Mumpar 7
7
Nee waa sua la wa
1Korowii ŋɔ Nowa be ŋɔ, “He ne he bii ne he bii haahna bwa ka jo daka la bini. N nao kɛŋɔ harɛ nɔ ta, he ɡboo ɛ nɛn he wa aa toɡra. 2Kpɔ ola bwa soo siwi maa wola an kie bele anuanɛ, a bini bɛlbwa onnee ne bal kaa daka la bini, ásɛ ola bwa soo siwi maa kia ɡe bɛlbwa beŋkpoŋ, onnee ne ombal. 3Jumbii ɡe, he kpɔ bele anuanɛ, onnee ne ombal. N dɛ nyin kɛ he ɛ ɡɛ maa baɡla nɔ, ásɛ a bini bɛlbwa soo siwi mun bɛ he, dɛ́ won ya kerekere. 4Le fini dɛɛ kaa o yawanyoa, n dɛ ba ɡela bwaala nɛ kohona, waa ɡel bwa tɔpera fifraanaarɛ, dɛ́ chɔɡ komɛlbwa maa tao.” 5Asɛ Nowa ɡe no wobɛlbwa Korowii aa doo la bwa.
6Nowa bene lafraanumɛl taa a ɡɛ nee nɔ su dɛ chɔɡ harɛ nɔ la. 7O ne o haah ne o bii, ne o bii haahna bwaa kaa jo daka la bini, ásɛ nee la bɛ ban kpɔ kaa. 8Ola Korowii aa wola an kie ne anɔ la waa kia, ne jumbii ne kwaa aa dɛ tuuɡi tea ta ne anɔ la aa dɛ huuh, 9anneena ne ambala bwa ja Nowa nɛ dɛ jo daka la bini ɡɛ Korowii aa doo la. 10Tɔpera anuanɛ la habɔɔ la, nee la suu dɛ ba bɔle harɛ la bobɛlbwa.
11Nowa aa di bene lafraanumɛl korobinɛɛte ta, tɔpera fi dɛ anuanɛ la taa harɛ bobɛlbwa bule, asɛ nyundua pili dɛ nɛ bwaala kohona. 12Bwaala nɛo, waa ɡel bwa tɔpera fifraanaarɛ. 13Awola bwaala la aa pa mun laanee Nowa ne o haah ne ba bii batoro, Sɛm ne Ham ne Jafɛt dɛ ba ɡe haahna bwa ka jo daka la bini. 14Kpɔɡ bini ola bwa soo siwi ne kondɛɛra bwa, anjena ne anjeɡre, ne kwaa aa dɛ tuuɡi tea ta, ne anɔ la aa dɛ huuh, ne jumbii bwa soo siwii ba lawɛ do daka la bini. 15Korowii kontaala te bɛlbwa, anneena ne ambalaa ja Nowa nɛ dɛ jo daka la bini, 16ɡɛ Korowii aa do Nowa la. Asɛ Korowii laa doonyoa waa ŋɔa Nowa forɛ daka la ta la ɡbera laa tɔ o nɛ. 17Nee la aa sua tɔpera fifraanaarɛ la, o wono ɡɔɔ daka la asɛ o jaah. 18Waa baa su kohona la, bobɛlbwa baa do luŋri asɛ daka la won dɛɛ valɛ nee sie. 19O wono su dɛ bɔle bwejena aa lɔ harɛ nɔ ta bwa ta, 20O suu dɛ ka tel kɛ waa bɔle bwejena ta asɛ dɛ ɡwaala a ka tama á ɛ naɡale fifraanɛ dɛ atoro kwara. 21Korowii kontaala bwa, nɛwɛnyina ne ola, ne kwaa aa dɛ tuuɡi tea ta, ne anɔ la aa dɛ huuh, dɛ jumbii bwaa serewa. 22Nɛwɛnyina ne ola ne kwaa aa dɛ tuuɡi tea ta, ne anɔ la aa dɛ huuh, ne jumbii bwaa o chɔɡ kwara. Nemenɛ Nowa ne banla baa dɔ bɔr ja o nɛɛ dɛ jo daka la bini laanee baa ka. 23Korowii chɔɡ hweera kwaa bwa aa lɔ harɛ nɔ ta. 24Nee la suu dɛ dɔ tɔpera lafa fifraanue dɛ o ta kan ɡɛ.
دیاریکراوەکانی ئێستا:
Mumpar 7: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.