آيات مشهورة من الكتاب المقدس منРим 1

شارك

Узуз Агъайин Ужувлан хабар рабгъуз нач дарзуз, гьаз гъапиш дидиъ гьарсар хъугъру кас уьрхюз шлу Аллагьдин гьюкум а – сифте жугьдар, ва хъасин имбу халкьар.

Му Ужувлан хабарну, Аллагьди хъугъувалилантина, сифте бинайиан ккудубкӀайизкьан, адмийирикан фици дугъри касар ктауруш, улупура. Гирами китабариъ дибикӀна: «Дугъри касдиз хъугъвали уьмур тувди».

Дюнʼя арайиз гъабхихъанмина дярябкъру гьаммишандин кьувват ва Аллагьдин заанвал ачухъди аьгъю шула, фицики гьаму вари Аллагьди халкь гъапӀубдиинди рябкъюра. Гьаддиз, гьацдар адмийирилан хил алдабгъуб хьибдар.

Дурариз Аллагь аьгъяйишра, дурари хай шлуси Дугъаз гьюрмат гъапӀундайи. Мидин ерина, дурар чпин файдасуз фикрар-фагьмариъ ахъну, ва дурарин ахмакь юкӀвар кӀару гъахьну.

Дурари Аллагьдикан вуйи гьякьвал кучӀларихъ гьюдюхнийи; хилари гъапӀу шейʼариз икрам апӀуйи, гьадрарин гъуллугънаъ шуйи, хъа халкь ГъапӀурин, гьаммишандиз ужувлиинди Айирин – ваъ. Амин.

Гьякьвал чпин нягьякьвалихьди ккапӀрайи адмийири апӀру вари чӀурубдиз ва гьякьсузвализ аьршариан Аллагьдин хъял гъюру.

Гьамцдар апӀруган, Аллагьди дурар чпин аьйибнан тямягьяриъ гъитнийи. Дишагьлийири жиларихъди духьну ккунивал, табиаьтдиз къаршуди, дишагьлийирихъди сатӀи хьувалихъ гьюдюхнийи. Гьаци жиларра, табиаьтдиинди дишагьлийирихъди сатӀи духьну ккунивал гъибтну, табиаьтдиз къаршуди, чиб-чпихъди сатӀи хьувалин тямягьяриъ ахъна. Дурари чпин жанар, жара жиларихъди сатӀи шули, аьйибнан тӀулар апӀури, гьацдар аьйиб ляхнар апӀбиинди, лайикьлу вуйи жазайикк ккирчра. Дурариз Аллагь аьгъю апӀуз даккниган, Дугъу дурарихьди чпин дюз дару фагьмин лайикьсуз тӀулар апӀуз гъитнийи.

Чпи фагьумлу ксар вуча кӀурашра, дурар ахмакьар гъахьну. Дурари аьжалсуз Аллагьдин ад, аьжал хъайи адмийирин, жакьварин, гьяйванатарин, улчвухури гъягъру гьяшаратарин идоларихъ гьюдюхну.