Abixalomu a hlangana ni malandza ya Davhida, kambe Abixalomu a a khandziyile mula, kutani mula yi nghena emarhavini lama hlanganeke ngopfu ya nkuhlu lowukulu, kutani nhloko ya Abixalomu yi phasiwa enkuhlwini, a sala a hayekiwa exikarhi ka tilo ni misava, yona mula leyi ngi yi ri hansi ka yena, yi hundzela emahlweni. Wanuna un'wana a n'wi vona, kutani a ya byela Yowabu, a ku: “Waswivo, ndzi vonile Abixalomu a hayekiwe enkuhlwini.”