လုကာ 5
5
ႎှါင်း (5)
တပဲ့တော် ရအာည်ႇဆူတ်ဆူတ်
(မဿဲ ၄.၁၈-၂၂။ မာကု ၁.၁၆-၂၀)
1အူဆငည်း ခိင်စဝ်ဖြားယေရှု ဇံင်းရီမ်းဂင်္နေသရက်အိုင် ကူန်ရဝ်မာဂါင်ဂဲ ရောတ်ဇံင်းကပါ်ႇဒိုႇ ကနာည်နံင်တငါဝ်း တြားစဝ်ဖြား။ 2ဟောည်ႇဒီန် စဝ်ဖြားယိူဝ်းပွံတ် ကလေဲႇတိုည်းကားအာရ်လှေ ရောတ်ဇံင်းခေါပ်ပြာအိုမ်။ ကဲအီတိုည်းကားမာ် လေႈပွံတ်ဒါႇကလေဲႇ ပါည်းပ်ုန်ဒါကဲတတိုည်းကားဒီန်။ 3ခေဲင်ကလေဲႇအာရ်လှေဒီန် စဝ်ဖြားယေရှု ဟိုက်ပွံတ်တေဲင်ကလေဲႇ ရှိမုန် ဆူည်ႇပွံတ်ကဲကယာန်တခေါပ်ပြာဒီန် စရီတ်။ ဟောည်ႇဒီန် အ်ုန်အံက်ဒါတေဲင်ကလေဲႇ ဟောတြားတော် ပနံဝ်းပွံတ်တိုအီးကဲ။ 4ခိင်ဟောည်ႇဟောအ်ုန်တတြား “အ်ုန်ဒါႈတရှိမုန် ရိူဝ်ဇဲဝ်းကလေဲႇမည်း ဒဲႈအ်ုန်ဟာဝ်း ပလှေဲမ့်အိုမ် စီပ္လေႈလေႈပ်ုန်ဒါမည်းတဘဲတ်ကား။” 5ရှိမုန်မာ်ဒါႈ “စဝ်ဖြား ယဲကံပ်ရီန်းရဲတ် ပါ်ဆိူမ် ကားအူတိုမာ် ယဲအာဝ်ဘိူန်း။ မိုႈလိူည် ဂေါမိုႈစဝ်ဖြားဆူည်ႇ အောနံင်ပ္လေႈလေႈ ပ်ုန်ဒါတဘဲတ်ကားနီန်။” 6ခိင်ဟောည်ႇပ္လေႈကဲ တပ်ုန်ဒါတဘဲတ်ကားဒီန် တော်ဒါကဲ ကံပ်နှေရ်နံင်ပဒူႈ ဘိူန်းပွံတ်တိုည်းကား ပစိူဝ်း။ 7ဂေါႇဘည်ဒီန် ကဲဘ်ုပ်နှဲအချာက်တောႇကညာကလေဲႇအီဟံရ်ဒေဲႈ ကနာည်နံင်ကဇောည်ကဲ။ ကဲဒီန်ဟည်ရောတ်ကဇောည် တိူဝ်ႈဟံပ်ဒိုႇကားကဲဒီန် ခေဲင်ကလေဲႇပည်အာရ်ကလေဲႇ၊ ကလေဲႇကဲကံပ်နှေရ်နံင်ဇောႈလေႈခြူမ်အိုမ်။ 8ခိင်ဟောည်ႇယိူဝ်းကဲ တဘည်မိုႈဘည်ဘာည်းနီန်#5.8 စဝ်ဖြားယေရှုဟည်ဒဲႈ ဇီုဝ်ပေတရုတရှိမုန် ဆာ်မိုႈကြောႈကဒါႇ ပေတရူး အိုမ်ကြောႈအဓိပ္ပာယ်အ်ုန်မိုႈမာဝ်း။ ရှိမုန်ပေတရုဟြာင်း အံက်ဆီႇဒါကြိုင်း ဂြူပ်စဝ်ဖြားဒါႈ “စဝ်ဖြား ဂေါႇအောမိုႈတိုအီးယီုတ် တိုအီးမိူဝ်ႈအီုင်ဂ္လံတ်ဒါင်း ပ္လေႈႎီုန်ပဲတ်အော။” 9ဘည်မိုႈအ်ုန်မိုႈ ကားပ်ုန်ဘိူန်းတိုည်း ရှိမုန် ကာည်း ဂေါအ်ုန်ကဲ ဂီုန်းဘ္လံမ်းဇာဝ်း ကံပ်ဘယ်လာ်အာမ်းဒိုႇ။ 10ခေဲင်အီဒီန် တောပ်ဘိုးဂေါရှိမုန် ယာကုက် ကာည်း ယောဟာန် ဂါရ်အီမိုႈကောန် ဇေဗေဒဲ။ စဝ်ဖြားယေရှုဒါႈတ ရှိမုန် “မည်းမည်ယော လဒိုရ်မည်းတိုည်းကား ဇူႈကဇေန်နီန် နံင်ဘ်ုပ်ရေဲန် ကစုဒဲႈတိုအီး ကနာည်နံင်ပဲန်တပဲ့တော် တောပ်ရဘံန်းအော။”#5.10 ခေဲင်ကျာမ်းအခည်း ကိက်အူန်းဒါႈ လိုတိုည်းတိုအီးဂဲ 11ဟောည်ႇဒီန် ႎါည်းဟောည်ႇတီုတ်ဟာဝ်းကလေဲႇကဲ ပခေါပ်ပြာအိုမ် ကဲဟည်ႎီုန်ဒိုႇထာန်မိူဝ်ႈကဲ တောပ်ဟာဝ်းဒိုႇရဘံန်းစဝ်ဖြား။
ဘည်ပ်ုန်ကမာ်ႈဟြာည် အီဆူနာ ကဝ်အီမိူဝ်ႈရောဂါတူတ်အူအီး
(မဿဲ ၈.၁-၄။ မာကု ၁.၄၀-၄၅)
12ခိင်ဂေါည်ထံင်စဝ်ဖြားယေရှု ပကီုင်းအူကီုင်းဒီန် အ်ုန်မိူဝ်းအီကတူႈရောဂါတူတ် အူအီး။ ဘိူဝ်ယိူဝ်းအ်ုန်တစဝ်ဖြားယေရှု အ်ုန်အံက်ဆကူပ်ပွံတ် ရအာည်ႇစဝ်ဖြား “စဝ်ဖြား၊ စဝ်ဖြား ဆာ်မိူဝ်ႈပ်ုန်လို ဂေါႇမိုႈနံင်ဘယ်ပ်ုန်ကမာ်ႈရောဂါ စီပဲန်အောမှာန်း ဒဲႈရောဂါဒါင်းနီန် ဟြာည်ကမာ်ႈအေႇ။” 13ခိင်ဒီန် စဝ်ဖြားစီဒါတည်းအ်ုန်စီႇ “အောမိူဝ်ႈအေ့အလို၊ ဒဲႈအ်ုန်ဟြာည်ကမာ်ႈ” ဘိူဝ်ဟောည်ႇဒါႈဘည်နီန် ကမာ်ႈဟြာည်ပွံတ်အူစာ်န်း။ 14ဟောည်ႇဒီန် စဝ်ဖြားစီမောရှေတံမ်းအူန်းအ်ုန် ဂေါႇရောဂါမည်း ဟြာည်ကမာ်ႈဘည်နီန် မည်က္လာင်းတအဆေအေ့ “မည်းစီဟာဝ်းနှဲတိုပြီမ်မည်း တပုရောဟေက်။ ဆာ်ဟောည်ႇ မည်းနံင်လိုဟာဝ်းရေဲန် ကုသိုလ်ပ်ုန်လှူ တောပ်ဘည်ဘေဲႇဖြား ကနာည်နံင်ဟြာည်ကမာ်ႈ ရောဂါမည်းဒီန်။” 15ဂေါႇမိုႈ ဆဒါင်ဂုင်တော်စဝ်ဖြားနီန် ဟည်ရောတ်ဒိုႇတောန်ဒီ တိုအီးခည်ဂီုန်း ကစုခမို ကနာည်နံင်ဒေဲႈတငါဝ်း တြားဟောစဝ်ဖြား ကာည်း ကနာည်နံင်ကမာ်ႈဟြာည် ရောဂါ။ 16မိုႈလိူည် စဝ်ဖြားနီန် အ်ုန်ကျာင်းဟာဝ်းမှာန်းဆု အူပါးအူပါး ပအာဝ်မိူဝ်ႈတိုအီး။
ဘည်မိူဝ်ႈအခွါင်း ပ္လိုတ်ခွါင်းဒဲႈတာမ်အီုင်ဂ္လံတ်
(မဿဲ ၉.၁-၈။ မာကု ၂.၁-၁၂)
17အူဆငည်း ခိင်စဝ်ဖြားဟောတြား ဆြာကဲအီဆမားကျာမ်း ကာည်း ဖာရိရှဲ#5.17 ဖာရိရှဲဒါႈအီးမိုႈ ကြောႈဖာဆာဂရိ (ကဲအီကကာႈဒေဂေါည် ရာင်ဂဲ)၊ ဆာ်မိုႈကြောႈဟေဘရူး အဓိပ္ပာယ်အ်ုန်မိုႈ ကဝ်အီဂေါည်ရာင်ဒေ၊ ကဝ်အီကကာႈဂေါည်။ ကဲဂဲနီန် မိုႈဖုင်တိုအီး လံပ်ဖာဆာဘိူန်းအာဏာ ဇံင်းမံင်ဇိုချီုင်ခရစ်တော် ယေရှု ႎါည်းဒီန် ကဲကညာႈလိူည်စဝ်ဖြားဒီန် ဟည်ပဲန်ဒေဲႈဒိုည်ႇ အီရေဲန်ဒံင်ဒေ ညှူမ်လံပ်ဖာဆာ။ ကဲအီယိူဝ်ႇဒေဲႈ ပကီုင်းဂျေရုဆလင်၊ ကပီုန်ယုဒ၊ ကပီုန်ဂါလိလဲကဲ အံက်ရီမ်ပြော အရာပ်ကဲဒီန်။ စဝ်ဖြားနီန် အ်ုန်ဒဲႈအူန်း တဂိုးတော် ကနာည်နံင်ကမာ်ႈဟြာည် ရောဂါဆဲဝ် တိုအီးဂဲ။ 18အခိင်ဒီန် ကဲရီန်းရဲတ်ဒေ ဟံပ်တိုအီးယံမ်းအူဒါႇ ခေဲင်နာ်ႈ ဇိုက်ဟာဝ်းခေဲင်ဂါင် ပ္လေႈရအာည်ႇစဝ်ဖြား။ 19ဂေါႇမိုႈအီတငါဝ်းတြားဟောစဝ်ဖြားနီန် ဂီုန်းဇာဝ်း ကဲဘ်ုပ်ဇိုက်ဟိုက်အ်ုန်တေဲင်ဂါင် ႎိူဝ်ႈကဒူႇဂါင် စီပျောႈတခ္လူးလေႈ ပဂေါည်ရအာည်ႇစဝ်ဖြား ဒီခနားတိုအီးဂီုန်း။ 20ခိင်စဝ်ဖြားယိူဝ်းဘည်ညှူမ်ဒါင်းကဲ အ်ုန်စီဒါႈတကဝ်အီကတူႈဆဲဝ်ဒီန် “ဘဝ်ဂေါ အောဟည်ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇဒေဲႈမည်း။” 21ခိင်ဒီန် ဖာရိရှဲ ကာည်း ဆြာဆမားကျာမ်းကဲဒီန် စီတဂေန်းဒါႈ “တိုအီးအူအီးနီန် ယောမိုႈအ်ုန်ထာင်အ်ုန်မိုႈစဝ်ဖြားမာ် အာဝ်နံပ်။ ဆဲႈဒါႇစဝ်ဖြား အာဝ်မိူဝ်ႈမအီဘယ်ဒေ ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇအီး။” 22စဝ်ဖြားမာ်နံပ်အူန်းဘည်တဂန်းကဲ “ဂေါႇဘည်ဒီန် အ်ုန်စီဒါႈတကဲ ဆေဘာည်း ပဲစီတဂေန်းဘည်ဒီန် 23လှေမှောငှိူည် ‘အယ်ဒါႈယိူဝ်ႇဟာဝ်းပွံတ်’ ကာည်း ‘အယ်ဒါႈအောပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇမည်း။’ 24မိုႈလိူည် အောနံင်နှဲပဲတိူရ်ႈ ဘည်မိူဝ်ႈတအခွါင်းအာဏာ#5.24 ကောန်တိုအီးဒါႈအီးမိုႈ ပ်ုန်တာင်ခရစ်တော်တ အ်ုန်ဇီုဝ်။ ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇ တိုအီးဂဲ အီဂေါည်တေဲင်ကံမ်ဖာဒါင်းနီန်” ဟောည်ႇဒီန် အ်ုန်ဒါႈတကဝ်အီကတူႈယံမ်းအူကဒါႇဒီန် “အောနံင်က္လာင်းတမည်း။ ယိူဝ်ႇပွံတ်၊ တိူဝ်ႈမည်းဒိူည်းနာ်ႈမည်းဒီန် ႎီရ်ပွံတ်ပဂါင်။” 25ဘိူဝ်ဟောည်ႇဒါႈဘည်နီန် တိုအီးဆဲဝ်ဒီန် ယိူဝ်ႇဇံင်းတိူဝ်ႈပွံတ်ပေရ်ပ်ုန်အီတ်အ်ုန် တိူဝ်ႈကနေဲႈဖါ်ႈဂုင်စဝ်ဖြား ႎီရ်ပွံတ်ပဂါင်ကဲ။ 26ကူန်ရဝ်မာဂါင်ဂဲမာ် ဟည်ယောဟည်အာမ်း “အဒိူဝ်နီန် ယဲဟည်ယိူဝ်းဒေဲႈခံင်လှာက်ခံင်တချာယာ့်” ကဲဟောည်ႇဒါႈဘည်နီန် ကဲတိူဝ်ႈကနေဲႈဖါ်ႈဂုင်စဝ်ဖြား။
ဘည်ရံရ်ႈကဲတလေဝိ
(မဿဲ ၉.၉-၁၃။ မာကု ၂.၁၃-၁၇)
27ႎါည်းဟောည်ႇပဲန်ဒေဲႈဘည်ဒီန် စဝ်ဖြားယေရှုစီလည်လေႈဟာဝ်းပွံတ်ဒါႇဒီယိူဝ်ႇဂေါည်အ်ုန် ဟာဝ်းယိူဝ်းပွံတ် တိုအီးကဲပ်ကောက်လေဝိအူအီး အံက်ခေဲင်ရဂံင်ကဲပ်ကောက် အ်ုန်စီတောႇဒါႈ “တောပ်ဒေဲႈရဘံန်းအော ကနာည်နံင်ပဲန်တပဲ့တော်အော။” 28ဂေါႇဘည်ဒီန် လေဝိမာ် ႎီုန်ဒိုႇထာင်မိူဝ်ႈ တောပ်ဟာဝ်းပွံတ်ရအာည်ႇ စဝ်ဖြား။ 29ဟောည်ႇဒီန် လေဝိမာ် ရေဲန်ပ္လေါည်ဟောမ်ပျော ရံပ်ရိုႈစဝ်ဖြား ကာည်း တပဲ့တော်အ်ုန်ဂဲ။ အီငေးအ်ုန်ဂဲ ကာည်း တိုအီးကဲပ်ကောက်အီဟံရ်မာ် ရောတ်ဒေဲႈကစုခမို ပပ္လေါည်ဟောမ်ပေါမ်မှိူမ်ဒီန်။ 30ဖာရိရှဲဂဲ ကာည်း ဆြာဆမားကျာမ်းဂဲဒါႈတတပဲ့စဝ်ဖြား “ဆေဘာည်း ပဲစီအံက်ဟောမ်ပျောတောပ် တိုအီးကဲပ်ကောက်ဂဲ ကာည်း တိုအီးမိူဝ်ႈအီုင်ဂ္လံတ်ဂဲနီန်။” 31စဝ်ဖြားစီဒါႈဘည်နီန် “တိုအီးခေါခေါခါႇခါႇကဲ အာဝ်လိုမ ဆြာခေါခါႇ မိုႈလိူည်တိုအီးအာဝ်ချံမ်ဆာဂဲ လိုဆြာခေါခါႇ။ 32အာဝ်မိုႈမအောဒေဲႈကနာည် တိုအီးကျနဂဲ။ မိုႈလိူည် အောဒေဲႈကနာည် နှာင်းတိုအီးမိူဝ်ႈအီုင်ဂ္လံတ်ဂဲနီန် ဘိူန်းဆာင်ဝေဂ။”
ပ်ုန်ဆမွံတ် အီကဆီုဝ်ကဆဲင် တောပ်ဘည်ႎဲႈပ်ုန်ဟောမ်
(မဿဲ ၉.၁၄-၁၇။ မာကု ၂.၁၈-၂၂)
33ဖာရိရှဲ ကာည်း ဆြာဆမားကျာမ်းကဲနီန် ဒါႈတစဝ်ဖြား “ဆြာခါမ်ဒဲႈဘည်ညှူမ် ဆြာယောဟာန် ကာည်း တပဲ့အ်ုန်ကဲ ဂေါည်ဂေါည်စီကျာင်းဒေ မှာန်းဆု၊ ႎဲႈပ်ုန်ဟောမ်။ တပဲ့ဖာရိရှိဂဲမာ် ကျာင်းအူန်ဒေရေဲန်ဘည်ဒီန်။ မိုႈလိူည် ဆေဘာည်းတပဲ့မည်းဂဲ စီအာဝ်ႎဲႈပ်ုန်ဟောမ်ဘည်အီး။”
34စဝ်ဖြားစီဒါႈ “တိုအီးဒေဲႈရောတ်ခေဲင်ပ္လေါည်မံင်ဂလာ အီနံင်ႎဲႈလာ့်ပ်ုန်ဟောမ် ခိင်ဂေါည်ကဲကောန်အီမာည်းအီးခံတ်ဒီန်။ အဆေမာ် နံင်အာဝ်ရေဲန်စီ။ 35မိုႈလိူည် ဆာ်ကဲဟောည်ႇတောႇဟာဝ်း ကောန်အီမာည်းဒီန် ကဲနံင်ႎဲႈ၊ အာဝ်ဟောမ်အာဝ်ဒါယာ့်။” 36ဟောည်ႇဒီန် စဝ်ဖြားစီနှဲဒဲႈ ပုင်တဲႇတကဲ “အဆေမာ်အာဝ်ဒါမ ပိက်ကမာည်း တဘာင်းဂြူတဘြဲႈ၊ ဆာ်ဒါတဘာင်းမာ် ဂြူပြီမ်ဒီန် နံင်ရာမ်းတဘြဲႈဟာဝ်းလိူည်။ 37အဆေမာ်အာဝ်ဟံပ်မ အိုမ်ပ္လေကဘီ ခေဲင်ကဘဝ်ပြီမ်။ ဆာ်ရေဲန်ဘည်ဒီန် အိုမ်ပ္လေကဘီနီန် အ်ုန်နံင်ပ်ုန်ရွည်ႇ ကဘဝ်ပြီမ်ဒီန်။ 38ဂေါႇဘည်ဒီန် အိုမ်ပ္လေကဘီနီန် နံင်လိုဟံပ်လိူည်ခေဲင်ကဘဝ်ကမာည်း။ 39တောန်တိုအီးဟောည်ႇတျံင်အိုမ်ပ္လေကဘီအီပြီမ်နီန် ကဲနံင်အာဝ်ဆိင်တျံင်ယာ့် အိုမ်ပ္လေကဘီအီကမာည်း။”
Shwe (Samlung) Palaung (ရွှေပလောင်) Bible by Beyond Translation is licensed under Creative Commons Attribution-ShareAlike 4.0 License.
လုကာ 5
5
ႎှါင်း (5)
တပဲ့တော် ရအာည်ႇဆူတ်ဆူတ်
(မဿဲ ၄.၁၈-၂၂။ မာကု ၁.၁၆-၂၀)
1အူဆငည်း ခိင်စဝ်ဖြားယေရှု ဇံင်းရီမ်းဂင်္နေသရက်အိုင် ကူန်ရဝ်မာဂါင်ဂဲ ရောတ်ဇံင်းကပါ်ႇဒိုႇ ကနာည်နံင်တငါဝ်း တြားစဝ်ဖြား။ 2ဟောည်ႇဒီန် စဝ်ဖြားယိူဝ်းပွံတ် ကလေဲႇတိုည်းကားအာရ်လှေ ရောတ်ဇံင်းခေါပ်ပြာအိုမ်။ ကဲအီတိုည်းကားမာ် လေႈပွံတ်ဒါႇကလေဲႇ ပါည်းပ်ုန်ဒါကဲတတိုည်းကားဒီန်။ 3ခေဲင်ကလေဲႇအာရ်လှေဒီန် စဝ်ဖြားယေရှု ဟိုက်ပွံတ်တေဲင်ကလေဲႇ ရှိမုန် ဆူည်ႇပွံတ်ကဲကယာန်တခေါပ်ပြာဒီန် စရီတ်။ ဟောည်ႇဒီန် အ်ုန်အံက်ဒါတေဲင်ကလေဲႇ ဟောတြားတော် ပနံဝ်းပွံတ်တိုအီးကဲ။ 4ခိင်ဟောည်ႇဟောအ်ုန်တတြား “အ်ုန်ဒါႈတရှိမုန် ရိူဝ်ဇဲဝ်းကလေဲႇမည်း ဒဲႈအ်ုန်ဟာဝ်း ပလှေဲမ့်အိုမ် စီပ္လေႈလေႈပ်ုန်ဒါမည်းတဘဲတ်ကား။” 5ရှိမုန်မာ်ဒါႈ “စဝ်ဖြား ယဲကံပ်ရီန်းရဲတ် ပါ်ဆိူမ် ကားအူတိုမာ် ယဲအာဝ်ဘိူန်း။ မိုႈလိူည် ဂေါမိုႈစဝ်ဖြားဆူည်ႇ အောနံင်ပ္လေႈလေႈ ပ်ုန်ဒါတဘဲတ်ကားနီန်။” 6ခိင်ဟောည်ႇပ္လေႈကဲ တပ်ုန်ဒါတဘဲတ်ကားဒီန် တော်ဒါကဲ ကံပ်နှေရ်နံင်ပဒူႈ ဘိူန်းပွံတ်တိုည်းကား ပစိူဝ်း။ 7ဂေါႇဘည်ဒီန် ကဲဘ်ုပ်နှဲအချာက်တောႇကညာကလေဲႇအီဟံရ်ဒေဲႈ ကနာည်နံင်ကဇောည်ကဲ။ ကဲဒီန်ဟည်ရောတ်ကဇောည် တိူဝ်ႈဟံပ်ဒိုႇကားကဲဒီန် ခေဲင်ကလေဲႇပည်အာရ်ကလေဲႇ၊ ကလေဲႇကဲကံပ်နှေရ်နံင်ဇောႈလေႈခြူမ်အိုမ်။ 8ခိင်ဟောည်ႇယိူဝ်းကဲ တဘည်မိုႈဘည်ဘာည်းနီန်#5.8 စဝ်ဖြားယေရှုဟည်ဒဲႈ ဇီုဝ်ပေတရုတရှိမုန် ဆာ်မိုႈကြောႈကဒါႇ ပေတရူး အိုမ်ကြောႈအဓိပ္ပာယ်အ်ုန်မိုႈမာဝ်း။ ရှိမုန်ပေတရုဟြာင်း အံက်ဆီႇဒါကြိုင်း ဂြူပ်စဝ်ဖြားဒါႈ “စဝ်ဖြား ဂေါႇအောမိုႈတိုအီးယီုတ် တိုအီးမိူဝ်ႈအီုင်ဂ္လံတ်ဒါင်း ပ္လေႈႎီုန်ပဲတ်အော။” 9ဘည်မိုႈအ်ုန်မိုႈ ကားပ်ုန်ဘိူန်းတိုည်း ရှိမုန် ကာည်း ဂေါအ်ုန်ကဲ ဂီုန်းဘ္လံမ်းဇာဝ်း ကံပ်ဘယ်လာ်အာမ်းဒိုႇ။ 10ခေဲင်အီဒီန် တောပ်ဘိုးဂေါရှိမုန် ယာကုက် ကာည်း ယောဟာန် ဂါရ်အီမိုႈကောန် ဇေဗေဒဲ။ စဝ်ဖြားယေရှုဒါႈတ ရှိမုန် “မည်းမည်ယော လဒိုရ်မည်းတိုည်းကား ဇူႈကဇေန်နီန် နံင်ဘ်ုပ်ရေဲန် ကစုဒဲႈတိုအီး ကနာည်နံင်ပဲန်တပဲ့တော် တောပ်ရဘံန်းအော။”#5.10 ခေဲင်ကျာမ်းအခည်း ကိက်အူန်းဒါႈ လိုတိုည်းတိုအီးဂဲ 11ဟောည်ႇဒီန် ႎါည်းဟောည်ႇတီုတ်ဟာဝ်းကလေဲႇကဲ ပခေါပ်ပြာအိုမ် ကဲဟည်ႎီုန်ဒိုႇထာန်မိူဝ်ႈကဲ တောပ်ဟာဝ်းဒိုႇရဘံန်းစဝ်ဖြား။
ဘည်ပ်ုန်ကမာ်ႈဟြာည် အီဆူနာ ကဝ်အီမိူဝ်ႈရောဂါတူတ်အူအီး
(မဿဲ ၈.၁-၄။ မာကု ၁.၄၀-၄၅)
12ခိင်ဂေါည်ထံင်စဝ်ဖြားယေရှု ပကီုင်းအူကီုင်းဒီန် အ်ုန်မိူဝ်းအီကတူႈရောဂါတူတ် အူအီး။ ဘိူဝ်ယိူဝ်းအ်ုန်တစဝ်ဖြားယေရှု အ်ုန်အံက်ဆကူပ်ပွံတ် ရအာည်ႇစဝ်ဖြား “စဝ်ဖြား၊ စဝ်ဖြား ဆာ်မိူဝ်ႈပ်ုန်လို ဂေါႇမိုႈနံင်ဘယ်ပ်ုန်ကမာ်ႈရောဂါ စီပဲန်အောမှာန်း ဒဲႈရောဂါဒါင်းနီန် ဟြာည်ကမာ်ႈအေႇ။” 13ခိင်ဒီန် စဝ်ဖြားစီဒါတည်းအ်ုန်စီႇ “အောမိူဝ်ႈအေ့အလို၊ ဒဲႈအ်ုန်ဟြာည်ကမာ်ႈ” ဘိူဝ်ဟောည်ႇဒါႈဘည်နီန် ကမာ်ႈဟြာည်ပွံတ်အူစာ်န်း။ 14ဟောည်ႇဒီန် စဝ်ဖြားစီမောရှေတံမ်းအူန်းအ်ုန် ဂေါႇရောဂါမည်း ဟြာည်ကမာ်ႈဘည်နီန် မည်က္လာင်းတအဆေအေ့ “မည်းစီဟာဝ်းနှဲတိုပြီမ်မည်း တပုရောဟေက်။ ဆာ်ဟောည်ႇ မည်းနံင်လိုဟာဝ်းရေဲန် ကုသိုလ်ပ်ုန်လှူ တောပ်ဘည်ဘေဲႇဖြား ကနာည်နံင်ဟြာည်ကမာ်ႈ ရောဂါမည်းဒီန်။” 15ဂေါႇမိုႈ ဆဒါင်ဂုင်တော်စဝ်ဖြားနီန် ဟည်ရောတ်ဒိုႇတောန်ဒီ တိုအီးခည်ဂီုန်း ကစုခမို ကနာည်နံင်ဒေဲႈတငါဝ်း တြားဟောစဝ်ဖြား ကာည်း ကနာည်နံင်ကမာ်ႈဟြာည် ရောဂါ။ 16မိုႈလိူည် စဝ်ဖြားနီန် အ်ုန်ကျာင်းဟာဝ်းမှာန်းဆု အူပါးအူပါး ပအာဝ်မိူဝ်ႈတိုအီး။
ဘည်မိူဝ်ႈအခွါင်း ပ္လိုတ်ခွါင်းဒဲႈတာမ်အီုင်ဂ္လံတ်
(မဿဲ ၉.၁-၈။ မာကု ၂.၁-၁၂)
17အူဆငည်း ခိင်စဝ်ဖြားဟောတြား ဆြာကဲအီဆမားကျာမ်း ကာည်း ဖာရိရှဲ#5.17 ဖာရိရှဲဒါႈအီးမိုႈ ကြောႈဖာဆာဂရိ (ကဲအီကကာႈဒေဂေါည် ရာင်ဂဲ)၊ ဆာ်မိုႈကြောႈဟေဘရူး အဓိပ္ပာယ်အ်ုန်မိုႈ ကဝ်အီဂေါည်ရာင်ဒေ၊ ကဝ်အီကကာႈဂေါည်။ ကဲဂဲနီန် မိုႈဖုင်တိုအီး လံပ်ဖာဆာဘိူန်းအာဏာ ဇံင်းမံင်ဇိုချီုင်ခရစ်တော် ယေရှု ႎါည်းဒီန် ကဲကညာႈလိူည်စဝ်ဖြားဒီန် ဟည်ပဲန်ဒေဲႈဒိုည်ႇ အီရေဲန်ဒံင်ဒေ ညှူမ်လံပ်ဖာဆာ။ ကဲအီယိူဝ်ႇဒေဲႈ ပကီုင်းဂျေရုဆလင်၊ ကပီုန်ယုဒ၊ ကပီုန်ဂါလိလဲကဲ အံက်ရီမ်ပြော အရာပ်ကဲဒီန်။ စဝ်ဖြားနီန် အ်ုန်ဒဲႈအူန်း တဂိုးတော် ကနာည်နံင်ကမာ်ႈဟြာည် ရောဂါဆဲဝ် တိုအီးဂဲ။ 18အခိင်ဒီန် ကဲရီန်းရဲတ်ဒေ ဟံပ်တိုအီးယံမ်းအူဒါႇ ခေဲင်နာ်ႈ ဇိုက်ဟာဝ်းခေဲင်ဂါင် ပ္လေႈရအာည်ႇစဝ်ဖြား။ 19ဂေါႇမိုႈအီတငါဝ်းတြားဟောစဝ်ဖြားနီန် ဂီုန်းဇာဝ်း ကဲဘ်ုပ်ဇိုက်ဟိုက်အ်ုန်တေဲင်ဂါင် ႎိူဝ်ႈကဒူႇဂါင် စီပျောႈတခ္လူးလေႈ ပဂေါည်ရအာည်ႇစဝ်ဖြား ဒီခနားတိုအီးဂီုန်း။ 20ခိင်စဝ်ဖြားယိူဝ်းဘည်ညှူမ်ဒါင်းကဲ အ်ုန်စီဒါႈတကဝ်အီကတူႈဆဲဝ်ဒီန် “ဘဝ်ဂေါ အောဟည်ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇဒေဲႈမည်း။” 21ခိင်ဒီန် ဖာရိရှဲ ကာည်း ဆြာဆမားကျာမ်းကဲဒီန် စီတဂေန်းဒါႈ “တိုအီးအူအီးနီန် ယောမိုႈအ်ုန်ထာင်အ်ုန်မိုႈစဝ်ဖြားမာ် အာဝ်နံပ်။ ဆဲႈဒါႇစဝ်ဖြား အာဝ်မိူဝ်ႈမအီဘယ်ဒေ ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇအီး။” 22စဝ်ဖြားမာ်နံပ်အူန်းဘည်တဂန်းကဲ “ဂေါႇဘည်ဒီန် အ်ုန်စီဒါႈတကဲ ဆေဘာည်း ပဲစီတဂေန်းဘည်ဒီန် 23လှေမှောငှိူည် ‘အယ်ဒါႈယိူဝ်ႇဟာဝ်းပွံတ်’ ကာည်း ‘အယ်ဒါႈအောပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇမည်း။’ 24မိုႈလိူည် အောနံင်နှဲပဲတိူရ်ႈ ဘည်မိူဝ်ႈတအခွါင်းအာဏာ#5.24 ကောန်တိုအီးဒါႈအီးမိုႈ ပ်ုန်တာင်ခရစ်တော်တ အ်ုန်ဇီုဝ်။ ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇ တိုအီးဂဲ အီဂေါည်တေဲင်ကံမ်ဖာဒါင်းနီန်” ဟောည်ႇဒီန် အ်ုန်ဒါႈတကဝ်အီကတူႈယံမ်းအူကဒါႇဒီန် “အောနံင်က္လာင်းတမည်း။ ယိူဝ်ႇပွံတ်၊ တိူဝ်ႈမည်းဒိူည်းနာ်ႈမည်းဒီန် ႎီရ်ပွံတ်ပဂါင်။” 25ဘိူဝ်ဟောည်ႇဒါႈဘည်နီန် တိုအီးဆဲဝ်ဒီန် ယိူဝ်ႇဇံင်းတိူဝ်ႈပွံတ်ပေရ်ပ်ုန်အီတ်အ်ုန် တိူဝ်ႈကနေဲႈဖါ်ႈဂုင်စဝ်ဖြား ႎီရ်ပွံတ်ပဂါင်ကဲ။ 26ကူန်ရဝ်မာဂါင်ဂဲမာ် ဟည်ယောဟည်အာမ်း “အဒိူဝ်နီန် ယဲဟည်ယိူဝ်းဒေဲႈခံင်လှာက်ခံင်တချာယာ့်” ကဲဟောည်ႇဒါႈဘည်နီန် ကဲတိူဝ်ႈကနေဲႈဖါ်ႈဂုင်စဝ်ဖြား။
ဘည်ရံရ်ႈကဲတလေဝိ
(မဿဲ ၉.၉-၁၃။ မာကု ၂.၁၃-၁၇)
27ႎါည်းဟောည်ႇပဲန်ဒေဲႈဘည်ဒီန် စဝ်ဖြားယေရှုစီလည်လေႈဟာဝ်းပွံတ်ဒါႇဒီယိူဝ်ႇဂေါည်အ်ုန် ဟာဝ်းယိူဝ်းပွံတ် တိုအီးကဲပ်ကောက်လေဝိအူအီး အံက်ခေဲင်ရဂံင်ကဲပ်ကောက် အ်ုန်စီတောႇဒါႈ “တောပ်ဒေဲႈရဘံန်းအော ကနာည်နံင်ပဲန်တပဲ့တော်အော။” 28ဂေါႇဘည်ဒီန် လေဝိမာ် ႎီုန်ဒိုႇထာင်မိူဝ်ႈ တောပ်ဟာဝ်းပွံတ်ရအာည်ႇ စဝ်ဖြား။ 29ဟောည်ႇဒီန် လေဝိမာ် ရေဲန်ပ္လေါည်ဟောမ်ပျော ရံပ်ရိုႈစဝ်ဖြား ကာည်း တပဲ့တော်အ်ုန်ဂဲ။ အီငေးအ်ုန်ဂဲ ကာည်း တိုအီးကဲပ်ကောက်အီဟံရ်မာ် ရောတ်ဒေဲႈကစုခမို ပပ္လေါည်ဟောမ်ပေါမ်မှိူမ်ဒီန်။ 30ဖာရိရှဲဂဲ ကာည်း ဆြာဆမားကျာမ်းဂဲဒါႈတတပဲ့စဝ်ဖြား “ဆေဘာည်း ပဲစီအံက်ဟောမ်ပျောတောပ် တိုအီးကဲပ်ကောက်ဂဲ ကာည်း တိုအီးမိူဝ်ႈအီုင်ဂ္လံတ်ဂဲနီန်။” 31စဝ်ဖြားစီဒါႈဘည်နီန် “တိုအီးခေါခေါခါႇခါႇကဲ အာဝ်လိုမ ဆြာခေါခါႇ မိုႈလိူည်တိုအီးအာဝ်ချံမ်ဆာဂဲ လိုဆြာခေါခါႇ။ 32အာဝ်မိုႈမအောဒေဲႈကနာည် တိုအီးကျနဂဲ။ မိုႈလိူည် အောဒေဲႈကနာည် နှာင်းတိုအီးမိူဝ်ႈအီုင်ဂ္လံတ်ဂဲနီန် ဘိူန်းဆာင်ဝေဂ။”
ပ်ုန်ဆမွံတ် အီကဆီုဝ်ကဆဲင် တောပ်ဘည်ႎဲႈပ်ုန်ဟောမ်
(မဿဲ ၉.၁၄-၁၇။ မာကု ၂.၁၈-၂၂)
33ဖာရိရှဲ ကာည်း ဆြာဆမားကျာမ်းကဲနီန် ဒါႈတစဝ်ဖြား “ဆြာခါမ်ဒဲႈဘည်ညှူမ် ဆြာယောဟာန် ကာည်း တပဲ့အ်ုန်ကဲ ဂေါည်ဂေါည်စီကျာင်းဒေ မှာန်းဆု၊ ႎဲႈပ်ုန်ဟောမ်။ တပဲ့ဖာရိရှိဂဲမာ် ကျာင်းအူန်ဒေရေဲန်ဘည်ဒီန်။ မိုႈလိူည် ဆေဘာည်းတပဲ့မည်းဂဲ စီအာဝ်ႎဲႈပ်ုန်ဟောမ်ဘည်အီး။”
34စဝ်ဖြားစီဒါႈ “တိုအီးဒေဲႈရောတ်ခေဲင်ပ္လေါည်မံင်ဂလာ အီနံင်ႎဲႈလာ့်ပ်ုန်ဟောမ် ခိင်ဂေါည်ကဲကောန်အီမာည်းအီးခံတ်ဒီန်။ အဆေမာ် နံင်အာဝ်ရေဲန်စီ။ 35မိုႈလိူည် ဆာ်ကဲဟောည်ႇတောႇဟာဝ်း ကောန်အီမာည်းဒီန် ကဲနံင်ႎဲႈ၊ အာဝ်ဟောမ်အာဝ်ဒါယာ့်။” 36ဟောည်ႇဒီန် စဝ်ဖြားစီနှဲဒဲႈ ပုင်တဲႇတကဲ “အဆေမာ်အာဝ်ဒါမ ပိက်ကမာည်း တဘာင်းဂြူတဘြဲႈ၊ ဆာ်ဒါတဘာင်းမာ် ဂြူပြီမ်ဒီန် နံင်ရာမ်းတဘြဲႈဟာဝ်းလိူည်။ 37အဆေမာ်အာဝ်ဟံပ်မ အိုမ်ပ္လေကဘီ ခေဲင်ကဘဝ်ပြီမ်။ ဆာ်ရေဲန်ဘည်ဒီန် အိုမ်ပ္လေကဘီနီန် အ်ုန်နံင်ပ်ုန်ရွည်ႇ ကဘဝ်ပြီမ်ဒီန်။ 38ဂေါႇဘည်ဒီန် အိုမ်ပ္လေကဘီနီန် နံင်လိုဟံပ်လိူည်ခေဲင်ကဘဝ်ကမာည်း။ 39တောန်တိုအီးဟောည်ႇတျံင်အိုမ်ပ္လေကဘီအီပြီမ်နီန် ကဲနံင်အာဝ်ဆိင်တျံင်ယာ့် အိုမ်ပ္လေကဘီအီကမာည်း။”
Shwe (Samlung) Palaung (ရွှေပလောင်) Bible by Beyond Translation is licensed under Creative Commons Attribution-ShareAlike 4.0 License.