Mat 10
10
1Kəni ramaunin tahan nərəmim kətilɨm-kətilɨm-mɨkiu (12) kamarva ton, mofən nɨsanənan kəm ilar to nanɨmɨn tat min məma takhailiatɨv ilar, ne to nol-ɨvtan nərəmim lə nɨtətan min ne lə nɨmɨsan min.
2In ɨk nətɨgɨ aposɨl min kətilɨm-kətilɨm-mɨkiu (12). Paupan Saemon, iərəm kamɨni mə Pita, ne norhɨn Antɨru, ne Jemɨs nərɨ Sepeti, ne norhɨn Jon,
3ne Filɨp, ne Patolomiu, ne Tomas, ne Matiu iərəmim taha nosan takɨs, ne Jemɨs nərɨ Alfias, ne Lepeas nətɨgɨn ker mɨn Tateas,
4ne Saemon kamɨni mə iərəmim taha pati taha nosithean namin Rom, ne Jutas Iskariot iərəm in ramɨvrai Iesu oatisɨg.
Iesu ramhalipən nərəmim kətilɨm-kətilɨm-mɨkiu tahan məma takaivsitoin nakharan ɨvt
(Mak 6:7-13; Luk 9:1-6)
5Iesu ramhalipən ilar min an kətilɨm-kətilɨm-mɨkiu (12) mamɨnipən to ilar, “Tɨnɨsarɨnan ikɨn min ima napinəp min, mɨsarɨnan ima lauanu min taha namin Sameria,
6“mɨro tɨnakarɨn am to sipsip min iərəm kamalue, lə nɨpsen taha Isrel.
7“Nian tɨnakarɨn, tɨnakaivsitoin nakharan ɨvt, mani məma, ‘Niko lə neai rɨnva iwəkɨt.’
8“Tɨnakarol ɨvt nərəmim lə nɨmɨsan thɨnilar, marol ɨvt nərəmim leprosi ramol ilar, marosit nərəmim kɨnarɨmɨs, mhailiatɨv nanɨmɨn tat min. Nɨsanənan ɨk namaros lə navre-aman. Pəs tɨnakarofən kəm nərəmim lə navre-aman mɨn.
9“Tɨnɨsarosan kol mani o selva mani o pras mani ker lə paus thəmiar.
10 #
1 Kor 9:14; 1 Tim 5:18 “Lə naliwəkan thəmiar tɨnɨsalulan kərɨm, mɨsarosan napən owau ker, o santel, o kasɨkɨn. Mɨro-in-ka rətuatu məma takaugɨn nərəm kamaisɨm.
11“Pətɨvɨn ikɨn nakamarɨn ikɨn, takəma lauanu asul o lauanu ɨsuas, tɨnakaitkoin iərəmim ɨvt ker ikɨn an, mamairɨk iman ikɨn meiroatɨs tɨnɨpariər mɨn.
12 “Kəni nian namarɨn ima lə nima ker, pəs tɨnəkani nɨvɨtan to ilar.
13“Takəma nərəmim min lə nima an keituatu məma takaros, pəs nɨmɨlinuan thəmiar tɨrarɨk to ilar. Mɨro takəma kɨseituatuan məma takaros, pəs nɨmɨlinuan thəmiar tɨrləlɨg to kamiar.
14 #
Apsl 13:51
“Kəni takəma nərəmim kɨsariran kamiar lə nagiənan, mɨsaitəlɨganin nakharan thəmiar, nian namariər lə nima an o lauanu an, tɨnakhaipəl ətagətag nɨmoulul lə nəlɨkɨmiar.
15 #
Mat 11:24;
Jen 19:24-28
#
Luk 10:4-12
“Nɨpərhienan iakamɨni to kamiar, lə nian taha nuhuapreian tɨrɨvɨt ɨpɨk to Sotom ne Komora rapitha lauanu an.
Nətakɨnan ripɨr takarakeike marva
(Mak 13:9-13; Luk 21:12-17)
16 #
Luk 10:3
“Aip ru, iakamhaliatɨv kamiar tɨnakaivkɨrin sipsip min lənki kuri iatipɨn min. To nar ka, pəs tɨnakarinərɨk kəma snek min, mamailiwək mərɨk kəma iouin min.
17 #
Mak 13:9-11; Luk 12:11,12; 21:12-15 “Mɨro aip ɨvt kamiar to nərəmim min, mɨro-in-ka ilar takarviatɨv kamiar lə nakharan min, mamailis-ailis kamiar ima lə nimeihuak min thɨnilar.
18“Kəni to nətɨgok takir kamiar lə nɨmrɨ kafman min ne nərəmɨra min, məma tɨnakaniatɨv nakharan tahak lə nɨmrɨnilar ne lə nɨmrɨ napinəp min.
19“Mɨro nian kamarir kamiar mealan, tɨnɨsarolan tɨpɨl lə nɨkimiar məma tɨnakɨtueikhar o mamani nəta. Mɨro-in-ka lə nian an tɨpofɨna kəm kamiar nar iərəm tɨnəkani.
20“Mɨro-in-ka rɨsolan məma kamiar tɨnakeikhar, mɨro lə nouiamiar Nanɨmɨn taha Rɨmɨmiar tɨrakhar.
21 #
Mak 13:12; Luk 21:16 “Pian tɨrɨvrai pian məma takhuapnin, tata tɨrɨvrai nərɨn. Kəni nərərɨn takailil mameitat rɨmɨnilar ne inɨnilar, marol məma takhuapnin ilau.
22 #
Mat 24:9; Mak 13:13; Luk 21:17;
Mat 24:13; Mak 13:13 “Kəni nərəmim min pətɨm tɨpaimakin kamiar to nətɨgok. Mɨro iərəm rɨpail tɨmɨtɨm mɨroatɨs naunin tɨposmiuh in.
23“Mɨro takəma kamaitakɨn kamiar apa lauanu ker, aikɨm marɨn lauanu pɨsɨn. Mɨro-in-ka iakamɨni pərhien to kamiar, to nɨsarolan naunin lauanu min lə tən Isrel, meiroatis məma Io Nərɨ Iərəmim sɨpva mɨn.
24 #
Luk 6:40;
Jon 13:16; 15:20 “Iərəm kamətɨkun tɨrɨsapithean iətɨkun tahan, iolatkokɨn tɨrɨsapithean iərəmɨra tahan.
25 #
Mat 9:34; 12:24; Mak 3:22; Luk 11:15 “Takəma iərəm kamətɨkun tɨrva mavkɨrin iətɨkun tahan, ravkɨr un. O takəma iolatkokɨn tɨrva mavkɨrin iərəmɨra tahan, ravkɨr un. Kəni ka, takəma kɨnɨtat iərəmɨra taha nima məma In Pielsepap,#10:25 Pielsepap in nətɨg ker taha Setan. tɨpɨtat ɨpɨk mɨn nərəmim min tahan.
Tɨnakəgnin Ughin, mɨsəgninan nərəmim
(Luk 12:2-7)
26 #
Mak 4:22; Luk 8:17 “To nar ka, ɨsarəgninan ilar. Mɨro-in-ka nar ker rɨka kamepatətin iərəm to kɨspigarouan lan, ne nar ker rɨka kaməlhau auniuan iərəm to kɨshinatinan.
27“Nəta nar iakamɨni to kamiar lapɨn, pəs tɨnakaniatɨv lə nhakəkan, ne nar iərəm iakamasiuanin lə nɨmatəlɨgɨmiar, pəs tɨnakaivsitoin lə tui nima.
28“Kəni ɨsarəgninan nərəm takarho nɨpəlakɨtil, mɨro kɨseisanənan to nhoan nanɨmɨtil. Mɨro pəs tɨnakarəgnin iərəm rɨsanən məma tɨrətakɨn-uas nɨpəlakɨn ne nanɨmɨn lə nɨkəm lilɨn.
29“Kamos nɨmrɨ kleplepɨn kiu lə wan selen am, mɨro to ker rɨshavan lə nəmaptən takəma Rɨmɨmiar rɨseghənanin.
30“Nɨpərhienan, nouanumiar mɨn kɨnavhin pətɨm.
31“To nar ka, ɨsarəgɨnan, mɨro-in-ka nɨrouan thəmiar ripɨr ɨpɨk rapitha kleplepɨn min ripɨr.
Tɨnakɨni apu Iesu lə nɨmrɨ nərəmim
(Luk 12:8-9)
32“To nar ka, iərəm tɨrɨni apu Io lə nɨmrɨ nərəmim, Io mɨn sɨpɨni apu in lə nɨmrɨ Rɨmok iərəm ramarɨk lə neai.
33 #
2 Tim 2:12
“Mɨro iərəm tɨrapnin Io lə nɨmrɨ nərəmim, Io sɨpapnin mɨn in lə nɨmrɨ Rɨmok iərəm ramarɨk lə neai.
Iesu rɨva məma tɨroti nərəmim
(Luk 12:51-53)
34“Nɨkimiar tɨrɨshoan məma iɨva məma sakəlhau nɨmɨlinuan lə tən ɨk. Iɨmɨsvean məma sakəlhau nɨmɨlinuan, mɨro məma sakos nau əpomh taha nəluakɨnan rɨva.
35 #
Maeka 7:6
“Mɨro-in-ka Io iɨva məma ‘sakoti iərman ne rɨmɨn, pɨravɨn ne inɨn, uhun ne noun.
36 “‘Kəni iərəmim tɨrap məma nərəmim iman atu ikɨn kɨnarva məma tɨkɨmɨr tahan.’
37“Iərəm rolkeike ɨpɨk rɨmɨn o inɨn rapitha Io rɨsavkɨran məma tɨrva tahak. Kəni iərəm rolkeike ɨpɨk nərɨn iərman o pɨravɨn rapitha Io rɨsavkɨran məma tɨrva tahak.
38 #
Mat 16:24; Mak 8:34; Luk 9:23 “Kəni iərəm tɨrɨsləsan nɨk aluauin tahan mamoatisɨgin Io rɨsavkɨran məma tɨrva tahak.
39 #
Mat 16:25; Mak 8:35; Luk 9:24; 17:33; Jon 12:25 “Iərəm ramɨni məma rɨnos nəmiuhan, nəmiuhan tahan tɨrɨlue, mɨro iərəm nəmiuhan tahan ramɨlue ton Io, in tɨros nəmiuhan.
Iərəm ramir kamiar lə nɨvɨtan ramir Io
(Mak 9:41)
40 #
Luk 10:16; Jon 13:20;
Mak 9:37; Luk 9:48 “Iərəm ramos kamiar nakarva ima lə nima tahan ramos Io, ne iərəm ramos Io ramos Rɨmok iərəm ramhalipa Io.
41“Iərəm ramos iəni ker taha Ughin rɨva ima lə nima tahan, mɨro-in-ka wus an in iəni taha Ughin, in tɨrɨpos nɨrouan taha iəni min taha Ughin. Kəni iərəm ramos iərəmim ətuatu ker rɨva ima lə nima tahan, mɨro-in-ka wus an rətuatu, in tɨrɨpos nɨrouan taha nərəmim ətuatu min.
42“Kəni takəma iərəmim ker tɨrofən nu ɨrɨp ɨsuas am kəm nərəm ouloul ɨk ker, mɨro-in-ka in iərəmim tahak, iakamɨni pərhien to kamiar məma tɨrakeike mos nɨrouan ətuatu tahan.”
Nərəmim taha Jon iərəmim taha nauiatil kamarva mamaip Iesu
(Luk 7:18-35)
Currently Selected:
Mat 10: Lenakel NT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
(c) 2023 Covenanter Press - Presbyterian Reformed Church of Australia
