عیسا اینان نیجه ائدهسیلَر.
اون ایکّی حَواری
12او گؤنلَرده عیسا دُعا ائدمَک ایچی داغا گئتدی و بوتون گئجهیی سَحرَنچاز، تارئیا دُعا ائدیردی. 13سَحر اولاندا، شاگردلَرینی، اؤز یانینا چاغیردی. اوللارینگ اون ایکّی نفرینی سَچدی و اوللار اوستونه حَواری آدی قؤیدو: 14شَمعون کی، اؤنونگ اوستونه پِطرُس آدی قؤیدو، پِطرُسینگ کاکاسی آندریاس، یَعقوب و یوحَنّا، فیلیپُس و بَرتولْما، 15مَتّا، توما، حَلْفای اوغلو یَعقوب، وَطنپرست شَمعون، 16یَعقوب اوغلو یَهودا و یَهودا اَسخَریوط کی عیسایی اَله وئردی.
خوش سیزینگ حالینزا
17عیسا اوللار اینان داغدان آشاغی گلدی و بیر هامّار یئرده توردو. شاگردلَرینینگ چوخو و بیر بویوک جمعیت ده کی یهودیه ولایتینینگ واری یئریندَن، اورشلیم شَهریندَن و صور و صِیدون ساحِللَریندَن گلمیشلَردی، اؤردا ایدیلار. 18اوللار گلمیشلَردی تا عیسانینگ سؤزلَرینی ائشیدَلَّر و اؤز مَریضلیگلَریندن شفا توتالّار؛ شَریر روحلاردان عذاب چَکن آداملار دا شفا توتیرلاردی. 19بوتون جمعیت تَقلّی ائدیرلَردی تا اَللَری عیسایا دهیه، بو سَبریه کی اوندان چیخَن قُوّت، واریکَسی شفا وئریردی.
20عیسا اؤز شاگردلَرینه باخدی و دئدی:
«خوش سیزینگ حالینزا کی یوخسولاینز،
چونکی تارئ پادشاهلیگی سیزینگ دیر.
21«خوش سیزینگ حالینزا کی ایندی آجاینز،
چونکی دویاراینز.
«خوش سیزینگ حالینزا کی ایندی آغلاییراینز،
چونکی گؤلهرَینز.
22«خوش سیزینگ حالینزا اوندا کی خَلخ، انسان اوغلو سَبرسینه سیزدن نفرت وارلاری اولا و سیزی اؤز آرالاریندان چیخارتالّار، سیزه سؤیوش وئرَلَّر یا دا سیزی بدنام ائدَلَّر. 23او گؤنده شاد اولینز و شادلیگدان اؤیناینز، چونکی اَجرینز گؤیده بویوک دور؛ بو سَبریه کی بوللارینگ جَدلَری ده پیغمبرلَر اینَن ائله بئله رووآل ائدیلَر.
24«آما وای سیزینگ حالینزا ای وارلیلار،
چونکی خوش گؤنلَرینزی گچیردمیشَینز.
25وای سیزینگ حالینزا کی ایندی توخاینز،
چونکی آجلیگ چَکرَینز.
وای سیزینگ حالینزا کی ایندی گؤلورَینز،
چونکی یاس توتاراینز و آغلایاراینز.
26«وای سیزینگ حالینزا اوندا کی واری خَلخ سیزدن تعریف ائدَلَّر، بو سَبریه کی اوللارینگ جَدلَری ده، یالان پیغمبرلَر اینَن ائله بئلهیین رووآل ائدیلَر.
دشمنه مُحبّت ائدمَک
27«آما سیزه کی ائشیدیرَینز دئییرم، دشمنلَرینزی چوخ سئینز و او آداملارا کی سیزدَن نفرت وارلاری خوبلیگ ائدینز. 28سیزی غارغوش ائدَنلَر ایچی، بَرکت دُعاسی ائدینز و سیزی اذیت ائدَنلَر ایچی، خیر دُعاسی ائدینز. 29بیری ایزینگ بیر یانینا شاپالاق ووراندا، ایزینگ او بیر یانینی دا اؤنا ساری بؤک تا وورا. بیر آدام سَنینگ قابانگی آپاراندا، قؤی تا کؤینَکینگی دا آپارا. 30هَر کَس سَندَن بیر زاد سئدی، اؤنا وئر و او آدامدان کی مالینگی آپاریر، مالینگی گئری سئمه. 31خَلخ اینن ائله اولهیین رووآل ائدینز کی گؤینونز سئیر اوللار سیزینگ اینَن اولهیین رووآل ائدَلَّر.
32«اگر فقط سیزی چوخ سئیَن آداملاری چوخ سئینز، نَمنهینزه افتخار ائدیرَینز؟ چونکی حتّی گُناهکارلار دا اوللاری چوخ سئیَن آداملاری، چوخ سئیرلَر. 33اگر فقط سیزه خوبلیگ ائدَنلَره، خوبلیگ ائدَینز، نَمنهینزه افتخار ائدیرَینز؟ چونکی حتّی گُناهکارلار دا ائله بو ایشی گؤرورلَر. 34و اگر فقط او آداما قَرض وئرَینز کی اوندان گئری آلماگ امیدی وارینز، سیز نَمنهینزه افتخار ائدیرَینز؟ حتّی گُناهکارلار دا گُناهکارلارا قَرض وئریرلَر تا بیر گؤن قَرضلَرینی گئری آلالّار. 35آما سیز دشمنلَرینزی چوخ سئینز و اوللارا خوبلیگ ائدینز. توآقّاسیز قَرض وئرینز کی سیزینگ بیر بویوک اَجرینز اولور و مُتعال تارئنینگ اولادلاری اولاراینز، بو سَبریه کی او ناشُکرلار و شَریر آداملار اینان مهربان دیر. 36پس رَحملی اولینز، ائله اولهیین کی گؤیدهکی بووآینز رَحملی دیر.
آیری آداملارا حکم ائدمک
37«هئچ کَسه حکم ائدمَینز، سیزه ده حکم اولونماز. هئچ کَسی محکوم ائدمَینز، سیز ده محکوم اولمانز. باغیشلاینز، سیزده باغیشلاناراینز. 38وئرینز سیزه ده وئریلَر؛ اؤلچولو، سیلکیلی و باسیلی، دؤلو و داشمیش اؤلچو اینن سیزینگ اَتّگینزه تؤکولَر، چونکی ائله او اؤلچو اینن کی اؤلچیرَینز، سیزینگ ایچی اؤلچَرلَر.»
39عیسا بیر آیری مَثَل ده اوللارا چَکدی و دئدی: «بئیه بیر کور آدام، بیر آیری کورا یول گؤرسَدهبیلَر؟ بئیه ایکّیسی ده قویویا دؤشمهزلَر؟ 40شاگرد اؤز اُستادیندان اوخاری دهییل، آما درسینی تؤکدندَن سورا، اُستادی لهیین اولور.
41نه ایچی کاکانگ گؤزوندهکی سامان پَرینی گؤرورَینگ آما اؤز گؤزونگدهکی آغاج کونّاسینی گؤرمئیرَینگ؟ 42اؤز گؤزونگدهکی آغاج کونّاسینی گؤرمئیَنده، نهیین کاکانگا دئیه بیلیرَینگ کی: ”کاکام، قؤی تا گؤزوندهکی سامان پَرینی چیخارتام،“ ای ایکّیایزلی! اَوّل اؤز گؤزونگدهکی کونّایی چیخارت کی اوندا یئیتر گؤرهرَینگ تا کاکانگ گؤزوندهکی سامان پَرینی چیخارتانگ.
آغاج و ثَمری
43«هئچ خوب آغاج، پیس ثَمر وئرمئیر و هئچ پیس آغاجدا خوب ثَمر وئرمئیر، 44آغاجی ثَمریندن تانیارلار. نه تیکاندان، انجیر ییغیلَر، نه ده گئیَندَن، اوزوم. 45خوب آدام، اؤز اؤرهکیندهکی خوب خزئنهدَن، خوبلیگ عَمله گتیریر و پیس آدام اؤز اؤرهکیندهکی پیس خزئنهدَن، پیسلیگ عَمله گتیریر، چونکی دیل او زاددان دانیشار کی اؤرهک اوندان داشیر.
عَقللی مِعمار و عَقلسیز مِعمار
46«نه ایچی بیر بیر آردینا منی ”آقا، آقا“ چاغیریراینز آما سیزه دئدیگیمه عَمل ائدمئیرَینز؟ 47قؤیینز سیزه گؤرسَدَم کی مَنیم یانیما گلَن، منیم سؤزلَریمه قولاق آسان و اوللارا عَمل ائدَن آدام کیمه بَنزهییر؛ 48او، او آداما بَنزهییر کی اؤز ائوینی دوزهدَنده، یئری خوب چوقّور ائدی و ائوینگ پیینی داش اوستونه قؤیدو. اوندا کی سیل گلدی، سو او ائوه ساری هُجوم گتیردی آما او ائوی تَرپهده بیلمهدی بو سَبریه کی او ائو خوب دؤزهلمیش ایدی. 49آما او آدام کی مَنیم سؤزلَریمی ائشیدیر و اوللارا عَمل ائدمئیر، بیر آداما بَنزهییر کی اؤز ائوینی پیسیز، تورپاق اوستونه دؤزهتدی. اوندا کی سیل گلدی، سو ائوه ساری هُجوم گتیردی و او ائو دَرجا یومورولدو و ائوینگ ویرانلیگی چوخ بویوک ایدی.»
دیاریکراوەکانی ئێستا:
لوقا 6: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company