Aposol 12

A king e kato homir u kristen

1Nonei tara pöata teka e King Herot e kato homir a palair u katuun tere Iesu. 2Nonei e hangats hamateni e Jemis e toulana e Jon u kilatan hiatatung. 3A pöata te tareien u Jiu i ngil a ka teka, ba nonei e hapile kap has nena e Pita. (A manka teka e butuia tara pöata turu Paska turu Jiu, pöata tara Beret te möa ta Is.) 4Herot e hapile kapiin e Pita me hala mena neien tara karabus. Nori i hakeien i limana a tohats a hun soldia tegi tara kap naien. A man töa man hun soldia hoboto teka i ka mei a man tohats a man soldia ti roron tara kapiin e Pita. E Herot egami piou naien turu katuun i murina u Paska. 5Pöata te kaia e Pita tara karabus, u kristen i singo hatagala sileien tere Sunahan.

A angelo e halakasi e Pita tara karabus

6Tara bong i mamina u lan tega la uu e Pita turu kout, e Pita e opöia i gusuna a huol a soldia. Nori i kitseien a huol a tsien, na u soldia i tuol hasia tara tamana bate tara kap ner a luman karabus. 7Kaba a töa angelo tara Tsunono e butu, ba ka e alesalana iahana rum te kaia e Pita. Ba angelo ena guleiena e Pita me poeiena, “Takei boroboro.” Ba u tsien e tapurese ba nena a limana e Pita me rusuna. 8Ba angelo e ranga menen, “Hasogo u hasobö na u sendol i tamölö.” Be Pita e markato has uana temar ranga uaien. Ba angelo e ranga menen, “Hasogi u hasobö u ngahangaha i tuenrei mölö balö te kukutie mumou lia.” 9Be Pita e lakasana me kukutiena a angelo. Kaba nonei ema atei sile ii a ka te katoeia a angelo i tanen te mana uaien, turu hakats i tanen nonei e sinasoho. 10Pöata ti la karaseien a tson te tara kapiin a tamana tutuun na tson pepeito tara hahuoluna a tamana, ba nori ena butu ria tara tamana aien te lakasa uu tara taun. A tamana teka e takalata peisa beraien. Ba nori e lakasar ielesala me siler a töa maroro. Ba angelo e songots laba nena e Pita.

11Ba u hakats tere Pita e töan alesala poutsuna, ba nonei e poeiena, “Alia e atei hamana talagu, a Tsunono e hala nenama a angelo i tanen memi luba nena lia tara nitagala tere Herot na tara mamanaka ti katsin kato hasi a pala turu Jiu i tar.”

12A pöata te hakats sabe naia e Pita a ka teka ba nonei e la uana tara luma tere Maria, e tsinana e Jon a tana solo tanen e Mak. A katuun a para i gonoia tara luma teka bate singor. 13Be Pita emi porporokona tara tamana tara ololo ielesala tara luma, ba töa taholun kukui a solonen e Roda e la sile nama tegomi kalata menaien a tamana. 14Pöata te hengo mareien e Pita, ba torinen e sasaala koruna. Ba tahol e piata poutsuna iahana luma, nonei ema kalata bei e Pita a tamana! Ba nonei e hatei ranen, “E Pita e tuolna tara tamana!” 15Ba nori e poeier i tanen, “A baku mölö ema hakats haniga nei!” Kaba nonei e tagala koru be poeiena, “U mana koru!” Ba nori e poeier, “A angelo banei i tanen.”

16E Pita e porporoko noa hasia tara tamana, ba nori ena kalata taler a tamana me tarer e Pita, nori i asingoto koru. 17Be Pita e hasoa sei nena a limanen tegi kakamoto uaien. Ba nonei e hatei raneien ime temar halakasa mena meien a Tsunono tara luman karabus. Ba nonei e poeiena, “Alimiou ena hateie mou e Jemis na palair u kristen te butu ualala a ka teka.” Be Pita e laba ranen me la uana tara tana makum.

18Ba tara bongbong, ba u soldia e asingoto korur, me poeier, “Pua, e Pita e taia?” 19Pöata te lagi sakesakeia e Herot e Pita ba nonei e rangrangata raiena u soldia ti taratara kapiin e Pita, ba nonei e kitsena u ranga tegi atung hamate meraien.

Be Herot e laba nena i Judia me gala uana tara taun i Sisaria tena kaien.

A tou mate tere Herot

20Tara pöata teka e Herot a King e raharaha korur u katunur tara taun i Taia na i Saidon. Ba nori e gono hobotor me la mam uaier tere Blastus, a töa tson pepeito tere Herot. Nori i hamatskö gono mam mei e Blastus u ranga me töan la uaier tere Herot. Ba nori e rangata siler tegi hia taratara pouts gono meien e Herot. Taraha, u katunur tara han i taren i roron holeia a kannou turu katuun tere Herot.

21Be Herot e hopö kap nena u töa u lan, ba turu lan teka ba nonei e hasogeiena u hasobö u ngahangaha tara king, mena gumna turu gumgum u göagono, me katoena u ranga u ngahangaha i taren. 22Ba u katuun e ku hapanir me poeier, “Nonei ema mar ranga uanei tara katuun tuun! E möa. Nonei u ranga tara töa got!” 23E Herot ema solosei mamei e Sunahan, ba angelo tara Tsunono e atunge nen. U kakaminei i noueien, ba nonei e mate nitöana.

24Kaba u ranga tara Tsunono e butu hapan me tasata uana tara han a parpara.

25Ba tara pöata ti hakapeia ere Banabas mere Sol a toukui i taren i Jerusalem, ba nori e luer e Jon Mak, me la pouts gono merien i Antiok.

المحددات الحالية:

Aposol 12: HLA 2020

تمييز النص

نسخ