Kutuuka 14
14
VaIsalele vajavuka Lishali Lyakuvenga
1Asinoni Shukulu Kalunga wendekele kuli Mosesa ngwendi, 2“Leka vaIsalele veluke kunima, vakatunge cilombo kulutwe lwa Pi Hahilote, mukati ka Mingendole na Mema a Kalunga Akuvenga, kuyehi na Mbale Zefone. 3Co mwene wa Ingito akayongola ngwendi vaIsalele valinakwendangana nakulizenga mu lifuti, vanazimbala mu mambo. 4Ngecivene, njikakaluwisa mbunge ya mwene, akamikava oloni njikamuhyana na nzita yendi, co eci cikanjinenela kasingimiko. Asinoni vaka-Ingito vakanjizivuka ngwavo kuma yange njapwa Kalunga.” Co vaIsalele valingile ngwe muvavalekele.
5Omo mwene wa Ingito vamulekele ngwavo vanu va Isalele vanavomboloka, co ikeye na vamyata vendi vatengulwile viyongola vyavo vendekele ngwavo, “Vika tunatavela vaIsalele ngeci vavomboloke? Ololo tunajeneka vinzinda vetu!” 6Asinoni mwene wavwaesele likalu lyendi lya nzita amo na mashwalale vendi. 7Co wavwaesele makalu endi oshe, amo na aje amavwa manene akupwa 600, na vamyata vawo vaka-kuwendesa. 8Co Shukulu Kalunga wakaluwisile mbunge ya mwene, co ikeye wakavele vaIsalele, vaje vatuukile nakulisamba.#14:8 NAKULISAMBA: Nambe, mwisi yakwamena kwa Shukulu Kalunga. 9Mashwalale voshe va Ingito, na tuvalu voshe, na makalu, na vaka-kuwendesa vakavele vaIsalele, vavawanene kuje kuvatungilile cilombo cavo ku Lishali Lyakuvenga kuyehi na Pi Hahilote na Mbale Zefone.
10Omo vaIsalele vamwene mwene na mashwalale vendi vakina likuluta valinakwija mukuvalwisa, co vazivile manene lyova, co vatambekele kuli Shukulu Kalunga ngeci avakwase. 11Co vendekele kuli Mosesa ngwavo, “Kuma kumwesi vimbumbo mu Ingito! Kuma watunene muno mu mambo ngeci twakutsilemo ndi? Kenga oni eci ciwunalingi cakututundisa mu Ingito! 12Kuma kutwakulekele omo te kanda twije ngwetu eci cikalingiwa? Twakulekele ngwetu twecele tupwe vinzinda va vaka-Ingito. Mwamuvwa kupwa vinzinda kutuvakana kutsila muno mu mambo.”
13Mosesa wavakumbulwile ngwendi, “Kesi muzive lyova! Simpeni lika, mukamona evi vyakalinga Shukulu Kalunga mukumyamena ku litangwa lya lelo, ava vaka-Ingito kumukasa kuvamona lalo. 14Shukulu Kalunga ikeye akamilwilako, yeni nacimo cai cimukalinga.”
15Shukulu Kalunga wendekele kuli Mosesa ngwendi, “Omwo vikajo mulinakutambeka ngeci vamikwase? Leka vanu vaye kulutwe. 16Jundula mulamu wove, co wolwele akamwa ya mema a kalunga, co mema akalyangunuka, vaIsalele vakasa kwenda a livu lyakuma. 17Njikakaluwisa vimbunge vya vaka-Ingito ngeci vakavakave munima, co njikawana kasingimiko akuhyana kwange ali mwene, na mashwalale vendi, na makalu endi, na vaka-kuwendesa vendi. 18Omo yange njikavafungulula, co vaka-Ingito vakazivuka ngeci yange njapwa Kalunga.” 19Cooni kangelo ka Njambi, uje wakele kulutwe lwa mbunga ya vaIsalele, welukile munima yavo, co ije manda ya lishelwa lalo yelukile kunima yavo noo yakele 20mukati ka vaka-Ingito na vaIsalele. Co lishelwa lyalingisile lisusulungu kuli vaka-Ingito, oloni lyatwile ceke kuli vanu vaIsalele, co vaje mashwalale va Ingito na mbunga ya Isalele kuvasele kuliwana vutsiki vwoshe.
21Mosesa wolwele livoko lyendi akamwa ya mema a kalunga, co Shukulu Kalunga wahuwisile lihunzi lyakama lyatundile mu ngangela. Lihunzi lyahuhwile vutsiki vwoshe, co mema a kalunga omine cau. Co mema alyangunukile, 22#1 Koli 10:1-2; VaHe 11:29 ngecivene, vaIsalele vajavukile a mema a kalunga nakwenda a livu lyakuma. Mema emanene noku-noku ngwe vivumbe, ngeci vanu vendele mukati ka vivumbe vya mema. 23Co vaka-Ingito vakavele vaIsalele munima cwi na mu mema a kalunga na tuvalu twavo twoshe, na makalu, na vaka-kuwendesa. 24A mungulungengu, simbu kanda kukye, Shukulu Kalunga wakele mu manda ya tuhya na mu manda ya lishelwa, wakengele asi ku mbunga ya vaka-Ingito, co wavauya-wuyisile. 25Mavalo a makalu avo atomenene, ngeci vakevo vakele mu vukalu. Co vaka-Ingito vendekele ngwavo, “Tusezeni ava vanu Shukulu Kalunga alinakuvalwilako, co alinakulwisa yetu.”
26Co Shukulu Kalunga wendekele kuli Mosesa ngwendi, “Olola livoko lyove akamwa ya mema a kalunga ngeci mema akupule vaka-Ingito na makalu avo amo na vaka-kuwendesa.” 27Ngecivene, Mosesa wolwele livoko lyendi akamwa ya mema a kalunga, co omo litangwa lyatuukile mema alifwikile nakwiluka mu mwela wao. Co vaka-Ingito vesekele kutewa kutunda mu mema, oloni Shukulu Kalunga wavombilile mu mema. 28Mema elukile afwikile makalu, na vaka-kuwendesa, co mbunga yoshe ya vaka-Ingito vaje vakavele vaIsalele vanyongele mu mema a kalunga, naumo wai wasaleleo. 29Oloni vaIsalele vendele a livu lyakuma cau, co vendele mukati ka vivumbe vya mema noku-noku. 30Likelyo litangwa lije Shukulu Kalunga wamenene vanu vaIsalele kuli vaka-Ingito, co vaIsalele vamwene mitunu ya vaka-Ingito vanalala vanatsi ku ngenge ya mema a kalunga. 31Omo vaIsalele vamwene nzili yakama ya Shukulu Kalunga yahyanene nayo vaka-Ingito, vakomokele Shukulu Kalunga nakukulaela kuli ikeye nakukulaela lalo muli ngamba yendi Mosesa.
Okuqokiwe okwamanje:
Kutuuka 14: MBB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible in Mbunda ©The Bible Society of Zambia, 2006