Лебийлиле 4
4
Гюнях ючюн къурман
1Раббий Муссагъа былай айтханды:
2– Исраил улулагъа былай айт: билмегенлей, Раббийни буйрукъларындан биринде айтылгъан затны бузуп, гюнях алгъан инсанны юсюнден жорукъ буду.
3Майланнган#4:3 Биреуню къуллукъгъа салгъан заманда аны майлагъан эте эдиле. Аллай майлау файхамбарлагъа, патчахлагъа эм дин къуллукъчулагъа этиле эди (къ. 8 баш). дин къуллукъчу гюнях этип, халкъны башына терслик келтирсе, гюнях этген адам, гюняхы ючюн къурманнга, Раббийге къыяусуз бугъа келтирсин. 4Ол бугъаны Тюбешиу Чатырны эшигине келтирсин, къолун аны башына салсын да, Раббийни аллында сойсун. 5Майланнган дин къуллукъчу ол бугъаны къанындан алып, Тюбешиу Чатыргъа кирсин. 6Анда дин къуллукъчу бармагъын къаннга сугъуп, аны Раббийни аллында, Эм Сыйлы Мекямны жабыууну аллында жети кере бюрксюн. 7Сора дин къуллукъчу Раббийни аллында, Тюбешиу Чатырындагъы ариу ийисли хансла кюйдюрюр ючюн ишленнген жерни мюйюзлерине бираз къан жакъсын. Бугъа тананы къалгъан къанын Тюбешиу Чатырны эшигини къатында тургъан, толусунлай кюйдюрюлген къурман этилиучю жерни тюбюне тёксюн. 8Дин къуллукъчу гюнях ючюн къурманнга келтирилген бугъадан битеу ич жауун чыгъарсын. Ич жауну, 9эки бюйрегин бла аланы жауун, бутларындагъы жауну эм баууруну жауун айырсын. 10Саламатлыкъ къурманнга келтирилген тууарны жауу алыннганы кибик этсин. Сора дин къуллукъчу аланы толусунлай кюйдюрюлген къурман этилиучю жерде кюйдюрсюн. 11Бугъа тананы терисин бла этин, башын бла аякъларын, ичин бла кирлерин а, 12бугъаны битеу къалгъан затларын къонушдан#4:12 Къонуш – лагерь; чатырлада бир бёлек заманнга дери адамла тохтагъан жер. тышына, кюл тёгюлген бир таза жерге чыгъарсын да, отунла юсюне салып, кюйдюрсюн.
13Исраилни битеу жамауаты Раббийни буйрукъларындан биринде айтылгъан затны билмегенлей бузуп, гюнях этсе, халкъ аны таза да билмей окъуна этсе да, терслиги аны боюнундады. 14Этген гюняхы анга ачыкъ болгъан заманда, жамауат гюнях ючюн къурманнга бир бугъа алып, Тюбешиу Чатырны аллына келтирсин. 15Жамауатны тукъум таматалары Раббийни аллында къолларын бугъаны башына салсынла да, Раббийни аллында сойсунла. 16Сора майланнган дин къуллукъчу бугъаны къанын Тюбешиу Чатыргъа кийирсин. 17Бармагъын къаннга сугъуп, аны Раббийни аллында, жабыуну аллында, жети кере бюрксюн. 18Сора Тюбешиу Чатырны ичинде, Раббийни аллындагъы, хансла кюйдюрюлген жерни мюйюзлерине бираз къан жакъсын. Бугъаны битеу къалгъан къанын а Тюбешиу Чатырны эшигини къатында тургъан толусунлай кюйдюрюлген къурман этилиучю жерни тюбюне тёксюн. 19Битеу ич жауун чыгъарсын да, аны къурман жерде кюйдюрсюн. 20Гюнях ючюн къурман бугъагъа этилген затланы этсин. Алай бла, дин къуллукъчу халкъны тазалар, эм халкъны гюняхы кечилир. 21Сора ол бугъаны къонушдан тышына чыгъарсын да, биринчи бугъаны кюйдюргени кибик, аны да алай кюйдюрсюн. Бу – жамауат этген гюнях ючюн къурманды.
22Жамауатны бир бачамасы билмегенлей Раббий Аллахыны буйрукъларындан биринде айтылгъан затны бузуп, гюнях этсе, терслиги аны боюнундады. 23Этген гюняхы анга ачыкъ болгъан заманда, ол гюнях ючюн къурманнга къыяусуз теке келтирсин, 24къолун текени башына салсын да, аны Раббийни аллында, толусунлай кюйдюрюлген къурманла союлгъан жерде сойсун. Бу – гюнях ючюн къурманды. 25Дин къуллукъчу бармагъын гюнях ючюн къурманны къанына сугъуп, толусунлай кюйдюрюлген къурман этилиучю жерни мюйюзлерине жакъсын, къалгъан къанны уа къурман жерни тюбюне тёксюн. 26Битеу ич жауун, саламатлыкъ къурманны жауун кибик, къурман жерде кюйдюрсюн. Алай этип, дин къуллукъчу бачаманы гюняхындан тазалар да, аны гюняхы кечилир.
27Халкъдан бир адам, билмегенлей, Раббийни буйрукъларындан биринде айтылгъан затны бузуп, гюнях этсе, терслиги аны боюнундады. 28Этген гюняхы анга ачыкъ болгъан заманда, ол гюнях ючюн къурманнга къыяусуз эчки келтирсин, 29къолун гюнях ючюн къурманны башына салсын да, аны толусунлай кюйдюрюлген къурманла союлгъан жерде сойсун. 30Дин къуллукъчу бармагъы бла къанындан алып, толусунлай кюйдюрюлген къурман этилиучю жерни мюйюзлерине жакъсын, къалгъан къанны уа къурман жерни тюбюне тёксюн. 31Битеу ич жауун, саламатлыкъ къурманны жауун кибик, айырсын да, аны, Раббийге жагъымлы ийис этер ючюн, къурман жерде кюйдюрсюн. Алай этип, дин къуллукъчу ол адамны тазалар да, аны гюняхы кечилир.
32Биреу гюнях ючюн къурманнга къозу келтирсе, къыяусуз тиши мал болсун. 33Гюнях ючюн къурманны башына къолун салсын да, аны толусунлай кюйдюрюлген къурманла союлгъан жерде сойсун. 34Дин къуллукъчу бармагъы бла гюнях ючюн къурманны къанындан алып, толусунлай кюйдюрюлген къурман этилиучю жерни мюйюзлерине жакъсын, къалгъан къанны уа къурман жерни тюбюне тёксюн. 35Битеу ич жауун, саламатлыкъ къурманнга келтирилген къозуну жауун кибик, айырсын да, аны, Раббийге отда кюйдюрюлген къурманла бла бирге къурман жерде кюйдюрсюн. Алай этип, дин къуллукъчу аны этген гюняхындан тазалар да, гюняхы кечилир.
Currently Selected:
Лебийлиле 4: МалкъСК
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© Институт перевода Библии, 2020-2024