آيات مشهورة من الكتاب المقدس منМатфей 24

شارك

Пасалъи цӀикӀкӀиндал, гӀемерисезул рокьи ссун ина. Амма ахиралде щвезегӀан сабру гӀурав чи хвасарлъила.

Ва ПарччахӀлъиялъул хӀакъалъулъ гьаб Рохалил хабар тӀолабго дуниялалдаго лъазабила, киналго халкъазе нугӀлъун букӀине. Гьебмехалъин ахир букӀунеб.

Рагъал ккун ругилан ва ккезехъинги ругилан рагӀизе буго нужеда. Воре, нуж хӀинкъуге гьелдаса. Гьеб цебеккунго лъугьине ккола, ва гьеб жеги ахирзаман гуро.

Цо халкъ цоги халкъалде, цо ханлъи цоги ханлъиялде тӀаде кӀанцӀила. БакӀ-бакӀалда ракъи баккила, ракь багъарила. Гьеб кинабго ккола лъимер гьабизе хӀара чӀваялъул гӀадинаб унтиялъул байбихьи.

Зобалги ракьалги тӀагӀаниги, дир рагӀаби нахъе хутӀизе руго.

Чанги вукӀине вугелъулха жив МасихӀ вугилан вачӀунев чи. Чангиял гьез къосинаризеги руго.

Гьебмехалъ нуж рачина гӀазаб-гӀакъуба кьезе ва чӀвазе. Дун сабаблъун тӀолабго гӀаламалда рихина нуж. Гьебмехалъ гӀемерисел гӀадамал къосина, цоцазе хилиплъила, цоцазда рихина. ГӀемерал гьересиаварагзаби рахъина, гьез гӀемерисел къосинарила.

ГӀисаца абуна: – Воре, цо лъицаниги къосинаризе гурин нуж!

Гьединлъидал нужги хӀадурго рукӀа, ракӀалдаго гьечӀеб заманаялъ вачӀине вугелъул нужехъе ГӀадамил Лъимер.

Гьединлъидал нуж рорчӀуда чӀа, нужеда лъаларелъул нужер ТӀадегӀанав кида вачӀиневали.

Амма цониги инсанасда лъаларо гьеб къо, гьеб сагӀат кида тӀаде щвезе бугебали. Я зобалазул малаикзабазда лъаларо, я Васасда лъаларо, гьеб лъала гӀицӀго Инсуда.

Щаян абуни, гӀемер рукӀине руго гьебмехалъ гьересимасихӀалги гьересиаварагзабиги. Чанги кӀуди-кӀудиял гӀаламатал ва мугӀжизатал рихьизарила гьез, бажарани, тӀаса рищарал муъминзабигицин къосинаризе бокьун.

НухӀ аварагасул заманаялда букӀараб гӀадин букӀине буго ГӀадамил Лъимер вачӀараб мехалъги. ТӀупан тӀелалде, кваналел-гьекъолел, лъудби рачунел, россабазе унел рукӀана дол къоязда гӀадамал, НухӀ гамида жаниве лъугьинегӀан. ТӀупан тӀун, гьелъ росун инегӀан, щибниги лъалеб жо букӀинчӀо гьезда. Гьедин букӀина ГӀадамил Лъимер вачӀиндалги.