Лебийлиле 9
9
Дин къуллукъчула къуллукъларын башлайдыла
1Сегизинчи кюн Мусса Харунну бла аны уланларын эмда Исраилни тукъум таматаларын чакъыргъанды. 2Харуннга ол былай айтды:
– Бугъаладан кесинге гюнях ючюн къурманнга бир къыяусуз эркек тана эмда толусунлай кюйдюрюлген къурманнга бир къыяусуз къочхар алып, аланы Раббийни аллына келтир. 3Исраил улулагъа буюр: «Гюнях ючюн къурманнга бир теке, толусунлай кюйдюрюлген къурманнга къыяусуз эркек тана бла къозу, 4эмда саламатлыкъ къурманнга бир бугъа#9:4 Бугъа – оригиналда жазылгъан сёз «ийнек» магъананы да тутады. Аны кибик, 18 эм 19 аятлада. бла бир къочхар алып, аланы Раббийни аллына тындырыгъыз, зейтун жау къошулгъан ётмек саугъа да келтиригиз. Бюгюн сизге Раббий кёрюнюрюкдю».
5Муссаны битеу буюргъанларын алып, Тюбешиу Чатырны аллына келтирдиле. Битеу жамауат жыйылып, Раббийни аллына турду. 6Мусса:
– Раббий сизге буюргъанны этигиз да, Раббийни аламатлыгъы#9:6 Раббийни аламатлыгъы – Раббийни адамлагъа жууукълашып, тюрлю сейирлик халлада кёрюннгени. Аны кибик, 23 аятда. сизге кёрюнюр, – деди.
7Сора Мусса Харуннга:
– Къурман жерге бар да, гюнях ючюн къурманынгы эм толусунлай кюйдюрюлген къурманынгы келтирип, кесинги эм халкъны ючюн тазалау эт. Халкъ ючюн къурман эт да, Раббийни буюргъаны кибик, аны ючюн тазалау эт, – деди.
8Харун къурман жерге келип, кеси гюняхы ючюн къурманнга эркек тана сойду. 9Уланлары анга къанындан бердиле да, Харун аны бармагъы бла къурман жерни мюйюзлерине жакъды. Къанны къалгъанын а къурман жерни тюбюне тёкдю. 10Гюнях ючюн къурманны ич жауун, бюйреклерин эм баууруну жауун, Раббий Муссагъа буюргъаны кибик, къурман жерни юсюнде кюйдюрдю. 11Этин бла терисин къонушну тышында кюйдюрдю.
12Сора ол толусунлай кюйдюрюлген къурманны сойду. Уланлары анга къанындан бердиле да, Харун аны къурман жерге тёрт жанындан бюркдю. 13Ала анга толусунлай кюйдюрюлген къурманны этин эм башын бердиле, ол да аланы къурман жерни юсюнде кюйдюрдю. 14Ол, къурманны ич хантхыларын бла аякъларын жуууп, къурман жерде, толусунлай кюйдюрюлген къурманны юсюнде кюйдюрдю.
15Андан сора Харун халкъны атындан къурман алып этгенди. Халкъны атындан гюнях ючюн къурман текени алып, сойду да, биринчи къурманны кибик, аны да гюнях ючюн къурманнга келтирди.
16Сора ол толусунлай кюйдюрюлген къурманны да адетича этди. 17Дагъыда, ол ётмек саугъаны келтирди да, андан ууучун толтуруп алып, къурман жерни юсюнде кюйдюрдю. Бу, эрттенликде толусунлай кюйдюрюлген къурманладан артыкъ къурманды.
18Халкъны атындан болгъан саламатлыкъ къурманнга бир бугъа бла бир къочхар келтирди. Уланлары анга союлгъан малланы къанындан бердиле да, Харун аны къурман жерге тёрт жанындан бюркдю. 19Бугъаны бла къочхарны жауларын а – куйрукъларын, бюйреклери юсюндеги жауларын эм бауурларыны жауларын – 20ол къурманны тёшюне салып, къурман жерни юсюнде кюйдюрдю. 21Мусса буюргъаны кибик, Харун къурманны тёшюн бла онг бутун кётюрюп, Раббийни аллына кётюрюлген саугъагъа келтирди.
22Харун гюнях ючюн къурманны, толусунлай кюйдюрюлген къурманны эм саламатлыкъ къурманны келтиргенден сора, халкъгъа айланып, къолларын кётюрдю да, анга алгъыш этди эм къурман жерден тюшдю.
23Сора Мусса бла Харун Тюбешиу Чатыргъа кирдиле. Андан чыкъгъандан сора, ала халкъгъа алгъыш айтдыла. Ол заманда Раббийни аламатлыгъы битеу халкъгъа кёрюндю. 24Раббийни аллындан от чыгъып, къурман жерни юсюндеги къурманны кюйдюрдю. Битеу халкъ аны кёргенде, къууаннгандан къычырып, жерге беттёбен аугъанды.
Currently Selected:
Лебийлиле 9: МалкъСК
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Институт перевода Библии, 2020-2024