1 थेस्लोनिकि 2
2
थेसलोनिकाता पावलको काम
1खान्धुराइ ओनेगेलाइ, नेलाइ दोफा केलाइको भेतेका फाइदा जेङका काथा नेलाइ ताइमिहेङ दोङ थाहा हि। 2केलाइ नेलाइकोता लोका खान्तेङ लाम्फा फिलिप्पि सहरता हेन्जाङ दुख निङचाका, कालाउ इन्ताको द्याङगेलाइ केलाइको आपामान पाका इदोइ गोताङ काथागेलाइ नेलाइ झाराङहेङ थाहा दोङ हि। कालाउ थिस्लोनिकि सहरको द्याङगेलाइ हेन्जा बिरोध पालाउ बुङ केलाइको परमेस्वर केलाइहेङ माअ्थिसिङ नेलाइहेङ इदोइ सुसमाचार प्राचार पालि साघाइका हिघाहि। 3हाइपालिपानु केलाइको उपदेस भुल माकुनु मारेम्का बिचारसो माको, ना ते इदोइ धाताइकासो। 4कालाउ परमेस्वर केलाइहेङ योग्य थानितेङ सुसमाचार हिङपालि जिम्मा पिहि, ओदोङ भाअ्सिङ केलाइ द्याङगेलाइहेङ लेङचापालि माको, भरु केलाइको ह्रदय जाचिका परमेस्वरहेङ लेङचापालि केलाइ उपदेस पिनाखे। 5नेलाइहेङ थाहा दोङ हि, कि केलाइ नेलाइ दोफा हेलाउ बुङ द्वालिघासि चेका काथा मापान्हाहि, ना ते ताका निङलिको भाअ्सिङ केलाइ इन्सिका पान्हाहि, हाइपालिपानु केलाइ चिचाहा मान्थुन्हाहि कालाउ याको साक्सि परमेस्वर दोङ हि। 6केलाइ ख्रिस्टको साल्न्हाका चात्या जेङका सामान्दाहोइ केलाइ बारका जेङका होक हिघाहि। कालाउ बुङ केलाइ नेलाइसो कालाउ आरु हिदोइ बुङ द्याङगेलाइसो आदार माभोकाङ। 7ताइको जामाललाइहेङ स्याहार पाका आमाइ भाइपा नेलाइको माझाता केलाइ मोनोइ जेङन्हाहि। 8केलाइ नेलाइहेङ हेन्जाङ मायारु पान्हाखे, ओदोङ भाअ्सिङ नेलाइ परमेस्वरको सुसमाचार खिनिङ माको। भरु केलाइ ताइको प्रानबुङ नेलाइहेङ पिलि भोघान्हाखे, हाइपालिपानु नेलाइ केलाइको आनाउ जेङका हिघासुखेना।
9हाइपालिपानु खान्धुराइ ओनेगेलाइ, नेलाइहेङ थाहा दोङ हि केलाइ नेलाइ दोफा हिलाउ केलाइ थाङका मेहेनत पातेङ ताका कामाइन्हाहि कालाउ परमेस्वरको सुसमाचार नेलाइता प्राचार पान्हाहि, कालाउकि केलाइ नेलाइ ह्रुता भार मापरियाको भरु ताइकोङ आवस्यकता पुरा पालि द्वाको।
10जेलाउ केलाइ नेलाइ खान्धुराइगेलाइ दोफा हिघानाहि केलाइको जिबन परमेस्वरहेङ मन परिका, आसल काम पालि कालाउ हासु बुङ मादुसि घानाहि। इदोइ काथाको नेलाइ कालाउ परमेस्वर ताइमिङ साक्सि हि। 11जेसाङ नेलाइहेङ थाहा दोङ हि, आबा ताइको जामाललाइ दोफा ब्यभार पाका भाइपाङ केलाइ नेलाइ दोफा ब्यभार पानाहि। 12केलाइ नेलाइहेङ हाउसाइ कालाउ सान्तावाना पिन्हाहि कालाउ बिन्ति पानाहि कि परमेस्वरहेङ मन परिका जिबन जियाइसु, जाइ नेलाइहेङ ताइको सासन कालाउ महिमाता काइयावा।
13ओदोङ भाअ्सिङ केलाइ बुङ परमेस्वरहेङ धन्यबाद पिनाखे, कि नेलाइ केलाइसो हिङका बचन जातिङकोङ परमेस्वरसो लोका बचन दोङ हि, इङको नेलाइ द्याङगेलाइसो लोका बचन भाइका माको, कालाउ परमेस्वरसो लोका बचन कोनिङ ग्रहन पासुन्हा, कालाउ इङको परमेस्वरको बचन एला नेलाइ ख्रिस्टता खाङधुरि पाकालाइता काम पातेङ हि। 14हाइपालिपानु खान्धुराइ ओनेगेलाइ, नेलाइ बुङ ख्रिस्ट येसुता यहुदिया जिल्लाता हिका परमेस्वरको मन्डलिगेलाइ भाइपाङ साताइन्हाका हिसुन्हा। हाइपालिपानु यहुदिया जिल्लाको मन्डलिगेलाइ ताइकोङ द्याङगेलाइसो दुख कस्ट भोगिहि, एन्साङ पातेङ नेलाइ ताइकोङ यहुदिगेलाइसो दुख कस्ट भोगेका हिघासुन्हा। 15उङको यहुदिगेलाइ दोङ प्रभु येसुहेङ कालाउ परमेस्वरको बक्तागेलाइहेङ सेअ्हि। कालाउ इम्बालाइ केलाइहेङ बुङ केलाइको सारभि लाअ्लि बाध्येता बानाइहि। कालाउ परमेस्वर इम्बालाइ दोफा खुसि मान्थुहि। कालाउ इम्बालाइ गोताङ द्याङगेलाइको बिरोध पाखे। 16इम्बालाइ केलाइहेङ गैर-यहुदिगेलाइ दोफा मुक्तिको काथा दोअ्लि मापिहि। एसापा इम्बालाइ पापता पाप रुमभाइतेङ हानिखे जेलाउ थेकापा परमेस्वर इम्बालाइहेङ आम्तिमता दन्ड माप्याङ। कालाउ न्हुसो पाक्का बुङ परमेस्वर इम्बालाइ दोफा चेर तामपाका हि कालाउ दन्ड पिलि लागाइका हि।
थेस्लोनिकिगेलाइहेङ भेतिलि पावलको इच्छा
17हाइपालिपानु ओइ खान्धुराइ ओनेगेलाइ, आतुइसा सोमोइको भाअ्सिङ केलाइ नेलाइसो लाअ्न्हाका हिघानाहि। कालाउ केलाइ मनसो माको कालाउ सारिरिक रुपसो नेलाइ दोफा मान्थुन्हाकानाङ बार्का इच्छाहोइ इम्बालाइहेङ ह्राइ-ह्राइ भेतिलि केलाइ कोसिस पानाखे। 18हाइपालिपानु केलाइ नेलाइकोता हेन्जाङखे लोलि भोन्हाहि, का पावल बुङ हेन्जाङखे लोलि भोघाखा, कालाउ एन्सा पालि साइतान केलाइहेङ जेलाउ बुङ बाधा पुगिपाहि। 19जेलाउ केलाइको प्रभु येसु ख्रिस्ट आरोङ लावा, इङको बेला वाको आगाता केलाइको आस, आनान्द माकुनु गर्वको मुकुट नेलाइ दोङ हिसुना। 20निसित केलाइको गौरव कालाउ आनान्द नेलाइ दोङ हिसुना।
دیاریکراوەکانی ئێستا:
1 थेस्लोनिकि 2: DHINT
بەرچاوکردن
لەبەرگرتنەوە
بەراوردکردن
هاوبەشی بکە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
Dhimal New Testament, by The Love Fellowship is licensed under Creative Commons Attribution-ShareAlike 4.0 License.