The Colloquial Galilean Bible (CGB) is an easy Bible to understand, particularly for children and youth. It is free in audio, video, and text. For free access or to support our ministry, contact us at www.aibible.org.
الكتاب المقدس (العهد الجديد) باللهجة العامية الجليلية هو كتاب سهل الفهم خاصة للأطفال والشباب. ونصوصه متوفرة مجانا في صيغ صوتية ومرئية ونصية. للحصول على هذه النصوص أو لدعم خدمتنا، الرجاء زيارة موقعنا على العنوان التالي:
www.aibible.org

ترجمة الكتاب المقدس باللهجة العامية الجليلية

أعطى يسوع تعليماتو لتلاميذو ال 12 وبعدين راح للمدن القريبة عشان يوعظ ويعلم فيها.
يوحنا كان في الحبس ولـما سمع عن أعمال الـمسيح بعت تلاميذو لعند المسيح عشان يسألوه: أنت اللي منستناه وِاللا في حدا تاني؟ جاوبهن يسوع وقالهن: روحو وقولو ليوحنا عن اللي سمعتوه وشفتوه: العميان صاروا يشوفو والعرج بيمشو والطُرش بيسمعو والبـرص شفيو من النجاسة وقامو الأموات والفقرا سمعوا الأخبار الحلوة ونيالو الإنسان اللي بتمسك فيّ. وبعد ما تركوا تلاميذ يوحنا قال يسوع للناس عن يوحنا: شو طلعتو تشوفو في البرية؟ أكيد مش قصبة بهزها الهوا؟ طيب مين طلعتو تشوفو؟ طلعتو تشوفو إنسان لابس أحلى الأواعي؟ الناس اللي بتلبس أحلى الأواعي قاعدة في قصور الملوك! فشو طلعتو تشوفو؟ نبي؟ بأكدلكو أنو هو نبي وأكثـر من هيك. هو الشخص اللي انكتب عنو: "هياني أنا راح ابعت رسولي قبلك عشان يحضرلك الطريق" عنجد بقولكو: يوحنا المعمدان أهم من كل اللي قبلو بس أصغر واحد في ملكوت السموات أهم منو. من وقت خدمة يوحنا الـمعمدان لحد إسه بيتقدم ملكوت الله بقوة والـمستبدين بعارضو بعنف. لأنو تنبأت التوراة والأنبيا لحد ما ظهر يوحنا وإذا انتو مستعدين تصدقوني: يوحنا هو إيليا اللي منستناه. اسمعو منيح وافهمو شو بقولكو. بشو أشبه هذا الجيل؟ بيشبهو ولاد قاعدين في الاسواق بنادوا عصحابهن وبقولو: "زمرنالكو ومرقصتشوش وندبنالكو وما بكيتوش" يوحنا بصوم عن الأكل وبشربش كحول فقلتو فيه شيطان وابن الإنسان بشرب وبوكل فقلتو: طلعو هذا واحد فجعان وشريب نبيذ وصحابو الزعران والخونة اللي بيجمعو الضرايب. وتبرهنت الحكمة بالنتائج.
وفي هداك الوقت بدي يسوع يأنّب المدن اللي بعد ما شافت أكبر عدد من عجايبو ما تابتش. وقال: يا ويلك يا كورزين ويا ويلك يا بيت صيدا! لو الأعمال العظيمة اللي انعملت فيكي انعملت في صور وصيدا لكان أهلها تابو من زمان ولبسوا الخيش وحطوا الرماد ع روسهن. وبقولكو أنو في يوم الحساب راح تكون حالة صور وصيدا أحسن منكو وأنتِ يا كفرناحوم ليش رافعه مناخريك في السما؟ فراح تهبطي لجهنم. لو الأعمال العظيمة اللي انعملت قدامك انعملت في سدوم لكان بقيت لليوم. بس بقولكو إنو وضع سدوم راح يكون أحسن منكو يوم الحساب.
وبعد ما خلص يسوع صلى وقال: "بشكرك أيها الآب، يا رب السما والأرض، لأنك خبيت الإعلان عن الحكما والفهما وكشفته للبسطا. نعم أيها الآب فهذي إرادتك" أبوي مصدر كل اللي عندي وفش حدا بيعرف الابن إلا الآب وفش حدا بيعرف الآب إلا الابن واللي بدو الابن يكشفلهن يا اللي تعبانين وحملهن تقيل تعالو لعندي وأنا بريحكو اخضعولي وكونو تلاميذي عشان ترتاحو لأني لطيف وقلبي متواضع الخضوع إلي سهل والأحمال اللي بعطيها خفيفة.

استمع إلى متى 11