Mumpar 8
8
Nee la aa sua dɛ hweeh la habɔɔ
1Anɔ bwa habɔɔ la, Korowii ta Nowa ne kpɔɡ bini ola, ne kondɛɛra bwa aa ja o nɛɛ dɛ jo daka la bini la waa soɛh. O ɡelɔ peu ta asɛ nee la ɛɛ hweeh. 2Bobɛlbwa nee aa bula dɛɛ le harɛ bwa tɔɔɡɔ, asɛ nyundua bwa ɡe tɔɔɡe, bwaala ɡel nɛɛ. 3Nee la aa hweehra dɛ dɔ tɔpera lafa fifraanue la, dɛ o ba harɛ tama. 4Asɛ korobinuanɛ tɔpera fi dɛ anuanɛ ta la, daka la ka che Ararat Bwejen ta. 5Nee la hweehrɔ ɡɛ aaa, asɛ korobie fi tɔpere waa tɔ sie la ta la, dɛ o le bwejena dor asɛ baa naa.
6Tɔpera fifraanaarɛ aa baa kaa la, Nowa pili tokoro waa forɔ do daka la ta la, 7asɛ o ɡel ɡaahɡaah le dɛ kaa ɡaaɡe soŋnibɔr dɛ ka tel saŋ nee la aa baa hweeh kwaraa. 8Anee o ɡel kweah bɛl ɡe le dɛ́ la ka na dɛ nee la hweehrɔ harɛpɛɛ chɔ kɛɛ? 9Waa lea kaa la, o ta nakpatiɡri bɔr bobɛlbwa ka dɔe. Dɛ nee la ta bɔle harɛ bwa, asɛ o berɛ ba joŋi daka la ta, asɛ Nowa lawɔ do o be daka la bini. 10Aa baa dɔ tɔpera anuanɛ la, o berɔ tomɛ kweah la. 11Waa lea dɛ kaa la, o kaa ba jɔmɔra dɛ daa bɛl papo-lwɛɛ faɡɛ o nyoa kɛŋɔ som papoo ken. Belaa Nowa na kɛŋɔ nee la hweehrɔ tama dɛ le harɛ ta. 12A tɔpera anuanɛ ta la, o berɔ ɡel kweah le ja, asɛ waa kaala la, o ta o be balɛ kpa.
13Nowa aa baa dɔ bene lafraanumɛl dɛ beŋkpoŋ, korobie waa tɔ sie tɔpeloɡle ta la, dɛ nee la toole harɛ sie bobɛlbwa kpa. Belaa o pili komɛl waa tɔ daka la ta la. Waa nyiŋa na la, o nao kɛ nee la hweehrɔ. 14Korobinɛɛte tɔpera fifraanaarɛ dɛ anue ta la, dɛ harɛ ta bobɛlbwa hwaahrɔ.
15Ate, Korowii ŋɔ Nowa be ŋɔ, 16“Lawɛ he haah ne he bii, ne ba ɡe haahna le daka la bini. 17Lawɛ ol bɛlbwa, ne kwaa aa dɛ tuuɡi tea ta, ne anɔ la aa dɛ huuh, ne jumbii bwa soo siwi aa lɔ he be daka la bini la le, ásɛ a ya, dɛ́ warɛ su harɛ ta bwa.”
18Asɛ Nowa ne o haah ne o bii, ne ba ɡe haahna le daka la bini. 19Ola ne kwaa aa dɛ tuuɡi tea ta, ne anɔ la aa dɛ huuh, ne jumbii bwa aa dɛ le la, dɛ a bini bɛlbwa ne a soo siwii, asɛ a teŋɛ dɔŋa nɛɛ dɛɛ le.
Nowa fuh saraha jam Korowii
20Nowa pa bwea dawɛ dɔŋa nɛ, asɛ dɛ lawɛ ola ne jumbii Korowii aa ŋɔa bá di la bini beŋkpoŋa, dɛ kpoora dɛ fuah ɛ saraha kon la ta, dɛ kpɔ jam Korowii. 21Ola baa fuah la sɔɔh do Korowii som kohona asɛ o ŋɔ, “Nɛwɛnyini le o wechɔɡa ne o bechale saŋ, anomanta, maa nɛwɛnyina ne komɛlbwa maa taa chɔɡ ɡɛ maa tɔ sie chɔɡ bane la kpa.” 22Korowii berɔ ŋɔ,
“Harɛ ta aa lole nɔ,
ɡɛɛ kwaa dui ne a koma
ne bɔwɔb ne waa saŋ ɛɛ ba le doe,
ɡɛɛ bwaala ne lɔmɔɡa saŋ,
ne webaŋa ne jwaana bwa
ɛɛ ba le doe.”
دیاریکراوەکانی ئێستا:
Mumpar 8: mzw
بەرچاوکردن
هاوبەشی بکە
لەبەرگرتنەوە
دەتەوێت هایلایتەکانت بپارێزرێت لەناو ئامێرەکانتدا> ? داخڵ ببە
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.