ၼႂ်းထိူၼ်ႇ 34
34
ၶွပ်ႇၼမ်ႉလႅၼ်လိၼ်မိူင်းၶႃႇၼၢၼ်ႇ
1ထႃႇဝရႃႉၽြႃး သမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ။- 2မႂ်းသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ မိူဝ်ႈဢၼ်သူႁွတ်ႈထိုင်ၵႃႈၼႂ်းမိူင်းၶႃႇၼၢၼ်ႇၼၼ်ႉၸိုင်၊ ၶွပ်ႇၼမ်ႉလႅၼ်လိၼ်မိူင်း ဢၼ်သူလႆႈၶၢမ်ႇဢမူၺ်ႇဢၼ်ဝႃႈမိူင်းၶႃႇၼၢၼ်ႇ ၸွမ်းၵႃႈၼင်ႇဢၼ်လႅၼ်လိၼ်မၼ်းမီးဝႆႉၼၼ်ႉၸမ်ႉ၊- 3ၼႃႈတၢင်းၸၢၼ်းသူၼၼ်ႉ တၵ်းလႆႈဢဝ်ၵႃႈတီႈထိူၼ်ႇၸီႉၼႃႉ ၸွမ်းၵႃႈႁိမ်းမိူင်းဢေႇတုမ်ႇလႄႈ၊ ၶွပ်ႇၼမ်ႉလႅၼ်လိၼ်သူ ၽၢႆႇတၢင်းၸၢၼ်းၼၼ်ႉ တၵ်းလႆႈလုၵ်ႉသေၵႃႈတီႈပၢႆလႅမ်သုတ်းၼွင်ၼမ်ႉၵိူဝ်ၽၢႆႇဝၼ်းဢွၵ်ႇၼၼ်ႉၵႂႃႇဢေႃႈ။- 4ၶွပ်ႇၼမ်ႉလႅၼ်လိၼ်ၼၼ်ႉ၊ တၵ်းလႆႈလဵပ်ႈၵႃႈတီႈၼႃႈတၢင်းၸၢၼ်း ၵုင်းဢႃႇၵႃႇရပ်ႉပိမ်းလႄႈ တႆႇၸွမ်းၸူးၵႃႈတီႈထိူၼ်ႇၸီႉၼႃႉဢေႃႈ။ သမ်ႉဢဝ်ၵႃႈတီႈၼၼ်ႈလႄႈ တိူၵ်ႈႁွတ်ႈၵႃႈတီႈၽၢႆႇတၢင်းၸၢၼ်း ဝၢၼ်ႈၵႃႇတေႇသပႃႇၼႃႇလႄႈ သမ်ႉၵႂႃႇၵႃႈတီႈဝၢၼ်ႈ ႁႃႇၸႃႇရုတ်ႉတႃႉ၊ သမ်ႉတႆႇၸွမ်းၸူးၵႃႈတီႈဢႃႇၸမုၼ်ႇသေလႄႈ။- 5ၶွပ်ႇၼမ်ႉလႅၼ်လိၼ်ၼၼ်ႉ သမ်ႉတၵ်းလႆႈဢဝ်ၵႃႈတီႈဝၢၼ်ႈ ဢႃႇၸမုၼ်ႇၼၼ်ႉ ငႅၵ်းၵႂႃႇၸူးၵႃႈတီႈၼမ်ႉႁွင်ႈဢေႇၵိပ်ႉတူႉလႄႈ တီႈသုတ်းတီႈတိူၵ်ႈမၼ်း မီးၵႃႈတီႈပၢင်ႇလၢႆႇဢေႃႈ။- 6ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းၼၼ်ႉ တၵ်းလႆႈပဵၼ်ပၢင်ႇလၢႆႇလူင်၊ တင်းၽင်ႇမၼ်းလိၼ်မၼ်းဢေႃႈ။ ဢၼ်ၼၼ်ႉတၵ်းလႆႈပဵၼ် ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းသူၼၼ်ႉဢေႃႈ။
7ဢၼ်တၵ်းလႆႈပဵၼ် ၶွပ်ႇၼမ်ႉလႅၼ်လိၼ်သူၽၢႆႇတၢင်းႁွင်ႇၼၼ်ႉၸမ်ႉ၊ သူတၵ်းလႆႈဢဝ်ၵႃႈတီႈပၢင်ႇလၢႆႇလူင်တေႃႇလွႆႁေႃးရႃႉလႄႈ၊- 8ဢဝ်ၵႃႈတီႈလွႆႁေႃးရႃႉၼၼ်ႉတေႃႇသူပ်းသဵၼ်ႈတၢင်းႁႃႇမတ်ႉသေယဝ်ႉ၊ ၶွပ်ႇၼမ်ႉလႅၼ်လိၼ်ၼၼ်ႉ တၵ်းလႆႈသမ်ႉၵႂႃႇၵႃႈတီႈၸေႇတတ်ႉသေလႄႈ၊- 9ၶွပ်ႇၼမ်ႉလႅၼ်လိၼ်ၼၼ်ႉ တၵ်းလႆႈၵႂႃႇၸူးၵႃႈတီႈ ၸီႉပြုၼ်ႇလႄႈ၊ သုတ်းသဵင်ႈၵႃႈတီႈဝၢၼ်ႈႁႃႇၸႃႇရေးၼၼ်ႇဢေႃႈ။ ဢၼ်ၼၼ်ႉတၵ်းလႆႈပဵၼ် ၶွပ်ႇၼမ်ႉလႅၼ်လိၼ်ၽၢႆႇတၢင်းႁွင်ႇသူၼၼ်ႉဢေႃႈ။
10ၶွပ်ႇၼမ်ႉလႅၼ်လိၼ်သူ ၽၢႆႇတၢင်းဢွၵ်ႇၼၼ်ႉၸမ်ႉ၊ သူတၵ်းလႆႈဢဝ်ၵႃႈတီႈဝၢၼ်ႈႁႃႇၸႃႇရေးၼၼ်ႇ တေႃႇဝၢၼ်ႈသေးၽမ်ႇလႄႈ၊- 11ဢၼ်ၶႅၼ်ႈဢၼ်ၶၼ်ႈၼၼ်ႉ တၵ်းလႆႈလုၵ်ႉသေၵႃႈတီႈဝၢၼ်ႈသေးၽမ်ႇၼၼ်ႉ ၸွမ်းၵႃႈတီႈၽၢႆႇဝၼ်းဢွၵ်ႇဝၢၼ်ႈဢႃႇဢီႉၼႃႉလႄႈ လူင်းၵႂႃႇႁွတ်ႈထိုင်ဝၢၼ်ႈ ရီႉပလႃႉဢေႃႈ။ ၶွပ်ႇၼမ်ႉလႅၼ်လိၼ်ၼၼ်ႉ တၵ်းလႆႈသမ်ႉလုၵ်ႉသေၵႃႈတီႈဝၢၼ်ႈၼၼ်ႉလူင်းၵႂႃႇလႄႈ ႁွတ်ႈထိုင်ၸဵင်ႇၼွင်ၵိၼ်ႇၼီႇသရႅတ်ႉ ၽၢႆႇဝၼ်းဢွၵ်ႇၼၼ်ႉသေယဝ်ႉ။- 12ၶွပ်ႇၼမ်ႉလႅၼ်လိၼ်ၼၼ်ႉ တၵ်းလႆႈသမ်ႉၸွမ်းၼမ်ႉႁွင်ႈယေႃးတၢၼ်ႇၵႂႃႇလႄႈ သုတ်းသဵင်ႈၵႃႈတီႈ ၼွင်ၼမ်ႉၵိူဝ်ဢေႃႈ။ ဢၼ်ၼႆႉၸမ်ႉတၵ်းလႆႈပဵၼ်မိူင်းဢၼ်သူပိူင်ႇၼၼ်ႉ ၸွမ်းလူၺ်ႈၶွပ်ႇၼမ်ႉလႅၼ်လိၼ်မၼ်း ဢၼ်လဵပ်ႈၸွမ်းႁိမ်းမၼ်းၸိူဝ်းၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။
13 မူဝ်းသေႇသင်ႇလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ ဢၼ်ၼႆႉၸမ်ႉ၊ ပဵၼ်မိူင်းဢၼ်သူတၵ်းလႆႈတူၵ်းၸႃႇၵွၵ်ႈသေလႄႈ ၶၢမ်ႇဢမူၺ်ႇ၊ မိူင်းဢၼ်ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈၽႄမႅင်ႇပၼ်တီႈမဵဝ်းၵဝ်ႈမဵဝ်း ဢိၵ်ႇတင်းမဵဝ်းၶိုင်ႈၼိုင်ႈၼၼ်ႉဢေႃႈ။- 14ၵူၼ်းမဵဝ်းရူႉပိၼ်ႇတင်းလၢႆ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်၊ ၵူၼ်းမဵဝ်းၵၢတ်ႉတင်းလၢႆ ၸွမ်းလူၺ်ႈမဵဝ်းပူႇမဵဝ်းပေႃႈၶဝ်ၸိူဝ်းၼၼ်ႉၸမ်ႉ၊ လႆႈၶၢမ်ႇဢဝ်ဢမူၺ်ႇၶဝ်ယဝ်ႉ၊ ၵူၼ်းမဵဝ်းမၼႃႇသေႇၶိုင်ႈၼိုင်ႈတင်းလၢႆၵေႃႈ လႆႈၶၢမ်ႇဢဝ်ဢမူၺ်ႇၶဝ်ယဝ်ႉ။- 15မဵဝ်းသွင်မဵဝ်းပၢႆၶိုင်ႈမဵဝ်းၼိုင်ႈၸိူဝ်းၼၼ်ႉ၊ လႆႈၶၢမ်ႇဢဝ်ဢမူၺ်ႇၶဝ် ၽၢႆႇပုၼ်ႉၼမ်ႉႁွင်ႈယေႃးတၢၼ်ႇ၊ သိုဝ်ႈဝဵင်းယေႇရီႉၶူဝ်း ၼႃႈဝၼ်းဢွၵ်ႇၽၢႆႇဢၼ်ၵၢင်ဝၼ်းဢွၵ်ႇၼၼ်ႉယဝ်ႉ၊ ဝႃႈၼင်ႇၼႆဢေႃႈ။
ၽူႈဢွၼ်ႁူဝ်ၸွႆႈၵၼ်ၽႄမႅင်ႇလိၼ်မိူင်း
16ထႃႇဝရႃႉၽြႃး သမ်ႉမီးဢမိင်ႉတီႈမူဝ်းသေႇလႄႈဝႃႈၸမ်ႉ၊- 17ၸိုဝ်ႈသဵင်ၵူၼ်းၸိူဝ်းဢၼ် တၵ်းလႆႈဢဝ်မိူင်းၼၼ်ႉ ၽႄမႅင်ႇတီႈသူၼၼ်ႉၸမ်ႉ၊ ပဵၼ်ယိတ်ႈပရေႃးႁဵၵ်ႈဢေးလႃႇၸႃႇ ဢိၵ်ႇတင်းယေႃးသူႉလုၵ်ႈၸၢႆးၼုၼ်ႇဢေႃႈ။- 18လိူဝ်သေၼၼ်ႉ သူတၵ်းလႆႈလိူၵ်ႈၵဵပ်းဢဝ်ၵႃႈၼႂ်းယေႈမဵဝ်းယေႈၵေႃႉ ႁႂ်ႈလႆႈႁဵတ်းတၢင်းဢၼ်ဢဝ်မိူင်း ၽႄမႅင်ႇပၼ်ၼၼ်ႉဢေႃႈ။- 19ၸိုဝ်ႈသဵင်ၵူၼ်းၸိူဝ်းၼၼ်ႉၸမ်ႉ၊ ၵႃႈၼႂ်းၵူၼ်းမဵဝ်းယူႉတႃႉ၊ ၵႃႇလႅပ်ႉ လုၵ်ႈၸၢႆးယေႇၽုၼ်ႇၼႃႉ၊- 20ၵႃႈၼႂ်းၵူၼ်းမဵဝ်းသီႉမုၼ်ႇ၊ သေႇမူၺ်ႇလႃႉ လုၵ်ႈၸၢႆးဢမီႉႁုတ်ႉ၊- 21ၵႃႈၼႂ်းၵူၼ်းမဵဝ်းပိၼ်ႇယႃႇမိၼ်ႇ၊ ဢေးလီႉတတ်ႉ လုၵ်ႈၸၢႆးၶီႉသလုၼ်ႇ၊- 22ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းတၢၼ်ႇ၊ ယေႃႇၵလီႉ လုၵ်ႈၸၢႆးပုၵ်ႉၵီႉ၊- 23ၵႃႈၼႂ်းလုၵ်ႈၸၢႆးယူဝ်းသႅပ်ႈၸိူဝ်းၼၼ်ႉ၊ ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းမၼႃႇသေႇ၊ ႁၢၼ်ႇယေႇလႃႉ လုၵ်ႈၸၢႆး ဢေႇၽုတ်ႉ၊- 24ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းဢေႇၽရိမ်ႇ၊ ၵေႇမူၺ်ႇလႃႉ လုၵ်ႈၸၢႆးသီႉၽတၼ်ႇ၊- 25ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းၸေႇပူႉလုၼ်ႇ၊ ဢေးလီႉၸႃႇၽၢၼ်ႇ လုၵ်ႈၸၢႆးပႃႇၼၵ်ႉ၊- 26ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းဢီႉသၶႃႇ၊ ပႃႇလႃႉတေးလႃႉ လုၵ်ႈၸၢႆးဢႃႇၸၼ်ႇ၊- 27ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းဢႃႇသႃႇ၊ ဢႁီႉႁုတ်ႉ လုၵ်ႈၸၢႆးသေႇလေႃႇမီႉ၊- 28ၵေႃႉဢၼ်ပဵၼ်ၶုၼ်ၵႃႈၼႂ်းၵူၼ်းမဵဝ်းၼပ်ႉထလီႉ၊ ပေးတႃႇႁေးလႃႉ လုၵ်ႈၸၢႆးဢမီႉႁုတ်ႉဢေႃႈ။- 29ၶဝ်ၸိူဝ်းၼႆႉပဵၼ်ၵေႃႉဢၼ် ထႃႇဝရႃႉၽြႃးသင်ႇလၢတ်ႈဝႆႉ ႁႂ်ႈလႆႈၽႄလိၼ်ဢမူၺ်ႇၼၼ်ႉမႅင်ႇပၼ် တီႈၵူၼ်းမဵဝ်းဢီႉသရေႇလႃႉတင်းလၢႆ ၵႃႈၼႂ်းမိူင်းၶႃႇၼၢၼ်ႇၼၼ်ႉဢေႃႈ။
Copyright © 2021 by OMF International, Shan Baptist Churches Fellowship