Mateyo 27
27
Yesu bamutwala kuli Pilato
(Mk. 15.1; Luk. 23.1-2; Yoh. 18.28-32)
1Ulo bwachele, intungulushi shabachipupila nabachilolo balipangene ukuti bepaye Yesu. 2Bakakile Yesu nokumutwala kuli Pilato, kateka wabena Loma.
Yuda ayikulika
(Mil. 1.18-19)
3Ulo Yuda uyo uwamwembwile, abwene ukuti Yesu apelwa umulandu wakumwipaya alilangulukile, nokubwesha indalama shabuseke amakumi atatu, kuntungulushi shabachipupila nabakulu ba Bayuda nokuti, 4“Nabifya pakwembula umuntu uutakwetepo mulandu.”
Nabo basosele ati, “Napo uyo mulandu wesu? Mulandu obe wenka.”
5Elo Yuda aposele indalama shabuseke nshilya panshi munanda yaku Lesa nokufumamo. Elo ayile kuyikulika.
6Ulo intungulushi shabachipupila shatolele indalama shabuseke nshilya nokusosa ati, “Nshi ndalama tashasuminishiwapo mumafunde esu ukushibika muchipawo chananda yaku Lesa iyowo, pantu nindalama shamulopa.” 7Echo balipangene ukwebati indalama nshi bashitemo ibala lyakwa kabumba wanongo, umwakushika abalwendo. 8Echo ukufikila nankano kasuba, ndi ibala litwa ati, “Ibala Lyamulopa.”
9Nomba ifyasosele umusoseshi Yelemiya fyalifikilishiwe, “Babulile indalama shabuseke amakumi atatu, umutengo bamupingwile kubena Isilaeli. 10Elo bashitilemo ibala lyakwa kabumba wanongo, ukulingana nefyo Bashikulu banjebele.”
Pilato afumba Yesu
(Mk. 15.2-5; Luk. 23.3-5; Yoh. 18.33-38)
11Batwite Yesu kuli Pilato, kateka wabena Loma. Elo Pilato amufumbile ati, “Napo webo niwe Mfumu ya Bayuda?”
Yesu amwasukile ati, “Wasosa!” 12Nomba intungulushi shabachipupila nabachilolo balikumwebela ifintu ifinji. Yesu ena akutumene bwaka.
13Elo Pilato amufumbile ati, “Napo taumfwilepo nji milandu bakokupela?”
14Nomba Yesu akutumene bwaka, taasukilepo ishiwi nangu limo iyowo, asuka kateka chamupesha namano.
Pilato apingwila Yesu ukufwa
(Mk. 15.6-15; Luk. 23.13-25; Yoh. 18.39—19.16)
15Panshita ya Chakulya chakuchilila, kateka wabena Loma alikubakakwilapo umufungwa umo uwo ichintu-bwinji chafwaya. 16Kanshi panshita njilya kwaliko umufungwa umo uwali akapondo uwalikwitwa Balabasi. 17Ulo balongene, Pilato asosele kuli bo ati, “Kanshi ninani uwo mukofwaya ukuti mukakwile, Balabasi nangula Yesu uwitwa Klistu?” 18Pakuti Pilato alishibile ukuti nipamulandu wamufimbila batwalile Yesu kuli ye.
19Ulo Pilato achili alikele pachipuna chabupingushi, umukashi wakwe alitumine amashiwi kuli ye ati, “Wichitapo kantu nangu kamo pali uyo muntu, wakaele. Pakuti ndichulile ukwinekantu muchoshi pamulandu wakwe.”
20Nomba intungulushi shabachipupila nabakulu ba Bayuda batunkilishe abantu ukuti balombe Balabasi, kuntu Yesu ye bamwipaye.
21Elo kateka abafumbile ati, “Ninani pali mba babili uwo mukofwaya ukuti mukakwile?”
Nabo balyasukile ati, “Balabasi.”
22Pilato alibafumbile ati, “Nomba nchite nakwe shani Yesu uwitwa Klistu?”
Bonse balyasukile ati, “Musamikeni pamutashi!”
23Elo Pilato abafumbile nakambi ati, “Mba mulandu ndo achitile?”
Nabo balibilikishe ukuchilapo bati, “Musamikeni bwaka.”
24Ulo Pilato abwene ukwebati mwali ukutalikishanya mubantu, abulile amenshi nokusamba kuminwe yakwe pamenso yabantu. Elo asosele ati, “Tanshikwetepo umulandu pamfwa yamuntu ngu. Chiteni icho mukofwaya mwebene.”
25Abantu bonse balyasukile ati, “Umulandu ube pali fwe napabana besu.”
26Penkapo Pilato abakakwile Balabasi. Elo apingwile ukuti Yesu bamupande ifikoti, elo panuma bakamusamike pamutashi.
Abashilikali basekuluka Yesu
(Mk. 15.16-20; Yoh. 19.2-3)
27Penkapo abashilikali bakwa kateka batwite Yesu kunanda yakwa kateka. Balongenye bonse abashilikali banabo nokushinguluka Yesu. 28Bamufulile amalaya akwe nokumufwika umwinjila uufitulukile. 29Elo baanine ing’ana yaminga nokumufwika kumutwi. Bamufumbatike itete muminwe yakwe kumulyo. Elo bamufukamine nokumusekuluka ati, “Mutendepo, we Mfumu ya Bayuda.” 30Bamushipile amate nokumupamaula umusako pamutwi. 31Ulo balekele ukumusekuluka, bamufulile umwinjila ngulya nokumufwika amalaya akwe nakambi. Elo bamutwite mukumusamika.
Basamika Yesu pamutashi
(Mk. 15.21-32; Luk. 23.26-43; Yoh. 19.17-27)
32Ulo balikuya munshila, bakumenye umwalalume umo, Simoni uwaku Sailini. Balimukakatishe ukupinta umutashi waku Yesu. 33Elo batwite Yesu kuchifulo ichitwa Gologota, ekwebati, “Ichifulo Chefupa Lyamutwi.” 34Kwenka nkulya bapele Yesu waini uwo basanshisheko indusha#27.34 waini basanshisheko indusha: wali umuti uululile uwalikulesha ukufinya. ukuti anwe. Nomba ulo asondele, Yesu alikene ukunwa.
35Ulo bamusamikile pamutashi, bachitile bumwine-mano pakwabana amalaya akwe. 36Elo bayikele panshi bakomusopa. 37Pamutashi, pamulu wamutwi wakwe, balembelepo amashiwi akulanga icho bamwipayilepo ati, “Ngu ni Yesu Imfumu ya Bayuda.” 38Basamikilepo notupondo tubili pamo na Yesu, kamo kumulyo, kambi nako kuchipiko.
39Abantu abalikupita munshila, balikumusalula ili bapuKKOKKGkumya nemitwi. 40Balikusosa ati, “Te we walikutwanga wati, ‘Kuti natobaula nanda yaku Lesa nokuyimaka munshiku shitatu.’ Ipulushe wenka wemwine. Kati niwe Mwana Lesa, wike pamutashi.”#Yoh. 2.19
41Intungulushi shabachipupila nabasambishi ba Mafunde nabachilolo nabo balikumusekuluka, bakososhanya ati, 42“Alikupulusha bambi, nomba chamukanga ukuyipulusha umwine! Nimfumu yabena Isilaeli, kayike pamutashi nafwe tukomuchetekela! 43Alichetekela muli Lesa nokusosa ati, ‘Nine Mwana waku Lesa. Nomba Lesa kamupulushe, kati nachine akomufwaya.’”
44Elo notupondo utwasamikilwe pamo nakwe, nato twalimwebawile kumo.
Imfwa yaku Yesu
(Mk. 15.33-41; Luk. 23.44-49; Yoh. 19.28-30)
45Nomba ulo akasuba kafikile pa 12 koloko, imfinshi yafimbile ichalo chonse ukufika panshita ya 3 koloko wachungulo. 46Pa 3 koloko penka Yesu ayawile neshiwi ilikulu ati, “Eloi, Eloi, lama sabakatani?” Ekweba ati, “Lesa wanji, Lesa wanji, nindo mwandekelesha?”
47Abantu bambi abayimakenepo pakumfwa, basosele ati, “Umfweni akoyita Eliya!” 48Bwangu-bwangu umbi alibutukile nokupinta umwepu. Autumpikile muli waini uusasamine, elo autungile kwitete nokumutambika Yesu ukuti anwe.
49Elo bambi basosele ati, “Lekeni tubone kati Eliya akoyisa kumupulusha!”
50Yesu alilile nakambi neshiwi ilikulu, nokufwa kafwa.
51Penkapo nechansalu icho balikuchinga munanda yaku Lesa chalyabakene pakati ukufuma pamulu ukufika napanshi. Ichalo chalitenkene ukwinekantu, elo namabwe alilepaukile. 52Imanda shalisukile, elo abantu abenji abachetekele muli Lesa abafwile balibukile ukufuma kubafwa. 53Balifumine mumanda, elo panuma yakubuka kwaku Yesu kubafwa, bayile Mumushi Wabuta. Elo balibwenekele nakubantu abenji.
54Ulo umukulu wabashilikali nambalya abo alikulonda nabo Yesu, babwene ichinkukuma nefyachitikile, balitinine ukwinekantu bati, “Nachine, ngu muntu aali Mwana waku Lesa.”
55Kwali nabanakashi abenji abalikutamba akatalamukila. Balikukonka nokupyungila Yesu ukufuma ku Galili. 56Mukati kebumba mwali Maliya Magadala na Maliya banyina Yemusi na Yosefe, nabanyina wabana bakwa Sebedi.#27.56 wabana bakwa Sebedi: Boneni ubulondoloshi pali Mateyo 20.20.
Ukushikwa kwaku Yesu
(Mk. 15.42-47; Luk. 23.50-56; Yoh. 19.38-42)
57Ulo kwali ichungulo, kwayishile umuntu uwitwa Yosefe. Ali musambashi uwafumine kumushi waku Alimateya. Naye ali wakusambila waku Yesu. 58Ayile kuli Pilato nokulomba ichitumbi chaku Yesu. Pilato alisuminishe ukuti bamupele. 59Epo Yosefe alibulile umubili nokupomba munsalu iiweme iyambafuta. 60Ayile kubika mumanda yakwe iyabwangu iyo afukwile mwibwe. Elo apilibwiilepo nebwe ilikulu pamulyango wamanda, nokuya kaya. 61Maliya Magadala na Maliya umbi balikele nkulya umulungatanya napamanda.
Balonda imanda
62Ulo bwachele pakasuba ke Sabata, intungulushi shabachipupila na Bafalisi, balongene kuli Pilato 63nokumweba ati, “We mfumu, twayibukisha ifyo ngulya uwabufi alikusosa ulo ali nobumi ati, ‘Nga shakumana inshiku shitatu nakubuka kubafwa nakambi.’ 64Echo ebeni abakulonda imanda ukufikila napakasuba kakulenga shitatu, epali abakusambila bakwe bayisa kumwiba. Elo bakwisa mukweba abantu ati, alibukile kubafwa. Ekwebati ubufi mbu ubwakulekelesha bwakubipisha ukuchila ubwakwamba.”
65Pakumfwa mfi, Pilato abebele ati, “Pinteni bamalonda baye mukulonda imanda ukubati nimfilya ifyo mwayishiba.”
66Echo balile, kabesalishapo pamulyango wamanda pakukambatikapo ichishibilo pebwe. Elo bashilepo abakulonda.
Currently Selected:
Mateyo 27: LalaNT
ማድመቅ
ያጋሩ
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
Chilala New Testament © Bible Society of Zambia, 1998.
