Hosheya 1
1
1Ha de Dagwi Darwey a ha a Hosheya Beeri jeng de Uziya, na Yɔtam, na Ahas tanga Hɛzɛkiya bá sè begbɔng begwɔ̀m Yuda, ko Yɛrɔbɔwam Yɛhɔwash á sè gbɔng gwɔ̀m Israyɛl.
Hwâ Hosheya na nèy mɛ
2Jeng de Dagwi Darwey a hwo ha na BeIsrayɛl yi na Hosheya, a yang ɛ, “Ci wɔ̀ ra weneng devwes, na hwo tɔs nèy na yɛ, yaga bemât vwel o mwa ba sé ra nejwang, ba ga hala raà Dagwi Darwey.”
3Ano, Hosheya a ra weneng hwā de ba tang ɛ à Gɔmɛr, hwông Diblayim. Gɔmɛr o a hwo sey jim, ko a tɔ a yɛ hwey wen. 4Dagwi Darwey a yang Hosheya mo, “Vo a yɛ rezâ Yɛzrɛɛl, yaga ê ros wɛt na me wɔ̀ tabak lɔ Yehu, gbɔng gwɔ̀m Israyɛl yaga bemat de a mɔbɔs e Nɛk Yɛzrɛɛl. Ma sé kyè wɔ̀ wey na lɔ̂ negwɔm Israyɛl. 5Ko e jeng o mê wey na gâp bemât comô Israyɛl e Nɛk Yɛzrɛɛl o.”
6Gɔmɛr a to sey jim, a tɔ hwey hwong, ko Dagwi Darwey a yang Hosheya, “Vo a yɛ rezâ, Nevit Tɛ̂-Yey yaga mê to tɛ̀ yey na BeIsrayɛl kɛ me hala a yɛn neves mɛn wɛt. 7Ko mê dura a BeYuda tɛ̂ yey hom. Me, Dagwi Darwey, Dagwi mɛn mê sey ɛn, sana como, kɛ gbang, kɛ wal, kɛ bedwa na bemat como bedwa.”
8Bama de Gɔmɛr a ga kang hwóng mɛ Nevit-Tɛ̂-Yey ko a to sey jim, a tɔ hwey wen. 9Dagwi Darwey a yâng Hosheya, “Vo a yɛ reza, Bemat-Hom-Wɛt, yaga BeIsrayɛl ba sé bemat hom wɛt, ko ma sé Dagwi mɛn wɛt arɔng.”
Dagwi Darwey a rɔda toyo na BeIsrayɛl
10Jeng ye kyè vey de BeIsrayɛl bê gwɛ hɛn,
be sè pyak sede bazɛ̂k gworep,
vemo de be tɔk bara kɛ be masa vɛ wɛt.
Mwa ano de be tang ɛn à Bemat-Hom-Wɛt,
ko e jeng o bê tang ɛn, à Ney-Dagwi-Wo-Neken!
11BeYuda na BeIsrayɛl bê to ba wuna hɛn.
Yɛn ê kasa a bato mɛn mwât nuyel gwining.
Yɛn ê to gwɛ̌ hɛn pyak.
Ey, jeng Yɛzrɛɛl yê ba sè gbɔng jeng!
Currently Selected:
Hosheya 1: bomBI
ማድመቅ
ኮፒ
አወዳድር
ያጋሩ
ያደመቋቸው ምንባቦች በሁሉም መሣሪያዎችዎ ላይ እንዲቀመጡ ይፈልጋሉ? ይመዝገቡ ወይም ይግቡ
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
