Kutuuka 7
7
1Co Shukulu Kalunga wendekele kuli Mosesa ngwendi, “Kenga, njikakupwisa ngwe u Njambi kuli mwene, co ndolome yove Alone akendeka kuli ikeye ngwe muka-kwimanena wove. 2Leka Alone vyuma vyoshe vinjinakuleke, co ikeye akaleka mwene ecele vaIsalele ngeci vatunde mu lifuti lyendi. 3#Vil 7:36 Oloni yange njikakaluwisa mbunge ya mwene, co kakatava kukutolilila, nameme njikatumisa vizivukiso na vikomokeso vyakufwa vati mu Ingito. 4Mwene kakakutolilila asinoni njikaka cihiso cakama manene a Ingito, co njikatundisa miyati ya vanu vange mu Ingito. 5Vaka-Ingito vakazivuka ngeci kuma yange njapwa Kalunga, omo njikajundula livoko lyange a Ingito nakutundisa vaIsalele mu lifuti lyavo.” 6Mosesa na Alone valingile ngwe mwavashikile Shukulu Kalunga. 7A simbu ije omo vakendekele na mwene, Mosesa wakele na myaka 80, co Alone wakele na myaka 83.
Mulamu wa Alone ulimuka linyoka
8Shukulu Kalunga wendekele kuli Mosesa na Alone ngwendi, 9“Nga mwene ashaka ngeci musholole vukaleo vwakulinga vikomokeso, leka Alone ambate mulamu wendi, aumbile asi ku mesho a mwene, ngeci ukewo ukalimuke linyoka.” 10Ngecivene, Mosesa na Alone vaile kuli mwene valingile ngwe muje mwavashikile Shukulu Kalunga. Alone wombilile mulamu wendi asi ku mesho a mwene na vantwama vendi, co walimukile linyoka. 11Asinoni mwene wasanene vanu vendi vaka-mana na vaka-manseno, na vimbanda va mu Ingito, valingile muje vene na manseno avo. 12Vombilile milamu yavo asi, co ije milamu yemukile manyoka. Oloni mulamu wa Alone walewile milamu yavo. 13Nameme ngoco, mwene wakaluwisile mbunge yendi, ngwe vene muje mwendekele Shukulu Kalunga, mwene katavele kutolilila kuli Mosesa na Alone.
Vikomokeso mu Ingito
Cikomokeso cakulivanga ca maninga
14Asinoni Shukulu Kalunga wendekele kuli Mosesa ngwendi, “Mwene nakaluwisa mbunge yendi, navyana kwecela vanu vange vaye. 15Co ya, ukaliwane nendi ku mutondo omo alinakushelumuka ku Ndonga ya Nailo. Ambata uje mulamu walimukile linyoka uyenawo, co muvandamene ku ngenge ya ndonga. 16Co endeka kuli mwene ngwove, ‘Shukulu Kalunga, Njambi ya vaHevelu, nanjitumu kuli yove njikuleke ngeci wecele vanu vendi vaye vakamulemese mu mambo. Oloni na ololo yove shove kuveca. 17#Kuj 16:4 Ololo Shukulu Kalunga nendeka ngeci a cuma eci akeo ukazivukila evi vyakalinga. Kenga, njikapupa akamwa ya ndonga nou mulamu, co mema akemuka maninga. 18Visi vakatsa, co mu ndonga mukanika mwamuvi manene ngeci vaka-Ingito kuvakasa kunwamo mema.’ ”
19Shukulu Kalunga wendekele kuli Mosesa ngwendi, “Leka Alone ambate mulamu wendi awinike a vindonga vyoshe, naa vingunja, naa mashali a mu Ingito. Co mema akemuka maninga, co mu lifuti mwoshe mukakala maninga, na mu vishuwa vyakushonga vya viti na mu vinjava vya mamanya.” 20Asinoni Mosesa na Alone valingile ngwe muje mwavashikile Shukulu Kalunga ku mesho a mwene na vamyata vendi. Alone wajundwile mulamu wendi nakupupa akamwa ya ndonga, co mema amwo oshe emukile maninga. 21Co visi va mu ndonga vatsile, na ndonga yoshe yanikile mwamuvi ngeci vaka-Ingito kuvasele kunwamo mema. Mu Ingito mwoshe mwakele maninga. 22Co na vaka-manseno va mwene valingile muje vene mwalingile Mosesa na manseno avo, mwene wakaluwisile mbunge yendi ngeci muje vene mwalaja. Ngwe muje mwendekele Shukulu Kalunga, mwene wavyanene kutolilila kuli Mosesa na Alone. 23Oloni mwene welukile ku lipela lyendi kombileko mbunge ku cuma eci. 24Vaka-Ingito voshe vacokwele masima ku ngenge ya ndonga ngeci vawanemo mema akunwa, omwo vakevo kuvasele kunwa mema a mu ndonga. 25Co kwetile matangwa atanu na avali kutunda aje Shukulu Kalunga wapupile a ndonga.
Okuqokiwe okwamanje:
Kutuuka 7: MBB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible in Mbunda ©The Bible Society of Zambia, 2006