Proverbios 28
28
1Ti chojni jínahña la tinká kjónté kohya nkexro chréhe̱;
a̱ndá ti chojni jína la chrakonhña sin éxi ijnko koxra̱.
2Ti siín kjuanínkaon ijnko chjasin
la siín itsjé nkexro tjinkaon tꞌe̱to̱an,
kjánchó ti ó ijnko nkexro nohe tsꞌe̱to̱an
la siín kjuaxróxin ti chjasin a.
3Ti chojni nóa nchekjasóte ti sin nóa
la éxi ti ichrin tsa̱nka̱ tꞌaniá nchekꞌitjáña ti nkehe tsíkꞌóna.
4Ti nkexro tito̱he ti ley kuènté Díos, la tjikosáyehe sin ti chojni tjenka̱yáxinhña jína;
a̱ndá ti nkexro nchexiteyá ti ley la nínkakohen ti jehe sin.
5Ti chojni jínahña la tienxínhña sin nkexrín tsꞌejó sin ndoá;
a̱ndá ti nkexro titekaon Itꞌéni Díos la tja̱ko̱xi̱n kixin tienxín kaín nkehe.
6A̱ntsí jína ti chojni nóa chónta kjuasáye
ke ijnko chojni rico chꞌiyehe chojni.
7Ti chájan ndasoá nohe la nchexiteyá ti ley kuènté Díos;
a̱ndá ti chájan tꞌiton ti chojni kóchjinka, imá inie la jehó nchesuéhe̱ ti itꞌé.
8Ti nkexro tjacha itsjé chichaon kixin nchekjen iso chojni, la ndá tjanchia itsjé tsjachataón,
la Díos tsakítsjehe kaín la tsochjéhe chꞌan íjnko nkexro tjenka̱yáxin jína kixin sincheki̱to̱nhe̱n ti sin nóa.
9Ti nkojín nkexro tjinkakonhña tsihin ti nkehe kꞌue̱to̱an Díos
la kja̱xin Díos tsienhña ti nkehe tjanchia sin.
10Ti nkexro tsjachròe ti sin ndoá ixri kixin tsákja sin ti nti̱a jínahña,
la tsꞌitsínkayá sin ti tòye̱ kjuíchꞌéna sin,
a̱ndá ti sin jína tjejó la tsꞌáyéhe̱ sin ti nkehe jína.
11Ti chojni rico la tjenka̱yáxin kixin imá nohe;
kjánchó ti chojni nóa chaxín nohe la nohe kixin nduáhya tjenka̱yáxin ti sin a.
12Ti tsjacha ti chojni ndoá tjejó la tsꞌixin ijnko kia ijié;
a̱ndá ti tsjacha ti nkexro tjasin ijie̱, la kaín chojni tsochrakon la tsꞌejómá.
13Ti nkexro nchemá ti ijie̱ kjuasin la ninkehó tsjachahya;
a̱ndá ti nkexro chronka la ko tito̱he ti ijie̱, la Díos tsꞌóxika iji̱é sin.
14Díos ncheñao ti nkexro nkochríxín tjikosáyehe ti jehe chꞌan;
a̱ndá ti nkexro sinchecha a̱sén tsitekakonhña la tsi̱hi̱ sin ti kjuaxróxinhña.
15Éxi ijnko koxra̱ jie̱he o̱ éxi ijnko oso tꞌenxín kjinta
mé xi̱kaha ti chojni jínahña tꞌe̱to̱an ti chjasin tjejó ti sin nóa.
16Ti nkexro tꞌe̱to̱an chóntahya kjuaxrexinkaon jína la jehó tseé la ko sinchekjasóte chojni,
a̱ndá ti nkexro jína tjenka̱yáxin la tsjacha tsꞌe̱to̱an la tsjakꞌe itsjé nánó.
17Ti nkexro sákjuixin chjasin kꞌóñá ijnko chojni, la nkochríxín tsꞌajikinká sin hasta itsꞌen sin,
la í chájína í ninkexró tsjinki̱tsehya ti jehe sin.
18Ti nkexro chónta kjuasáye la nkochríxín tsjinki̱tsa Díos;
a̱ndá ti chojni nduáhya ixri la tsjasóte.
19Ti nkexro tꞌe̱nka̱ no̱nte̱e la jína tso̱kje̱he sin sinie sin;
a̱ndá ti nkexro séhe la sítjité tse̱e sin kjinta.
20Ti nkexro jína nchexiteyá la tsꞌáyéhe̱ sin kjuasàya,
a̱ndá ti nkexro jehó tóxakohen tsjacha nchónhña chichaon la tsjasóte.
21Jehya jína si̱nchekjasóte íjnko chojni chóntahya ijie̱;
kixin siín chojni la kjónté itꞌo̱ nio̱tja̱ ó takja sin la xi̱kaha ichꞌe sin.
22Ti nkexro imá tjinkaon tso̱rico,
la noehña kixin chrꞌéxi̱n la a̱ntsí tso̱nóa.
23Ti nkexro tjenduéhe ijnko chojni nduáhya itjen la chrꞌéxi̱n ti chojni xrenduéhe la imá tsjikosáyehe ti nkexro a;
a̱ndá ti chojni chénkahya ti nkexro nduáhya itjen, la tsjikosáyehya sin.
24Ti nkexro teéhe ti itꞌé la ko ìñé
la ndáchro kixin jehya ijie̱ tíha,
la tíha mé tóyóhe̱ ti chojni tsíkjàya xi̱kaha.
25Ti nkexro tóxríhi̱n tsochónta nchónhña nkehe la itje kjuanínkaon;
a̱ndá ti nkexro titekaon Itꞌéni Díos la jína tsjacha.
26Ti chojni ndáchro kixin jehó nohe la lo̱nti̱;
a̱ndá ti nkexro chónta kjuaxrexinkaon la jína tsjakꞌe.
27Ti nkexro tjinki̱tsa ti chojni nóa la sinchetjáñahña ninkehó;
a̱ndá ti nkexro tsjinki̱tsehya ti chojni nóa la nchónhña chojni sincheno̱to̱n ti jehe sin.
28Ti tsjacha ti chojni jínahña tsꞌe̱to̱an la tjejómá ti chojni jína;
a̱ndá ti ó tsꞌitjáña ti chojni jínahña la a̱ntsí tsjacha ti chojni jína ixri.
Currently Selected:
Proverbios 28: poeNTplus
ማድመቅ
ያጋሩ
አወዳድር
ኮፒ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2016, Wycliffe Bible Translators, Inc. All rights reserved.