یوحنا 21
21
عیسا جَلیل دریاچهسینینگ یانیندا اؤزونو شاگردلَرینه گؤرسَدیر
1بیر مُدّتدن سورا عیسا گئنه اؤزونو شاگردلَرینه گؤرسَتدی. بو دفعه اؤزونو جَلیل دریاچهسی قیراقیندا گؤرسَتدی. او بئله ائدی: 2شَمعونِ پِطرُس، توما کی اؤنو جومّولو چاغیریرلاردی، نَتَنائیل کی جَلیل ولایتینینگ قانا کَندینینگ آدامی ایدی، زِبِدینینگ ایکّی اوغلو یعنی یَعقوب و یوحَنّا و ایکّی نفر داها شاگردلَردن بئلینه ایدیلَر. 3شَمعونِ پِطرُس اوللارا دئدی: «من گئدیرَم بالیق توتام.» اوللار دئدیلر: «بیز ده بئلینگ اینَن گلیرَک.» اوللار گئتدیلَر یازّیا و میندیلَر قایقا. آما او گئجه هئچنه توتمادیلار.
4سَحر یئر آچیلاندا، عیسا دریاچه قیراقیندا توردو؛ آما شاگردلَر بیلمهدیلَر کی او عیسا دیر. 5عیسا اوللارا دئدی: «اوشاقلار، هئچ بالیق توتمیشاینز؟» اوللار جواب وئردیلَر: «یو!» 6عیسا دئدی: «تورو قایقینگ ساغ طَرفینه آتینز کی بالیق توتاراینز.» اوللار دا تورو قایقینگ ساغ طَرفینه آتدیلار. اوللار ائله بالیق توتدولار کی آغیرلیقیندان تورو قایق ایچینه چَکه بیلمهییرلردی. 7او شاگرد کی عیسا اؤنو چوخ سئیردی، پِطرُسا دئدی: «بو رَب دیر!» شَمعون پِطرُس تا ائشیتدی کی رَب دیر، دالینداکی قابانینگ آیاقینی بئلینَنچاز ییغدی اوخاری و دیگینلَدی و اؤزونو آتدی سویا. 8آما باقّی شاگردلَر ائله بئله کی تورو کی بالیقدان دؤلو ایدی اؤز قولونجلاریندان چَکیرلردی، قایق اینن گلدیلَر. اوللار قورّولوقدان چوخ ایراق دهییللَردی بلکی تقریبا یوز متر ایراق ایدیلار.
9اوللار قورّولوقا ائتیشنده، بیر آلیشیق اوجاغ غور اینان گؤردولَر کی اوستونده بالیق وار، چؤرهک دا وار. 10عیسا اوللارا دئدی: «ایندی توتدیگینز بالیقلاردان بیر آز گتیرینز.» 11شَمعون پِطرُس گئتدی قایق یانینا و تورو ساحیله چَکدی. تور، بویوک بویوک بالیقلاردان دؤلو ایدی. بالیقلار یوز اَللی اؤچ دانا ایدیلار و با بو کی چوخ ایدیلار، تور ییرتیلمهمیشدی. 12عیسا اوللارا دئدی: «گلینز ناشتالوق ائدینز.» شاگردلَرینگ هئچ بیری جرأت ائدمهدیلَر بئلَسیندَن خبر آلالّار کی، «سَن کیمَینگ؟» بو سَبریه کی بیلیرلَردی کی او رَب دیر. 13عیسا، چؤرهکی، ائله بئله ده بالیقی کی اوت اوستونده ایدی گؤتوردو و وئردی اوللارا. 14بو اؤچونجو دفعه ایدی کی عیسا اؤلومدن دئرّیلندَن بری اؤزونو شاگردلَرینه گؤرسَتدی.
عیسا پِطرُسدان سئیر کی شاگردلری گؤزلهیه
15ناشتالوقدان سورا، عیسا شَمعون پِطرُسدان خبر آلدی: «شَمعون، یوحَنّا اوغلو، منی بوللاردان آرتیق چوخ سئیرَینگ؟» شَمعون پِطرُس جواب وئردی: «بَله یا رَب؛ بیلیرَینگ کی سنی چوخ سئیرَم.» عیسا بئلَسینه دئدی: «منیم قوزّولاریمی گؤزله.» 16ایکّینجی دفعه عیسا اوندان خبر آلدی: «شَمعون، یوحَنّا اوغلو، منی چوخ سئیرَینگ؟» شَمعون پِطرُس جواب وئردی: «بَله یا رَب؛ بیلیرَینگ کی سنی چوخ سئیرَم.» عیسا دئدی: «قویونلاریمی چوبانلیگ ائد.» 17اؤچونجو دفعه عیسا اوندان خبر آلدی: «شَمعون، یوحَنّا اوغلو، منی چوخ سئیرَینگ؟» پِطرُس بوندان کی عیسا اؤچ دفعه بئلَسیندَن خبر آلدی کی، ”منی چوخ سئیرَینگ“ اینجدی و عیسایا دئدی: «یا رَب، سَن واری زادی بیلیرَینگ؛ بیلیرَینگ کی من سَنی چوخ سئیرَم.» عیسا دئدی: «منیم قویونلاریمی گؤزله. 18گرچَکینی سَنه دئییرم، اوندا کی جاهالتر ایدینگ، اؤزونگ رَختینگی گئییردینگ و هَر یئره کی سئیردینگ گئدیردینگ؛ آما قوجالاندا اَللرینگی آچارانگ و بیر آیری آدام بئلَینگه رَخت گئیدیرَر و سنی اؤرایا کی سئمئیرَینگ آپارار.» 19عیسا بو گپی چالدی تا پِطرُس بیله کی نه رَقم اؤلَر و تارئ شوکتینی آشکار ائدهر. اوندا عیسا اؤنا دئدی: «منیم آردیم سورا گَل.»
20ائله بئله کی عیسا اینن پِطرُس یول گئدیرلَردی، پِطرُس بؤکولدو و گؤردو او شاگرد کی عیسا اؤنو چوخ سئییردی، اوللار قولونجوندان گلیر. او شاگرد ائله او ایدی کی پِسَخ شام وختی باشینی عیسا دؤشینه دایادی و بئلَسیندَن خبر آلدی کی: «آقا، او آدام کی سنی اَله وئرهر، کیم دیر؟» 21پِطرُس اؤنو گؤرَنده، عیسادان خبر آلدی: «یا رَب، پس بو نیجه اولور؟» 22عیسا پِطرُسا دئدی: «اگر منیم سئدیگیم بو اولا کی منیم بؤکولمَکیمانچاز بو آدام دئرّی قالا، سَن نه ایش وارینگ؟ سَن منیم آردیم سورا گَل!» 23پس عیسا شاگردلَری آراسیندا چؤ دؤشدو کی او شاگرد اؤلمَز. آما عیسا، پِطرُسا دئمهدی کی او شاگرد اؤلمَز، عیسا فقط دئدی: «اگر منیم سئدیگیم بو اولا کی منیم بؤکولمَکیمانچاز بو آدام دئرّی قالا، سَن نه ایش وارینگ؟»
آخیرکی سؤز
24او شاگرد ائله بو آدام دیر کی واری بو زادلارا گواهلیگ وئریر و بوللاری یازمیش. بیز بیلیرَک کی اؤنونگ گواهلیگی گرچَک دیر. 25عیسا چوخ آیری ایشلَر ده گؤردو کی اگر بیر بیر یازیلا ایدی، گمان ائدمئیرم کی بوتون دنیا دا او کتابلاری اؤز ایچینده یئر وئره بیلهایدی.
دیاریکراوەکانی ئێستا:
یوحنا 21: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company