Kutuuka 12
12
Ciwano ca Pasovala
1Shukulu Kalunga wendekele kuli Mosesa na Alone mu Ingito ngwendi, 2“Ngonde eyi#12:2 NGONDE EYI: Ngonde ya Avive (ikeyo lalo ngonde ya Nisane), ngonde yakulivanga ya vaHevelu kutunda akati ka kuwana nakweta akati ka Kuhu. ikapwa ngonde yakulivanga a mwaka kuli yeni. 3Lekeni mbunga yoshe ya Isalele ngeci a litangwa lyamulikumi ku ngonde eyi, munu na munu akaangule muna manga nambe muna membe ngwe ku naanga yendi. 4Co nga mu naanga yendi vapwa vavandondo kumanesa kulya uje cimuna woshe wamutunu, co vakalipangelaye na vandambo vendi vaje vanalyata navo, ngwe ku vungi vwa vanu nakumona ngeci munu na munu alya vungai. 5Munapande kwangula manga nambe membe, oloni napande kupwa nkomba wa mwaka umo wakujeneka kapenga. 6Ngecivene, mukavanyunga noo a litangwa lyamulikumi na awana ku ngonde, co ku cingwezi mbunga yoshe ya Isalele vakatsiye vaje vimuna. 7Asinoni vanu vakanoneko amo maninga nakuwakwita a vivuliko vya vikolo na akamwa ya vipamba ku vinjuvo kuje kuvakalila vaje vimuna. 8Co a vutsiki vuje vene vakalya ije situ yakwoca, vakailye amo na visapa-sapa vyakulula amo na makende akujeneka musima. 9Kesi muyilye yaivishu nambe yakuteleka, oloni yoshe ipwe yakwoca, amo na mutwe, na mendi, na vya mwimo. 10Kumwapandele kusezako imo noo mutondo, nga kunasala imo, co mwapande kuyenyeka. 11Mukailya vwasi-vwasi oku munazala vuzalo vwakwenda navwo, na vin̄aku ku mendi eni, na milamu yeni ku mavoko. Cikeco Ciwano ca Pasovala cakunjilemesa yange Kalunga.
12“A vutsiki vuje njikaita mu lifuti lya Ingito, njikatsiya vana va vanalume voshe va va ntwatwa va vanu, na ava va tusitu vakulivanga kusemuka. Co njikahisa vinjambi voshe va mu Ingito, yange njapwa Kalunga. 13#VaLe 23:5; Kul 9:1-5; 28:16; Kwi 16:1-2 Maninga aa vipamba anapu cizivukiso ca cimweso mu vinjuvo evi mulinakukala. Omo njikamonao maninga, co njikamijomboka, kunjikamivulumuna omo njikahisa vaka-Ingito. 14Munapande kulisamba a litangwa eli omwo likapwa lya ciwano ca Kalunga mukumyanukisa a vyuma evi vinjalingile yange Kalunga. Eci cikapwa canukiso mu visemwa vyeni vyoshe vya kulutwe.”
Ciwano ca Makende Akujeneka Musima
15Shukulu Kalunga wendekele ngwendi, “A matangwa atanu na avali kumwapandele kulya makende akwaka musima. Lyeni lika makende akujeneka musima. A litangwa lyakulivanga munapande kutundisa musima woshe mu vinjuvo vyeni, nga umo a simbu ya matangwa aje atanu na avali alya makende akwaka musima, co ikeye kakapu lalo umo wa vanu vange. 16A litangwa lyakulivanga, co lalo a litangwa lyamucitanu na avali, mukakunguluka nakunjilemesa. Co kesi mukapange a matangwa aje, oloni kuvwaesa lika vyakulya. 17Nyungeni Ciwano ca Makende Akujeneka Musima omwo a litangwa eli likelyo njatundisile miyati yeni mu Ingito. Eci cikapwa canukiso mu visemwa vyeni vyoshe vya kulutwe. 18Kumwapandele kulya makende akwaka musima, kutunda ku cingwezi ca litangwa lyamulikumi na awana ku ngonde yakulivanga, kutwala ku cingwezi ca litangwa lyamumakumi avali na limo. 19Kesi mukakale musima mu vinjuvo vyeni a matangwa aje atanu na avali, co nga umo weni alya cuma coshe-icoshe cakwaka musima kakapu lalo umo wa vanu vange, nambe kavushoko keni nambe muka-kwija. 20#Kut 23:15; 34:18; VaLe 23:6-8; Kul 28:17-25; Kwi 16:3-8 Kesi mulye cuma coshe cakwaka musima, lyeni lika makende akujeneka musima yeni voshe.”
Ciwano cakulivanga ca Pasovala
21Asinoni Mosesa wasanene vakulunu voshe va Isalele, wendekele kuli vakevo ngwendi, “Munu na munu aangule muna manga nambe muna membe, co mutsiyeni, ngeci naanga yeni valisambe a Ciwano ca Pasovala. 22Co noneni kacishamo ka hisope,#12:22 HISOPE: Hisope inalifu na lunembwe. kambwitikeni mu lilonga muje muli maninga a cimuna, kwiteni aje maninga a vivuliko vya cikolo na akamwa ya cipamba ca njuvo, naumo wai akatuuka anja ya njuvo noo mutondo. 23#VaHe 11:28 Omo Shukulu Kalunga akaita mu Ingito nakutsiya vaka-Ingito, co ikeye akamona maninga a cipamba ca cikolo ca njuvo, co kakatavesa uje Kangelo Muka-kutsiya kukovela mu vinjuvo vyeni nakumitsiya. 24Yeni, na vatekulwila veni, munapande kwononoka lishiko eli lya canukiso ku myaka yoshe ya kulutwe. 25Co omo mukakovela mu lifuti lije Shukulu Kalunga walikulaesele kumyanalyo, munapande kunyunga cilika eci. 26Omo vana veni vakamihula ngwavo, ‘Cilika eci cinemanena vikajo?’ 27Co mukavakumbulula ngweni, ‘Eci cinemanena kukombelela cimuna wa Ciwano ca Pasovala mukusingimika Shukulu Kalunga, omwo ikeye wajombokele a vinjuvo vya vaIsalele mu Ingito. Watsiile vaka-Ingito, oloni yetu watusezeleo.’ ”
Co vaIsalele vatsikamene a mavuli nakulemesa. 28Asinoni vanu va Isalele valingile vije vyashikile Shukulu Kalunga kuli Mosesa na Alone.
Kutsa kwa va ntwatwa va vaka-Ingito
29Mukati ka vutsiki Shukulu Kalunga watsiile va ntwatwa voshe va vana va vanalume mu Ingito, kushangumukila kuli muna mwene uje akashwana a litanda kweta, na kuli muna cinzinda mu kamenga, co watsiile lalo vana va vimuna va nkomba vakulivanga kusemuka. 30Co ku vutsiki vuje, mwene na vamyata vendi, na voshe vakwavo vaka-Ingito vakasumukile. Co kwakele kulila kwakama manene mu Ingito, omwo kukwakele njuvo imo yasaleleo yakujeneka kutsa mwana wa ntwatwa wa munalume. 31Vutsiki vuje vene, mwene wasanene Mosesa na Alone wendekele ngwendi, “Tundeni, yeni na vaIsalele! Sezeni lifuti lyange! Yeni mukalemese Shukulu Kalunga, ngwe mumwalombele. 32Yeni amo na vimanga veni, na vimembe, na vingombe ngwe mumunendeka. Co lalo njilombeleleniko civezikiso.”
33Vaka-Ingito vasindiiye vanu ngeci vazambule kutunda mu lifuti, co vendekele ngwavo, “Yetu voshe tukatsa nga kumutundumo muno.” 34Ngecivene, vanu vashulisile vitikilo vyavo na mikasha ya musima, co vavizengelele a vinanga, vavyambatele a vitsili vyavo. 35Co vaIsalele valingile ngwe mwavalekele Mosesa, valombele vaka-Ingito vyakuzala vya senga vya ngolinde na siliva na vuzalo lalo. 36#Kut 3:21-22 Shukulu Kalunga walingisile vaka-Ingito kusingimika vanu va Isalele kuvana vije vivavalombele. Mu ngila eyi mukemwo vaIsalele vambatele vufuko vwa vaka-Ingito.
VaIsalele vatunda mu Ingito
37VaIsalele vatundile mu Lamesese a mendi vaile ku Sukote. Vanalume vapwile 600,000, kwakako vanakazi na vanike. 38Co mbunga yakama ya vanu veka vaile amo navo na matanga a vimanga, na vimembe, na vingombe. 39Vatikile makende akujeneka musima a mikasha ije vatundile nayo ku Ingito, omwo vavashekele cishitumukila mu Ingito, co kuvakele na simbu yakuvwaesela cimweja vyakulya vya vungenzi.
40 #
Kus 15:13; Ngala 3:17 VaIsalele vakele mu Ingito myaka 430. 41Co a litangwa lije vene vamanesele myaka 430, miyati yoshe ya vanu va Shukulu Kalunga vatundile mu Ingito. 42Vukevwo vutsiki vuje vwavanyungile Shukulu Kalunga omo wavatuwisile mu Ingito. Ovu vukevwo vutsiki vumo vwakulikundika kuli Shukulu Kalunga ku visemwa vyoshe vya kulutwe, vutsiki vuje vaIsalele vanapande kuvunyunga.
Mashiko aa Ciwano ca Pasovala
43Co Shukulu Kalunga wendekele kuli Mosesa na Alone ngwendi, “Awa akewo mashiko aa Ciwano ca Pasovala. Kukwesi muka-kwija akalya ku vyakulya vya Ciwano ca Pasovala, 44oloni ndungo asa kulyako nga akulivanga munamutuula. 45Oloni munu uje naija nakukala neni kasimbu lika, nambe uje naija lika mukupanga, kesi alyeko. 46#Kul 9:12; Yow 19:36 Vyakulya evi vakavilile lika mu njuvo muje muvanavivwaeselele, kesi vakavituwise anja embwe. Co kesi mukapokole lalo citsiya ca uje cimuna. 47Mbunga yoshe ya Isalele vanapande kunyunga ciwano eci, 48oloni kukwesi munu wakujeneka kutuuka akalyako. Nga muka-kwija natungu akati keni ashaka kulisamba a Ciwano ca Pasovala mukulemesa Shukulu Kalunga, co munapande akulivanga kumutuula na vanalume voshe va ku njuvo yendi. Asinoni mukamupangesa ngwe umo wa vaIsalele, co akakala amo neni mu ciwano. 49Kukakala lishiko limo kuli vanu va Isalele na kuli vaka-kwija ava vanatungu akati keni.” 50Co vaIsalele voshe vononokele nakulinga vije vyashikile Shukulu Kalunga kuli Mosesa na Alone. 51A litangwa lije Shukulu Kalunga watuwisile miyati ya vaIsalele kuvatundisa mu Ingito.
Okuqokiwe okwamanje:
Kutuuka 12: MBB
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
The Bible in Mbunda ©The Bible Society of Zambia, 2006