मत्ती 4

शैतान यीशुए अज़माते।

(मरक. 1:12-13;लूक. 4:1-13)

1तैल्‍ला पत्ती, पवित्र आत्मा यीशु सुनसान ठैरी मां नियो, ताके शैतान तैसेरी अज़मैइश केरे। 240 दिहाड़े ते 40 रातन किछ न खानेरां पत्ती तैस ढ्लुख लग्गी। 3त तैखन शैताने ज़ैस जो अज़माने बालो भी ज़ोतन, तैस कां एइतां ज़ोवं, “अगर तू परमेशरेरू मट्ठू आस, त इन घोड़न जो हुक्म देइतां साबत केर, कि एना रोट्टी बन्न ताके तू खेइ सकस।” 4यीशुए तैस जुवाब दित्तो, “अवं न केरेलो किजोकि परमेशरेरी किताबी मां लिखेरूए,

‘मैन्हु सिर्फ रोट्टेइं सेइं ज़ींतो न राए,

बल्के तै हर गल मन्ने सेइं ज़ींतो राते, ज़ै परमेशर ज़ोते।’”

5फिरी शैताने तै पवित्र नगर यरूशलेमे मां नियो ते मन्दरेरी उच्‍ची छ़म्पी पुड़ नेइतां खड़ो कियो। 6तैखन तैनी यीशु सेइं ज़ोवं, “अगर तू हकीक्ति मां परमेशरेरू मट्ठू आस त इट्ठां बिछ़ड़तां साबत केर, किजोकि पवित्रशास्त्रे मां लिखेरूए, ‘तै तेरे लेई अपने स्वर्गदूतन हुक्म देलो, ते तैना तीं अपने हथ्थन मां ट्लाले, ताके तेरे पव्वन केन्ची घोड़न सेइं ठोकर न लग्गे।’” 7यीशुए तैस सेइं ज़ोवं, “(नईं, अवं छाल न मारेलो, किजोकि) परमेशरेरी किताबी मां एन भी लिखेरूए, ‘तू प्रभु अपने परमेशरे अज़मैइश इन साबत केरनेरी कोशिश न केर कि तै अपने वाधे पूरे केरते या नईं।’”

8तैखन शैताने, यीशु एक्‍की बड़े उच्‍चे पहाड़े पुड़ नियो, ते तैड़ी दुनियारां सारां राज़्ज़ां ते तैन केरि धन दौलत तैस हिराई। 9तैखन तैनी यीशु सेइं ज़ोवं, “अगर तू मीं कां मथ्थो टेकस ते मेरी आराधना केरस, त अवं इन सब किछ तीं देलो।” 10यीशुए तैस जो ज़ोवं, “हे शैतान! दूर भो, किजोकि परमेशरेरी किताबी मां लिखेरूए, ‘तू सिर्फ प्रभु अपने परमेशरे कां मथ्थो टेक ते तैसेरी आराधना केर!’” 11तैखन शैतान तैस करां च़लो जेव, ते अकदम किछ स्वर्गदूत यीशु कां एइतां तैसेरी सेवा केरने लग्गे।

यीशु लोकन परमेशरेरी खबर शुनानेरी सेवा शुरू केरते।

(मरक. 1:14-15;लूक. 4:14-15,31)

12एक्सां केन्चे यीशु जो ज़ोवं, कि यूहन्ना ज़ै बपतिस्मो देनेबालो थियो, कैद कियोरोए त यीशु यहूदिया इलाकेरां, गलील इलाके मां वापस अव। 13ते नासरत नगर शैरतां कफरनहूम नगरे मां राने लगो, ज़ैन समुन्दरेरे बन्ने पुड़ आहे, ज़ैड़ी जबूलून ते कने नप्ताली गोट्लेरे लोक रहते थिये। 14ताके तैन वचन ज़ैन यशायाह नेबे ज़ोवरू थियूं पूरू भोए, तैनी ज़ोवं,

15“ज़ैना लोक जबूलून ते नप्ताली गोत्रां केरे इलाके मां आन,

ज़ैना गलील समुन्दरेरे नेड़े यरदन दरियारे उस पार, गलील इलाके मां आन, ज़ैड़ी गैर यहूदी लोक भी रहतन,

16(तैना लोक) ज़ैना पापेरे आंधरे मां बिशोरेन, तैनेईं बड्डी लौ लाई। तै लौ तैन पुड़ चमकी ज़ैना हमेशारे मौतरे आंधरेरे मुल्खे मां बिशोरेन।”

17तेइसेरू देंतू यीशुए परमेशरेरी खबर लोकन प्रचार केरनेरी सेवा शुरू की। तैनी लोकन ज़ोवं, “अपने पापन करां मन फिराथ, किजोकि सुर्गेरू राज़ नेड़े एवरूए।”

यीशु मेछ़ली ट्लानेबालन अपने चेले बनानेरे लेई कुजाते।

(मरक. 1:16-20;लूक. 5:1-11;यूह. 1:35-42)

18एक्सां ज़ैखन यीशु गलील समुन्दरेरे बन्ने च़लोरो थियो, त तैनी दूई मैन्हु लाए ज़ैना मेछ़ली ट्लानेबाले थिये। तैना मेछ़ली ट्लानेरे लेई समुन्दरे मां ज़ाल छ़ेड्डी राओरे थिये। तैन मरां एक्‍केरू नवं शमौन, ज़ैस जो पतरस भी ज़ोतन, ते तैसेरो ढ्ला ज़ेसेरू नवं अन्द्रियास थियूं। 19यीशुए तैन सेइं ज़ोवं, “एज्जा मेरे चेले बना। अवं तुसन शिखालेलो कि केन्च़रां होरे मैन्हु मेरे चेले बनानेन।” 20तैना अकदम अपना ज़ालां छ़ेडतां यीशु पत्ती च़ले जे।

21ते तैना तैट्ठां थोड़े ज़ेरे अग्गर जे, त यीशुए होरे दूई ढ्ला, यानी याकूब त कने तैसेरो ढ्ला यूहन्ना अपने बाजी जब्दी सेइं साथी किश्ती मां लाहे। तैना किश्ती मां ज़ालां ठीक केरने लग्गोरे थिये। यीशुए तैना भी कुजाए (कि तैना तैसेरे चेले बन्न)। 22ते तैना भी तैखने किश्ती ते अपने बाजी तैड़ी ज़ेरे छ़ेडतां यीशु सेइं साथी च़ले जे।

यीशु परमेशरेरे राज़्ज़ेरे बारे मां लोकन शिक्षा देते ते बिमारन बज़्झ़ाते।

(लूक. 6:17-19)

23तैल्‍ला पत्ती, यीशु सारे गलील इलाके मां हंठतो फिरतो राव। तै तैन केरे प्राथना घरन मां लोकन शिक्षा देतो राव ते परमेशरेरे राज़्ज़ेरी खुशखबरी शुनातो राव। ते तै लोकां केरि हर किसमेरी बिमैरी ते कमज़ोरी दूर केरतो राव। 24यीशुएरे बारे मां ई खबर सारे सीरिया इलाके मां मुशूर भोइ जेई। एसेरे वजाई सेइं, ज़ैड़ी कोन्ची तै जेव, तैड़ी लोक सेब्भी बिमारन ज़ैना हर किसमेरी बिमैरी ते तकलीफन मां फसोरे थिये, ते ज़ैन लोकन पुड़ भूतां केरो सायो थियो, ते ज़ैना मिरगरे रोगी थिये, ते ज़ैना अधरंगेरे रोगी थिये, तैना यीशु कां आने ते यीशुए तैना सारे बज़्झ़ाए। 25एसेरे वजाई सेइं मैन्हु केरि बड़ी भीड़ यीशु पत्ती च़ली। तैना लोक गलील, दिकापुलिस#4:25 दिकापुलिस: इड़ी दिकापुलिसेरो मतलब दश नगर। इलाकां केरे, यरूशलेम नगरेरे, यहूदिया इलाकेरे, ते यरदन दरियारे पैरीं पारेरे इलाकां मरां एवरे थिये।

বর্তমানে নির্বাচিত:

मत्ती 4: BHDNT

হাইলাইট

তুলনা করুন

কপি