२ थेसालोनीकेपा 3
3
ॱमो़लाम श्यी़वा
1थामाला पी़न्दाक्याओ, खेक्याई खोक्दु चोवोगी का ख्याप्कीन च्योक्रे, ग्योवा दारये धाङ शीजे थोप्येला हीकी क्षीला ॱमो़लाम श्यी़रोझ्यी। 2धेनी याङ नाकसेम्चेन धाङ ङेनसेम्चेन मीक्याने, हेक्या डोयेला ॱमो़लाम श्यी़रोझ्यी घीझ्येरी ॱनाना मी घीरीगी धेपा मीझ्यीदालाक। 3हीना चोवो नी, ॱलो का थुप्कीनगी चोवो लाक। खोङबागी खेक्याला तेन्पो जेगीलाक धेनी ङेन्पाने ॱरुङा जेगीलाक। 4हीकी का तेरता च्योक्रे, खेक्या धान्दा झ्यीदीक धेनी श्युक थुक्पे झ्यीगीलाक ॱनेरी, हेक्याला चोवोने ॱलोते हो़क। 5को़न्क्षोकगी झाम्पा धाङ मास्यीकाला तेन्पो छाक्येला, चोवोगी खेक्याई सेमला गोठी ॱनाङास्योक।
घीरीगी लेगा झ्यीघो़गीन
6पी़न्दाक्याओ, लेमेलाम्गीन ख्याम्बोक्या धाङ हीकी तेरता ॱलापच्याक्याला ॱमीचीगीनक्यामुला मादेप, ॱनेरी हेक्या होरी चोवो येशु मास्यीकागी छेनला खेक्याला कुलाहीन। 7हीकी लेमो झ्यीघोगीलाक ॱनेरी, खेक्याला स्येये हो़तालाक। खीकीमुला हो़ती घाङला हेक्या लेमेलाम्गीन मेतो, 8धेनी रीङ माज्यावा हीकी सुने शामा माशे। हीना खेक्याला काल्ले मेयोङास्योक ॱनेरी, हेक्याई ङीन-छेन काल्ले ग्याप्ती लेगा झ्येवी। 9हेक्या हुरे झ्यी छोक्येला आङजा मेगीन मालाक हीना खेक्या हीकी लेमो झ्यीयेला पे तो़न्येला झ्येवी। 10खेक्यामुला हो़ती घाङला, हीकी खेक्याला देरे कुवी, “लेगा झ्यीङी मेदो़गीन मीगी शामा माशास्योक।” 11घीझ्येरी ॱनाना खेक्याने रीङगा लेगा मीझ्यीदा, श्येम्मागी लेगाला थेरु ग्युक्कीन लेमेलाम्गीन रे दुक ॱनेरी, हीकी घोजुङ। 12धा देरे मीक्याला स्यारी राङगी लेगा झ्यीये धाङ राङगी मीछेराङ क्यायेला, चोवो येशु मास्यीकागी छेनने हेक्या का तेराहीन धेनी सेमस्युक पाराहीन।
13पी़न्दाक्याओ, खेक्या शाङा झ्यीयेला थाङ ॱमाछे। 14सी़ च्यीकगी हीकी यीक देगी ॱलापच्याला दो़नाङ ॱमेतेरना, होदे मीला ङो स्येलाझ्यी धेनी खोला ङोछारु च्युक्येला खी़मुला ढेवा घीन्दा माझ्यी। 15घीहीन्ना खोला डा च्योक्रे ॱमीचीला, पी़न्दा चीरी खाता ॱलोप।
थामे ॱमो़लाम
16धा श्यीदेगी चोवो राङगी, खेक्याला धी़चो़ घीरी धाङ ॱनाछोक घीरीला श्यीदे ॱनाङास्योक। चोवो खेक्या घीरीमुला हुङास्योक।
17ङा पाउलु राङगी लाक्पागी छाम्डी दे ढीयाहीन। दे नी ङी ढीक्ताङ हीन। धेनी ङी यीक घीरीगी ताक देराङ हीन।
18होरी चोवो येशु मास्यीकागी थुक्जे, खे घीरीमुला हुङास्योक।
© 2023, Wycliffe Bible Translators, Inc. and Nepal Bible Society