اعمال 1
1
عیسانینگ گؤیه گئدمَکی
1عالیجناب تئوفیلوس، من اَوّلکی کتابیمی عیسانینگ واری عَمللَری و تَعلیملَری بارهسینده یازمیشام، ائله اوندادان کی اوللاری باشلادی 2تا او گؤنَنچاز کی تارئنینگ قُدّوس روحو طَریقیندن، اؤزو سَچدیگی حَواریلَره فرمانلار وئردی و اوندان سورا دا گؤیه آپاریلدی. 3عیسا اؤلوم زَجرینی چَکندَن سورا، اؤزونو حَواریلَره ظاهر ائدی و چوخ گواهلیگلار اینان ثابت ائدی کی دئرّیلمیش. عیسا قیرخ گؤن ایچینده اوللارا ظاهر اولیردی و تارئ پادشاهلیگی بارهسینده بئللری اینن دانیشیردی. 4اوندا کی عیسا حَلی بئللری اینن ایدی اوللارا اَمر ائدی کی اورشلیم شَهریندن چیخمهیلَّر، بلکی گؤیدهکی بووآ وئردیگی وَعدهنینگ یولونو گؤزلهیلَّر. عیسا بئللَرینه دئدی: «سیز مندَن ائشیتدینز؛ 5چونکی یحیا سو اینان تَعمید غُسلی وئریردی، آما نئچه گؤن چَکمَز کی سیز داها تارئنینگ قُدّوس روحو اینان تَعمید توتاراینز.»
6اوندا کی عیسا اینان حَواریلَر بیر بیر دئییرینه ییغیلمیشلَردی، اوللار عیسادان خبر آلدیلار: «یا رَب، ائله بو موقع دیر کی سَن پادشاهلیگی، تارئ خَلخینه بؤکَرَینگ؟»
7عیسا اوللارا دئدی: «لازم دهییل کی سیز، او وختلَر و زامانلاری کی گؤیدهکی بووآ اؤز اِقتداری اینان مَعین ائدمیش بیلَینز. 8آما اوندا کی تارئنینگ قُدّوس روحو سیزه گله، قوّت توتاراینز و اورشلیم شَهرینده، بوتون یهودیه ولایتینده، سامِره منطقهسینده و دنیانینگ ائنگ ایراق یئرلَرینانچاز مَنیم شاهدلَریم اولاراینز.» 9عیسا بو سؤزلری دئیَندن سورا، ائله بئله کی حَواریلار باخیرلاردی، اوخاری آپاریلدی و بیر بولوت عیسایی اوللارینگ گؤزو دَمیندن پناه ائدی. 10ائله بئله کی عیسا گؤیه گئدیردی و حَواریلار دا گؤیه گؤز تیکمیشلَردی، بیردن ایکّی آغ رَختلی کیشی اوللار یانینا توردولار 11و دئدیلر: «جَلیللی کیشیلَر، نه ایچی تورموشانز گؤیه باخیراینز؟ بو عیسا کی سیزینگ یانینزدان گؤیه آپاریلدی، ائله اولهیین کی گؤیه گئتدیگینی گؤردونز، گلَر.»
مَتّیاس، یَهودا اَسخریوط یئرینه سَچیلیر
12اوندان سورا حَواریلَر زیتون دئییلَن داغدان، اورشلیمه بؤکولدولر. زیتون داغی، اورشلیمه یاخین ایدی و او یول مُقدّس شنبه ایچی قرار وئریلَن اندازهدَن آرتیق دهییلدی. 13اوللار شَهره گلَنده، گئتدیلَر او بالاخانهیه کی اؤردا قالیرلاردی. او آداملار بوللار ایدیلار: پِطرُس و یوحَنّا، یَعقوب و آندریاس، فیلیپُس و توما، بَرتولْما و مَتّا، حَلْفای اوغلو یَعقوب، وَطنپرست شَمعون و یَعقوب اوغلو یَهودا. 14بوللارینگ واریسی، آروادلار اینان، عیسانینگ آناسی مریم اینن و عیسانینگ کاکالاری اینان، بئلینه اؤزلَرینی دُعایا وَقف ائدیرلَردی.
15او گؤنلَرده پِطرُس، توردو کاکالار آراسینا. او آداملارینگ سایقوشی یوز ایگیرمی نفره یاخین ایدی. پِطرُس بئللَرینه دئدی: 16«کاکالار، مُقدّس یازیلیدا یازیلان سؤز یئرینه ائتیشهسی ایدی. ائله او سؤز کی تارئنینگ قُدّوس روحو، داوود پادشاه دیلیندن یَهودا بارهسینده کی عیسایی توتانلارینگ یول گؤرسَدنی ایدی، ایلَری ایلَری دئمیشدی. 17بو سَبریه کی او بیزدن ساییلیردی و بو خدمتده سَهم واریدی.»
18یَهودا اؤز شَریرلیگینینگ پاداشی اینن بیر یئر آلدی و اؤردا باش اینن دوشدو یئره، بَدنی یاریلدی و ایچآلاتی بوتون یازّیا تؤکولدو. 19اورشلیمده زندلیگ ائدنلَرینگ واریسی بو دؤشَن تَفاقدان خبر اولدولار و او یئر اوستونه اؤز دیللَرینده ’حَقِلْدَما‘ آدی قؤیدولار، کی یعنی قان یئری.
20«زَبور کتابیندا یازیلمیش کی:
«”قؤی تا اؤنونگ مَنزلی خالی قالا
و قؤیما هئچکَس اؤردا مَنزل ائده،“
و یازیلمیش کی:
«”قؤی تا مَقامینی بیر آیری کَس اَله گتیره.“
21پس او کیشیلَرینگ بیری کی، واری او مُدّتده کی رَب عیسا بیزیم آرامیزا گلیردی و گئدیردی، همیشه بیزیم اینن ایمیش، بیزه قوشولاسی. 22یعنی ائله اوندادان کی یحیا، عیسایی تَعمید وئردی تا او گؤنانچاز کی عیسا بیزیم یانیمیزدان گؤیه آپاریلدی. بو آداملارینگ بیری بیزیم اینن عیسانینگ اؤلومدن دئرّیلمَکینینگ شاهدی اولاسی.»
23اوللار ایکّی آدامینگ آدینی دئدیلَر: بیری یوسف کی بَرسابا چاغیریلیردی و اؤنا یوستوس ده دئییرلَردی و او بیری دا مَتّیاس. 24اوللار دُعا ائدیلَر و دئدیلَر: «یا رَب، سن واری کَسینگ اؤرهکیندن آگاهانگ. سن بیزه گؤرسَد کی بو ایکّی آدامینگ هانی بیرینی سَچمیشَینگ 25تا او خدمتی و او رَسوللیگی کی یَهودا ویل ائدی و گئتدی او یئره کی اؤنا تعلّق واری، عُهدهیه آلا.» 26اوندا اوللار پؤشک آتدیلار و پؤشک مَتّیاس آدینا دؤشدو و مَتّیاس، او، اون بیر حَوارییه قوشولدو.
دیاریکراوەکانی ئێستا:
اعمال 1: QII
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
@ 2024 Korpu Company