Iŋɛ́nínɛ yi Isáaŋ 5
5
Kálatɛ unyɛɛ́ ne pilití
1Yoond yɛɛ́n kálatɛ aŋákálá ɛlɛɛ́ akan, kɔ́ ɔmbɔ́k wɔɔnɛ́m ú mɔɔnd unyɛɛ́ ɔnyɔ́l kí indáŋa; kálatɛ wɛɛ́tɛ ne metile piáyí piim, ɛfɛlɛ́n ne pilití pítíndátɔ́neémue. 2Yɛɛ́n kikaaka kí Éŋele, kíkála mɔkɔ́n, kíɔyɔ ɛ́ɛ́: «Ɛ́nyɛ́ unyɛɛ́ na pukaaka pú kufuun pilití ó kuómbun kálatɛ?» 3Tɛ ɛ́ɛ́ mɔɔnd ɛ́ɛ́nɛk mɛnɛ́mɛnɛ́ɛ, e kúúsí tɛ iŋúsíkúsíe umaápá na pukaaka pú kufuun kálatɛ wɛɛ́tɛ tɛ pú kusóóti niíns nɛkɛtɛ́ɛ. 4Yaapaŋa kutek aná mɔɔnd mɛɛ́lɛ́ utiɛ́nɛ́k na pukaaka pú kufuun kálatɛ, tɛ pú kusóóti niíns nɛkɛtɛ́ɛ. 5Atambatámb omoti ɛ́ɛ́pí kɔk káámɛ ɛ́ɛ́: «Atiandá apaŋɛt. Yoósíni: aŋuali ú nisíp ní Yúta, indandɔ́ i efuŋ Tafíit mányɛ́ɛ́n; unyɛ pókuolun pilití, no kuómbun kálatɛ.» 6Ɛ́ kikɛtɛ́kɛtɛ́ɛ kí indáŋa na piluŋaluŋa epie píni ɛ́ kikɛtɛ́kɛtɛ́ɛ kí patambatámb, yɛɛkɛɛ́n mɔnɔ́ kitúúmbɛ́ɛ etényí, uyoosonin ɛlɛɛ́ pésiesikit wɔ́. Umapá nɔ mulɔŋ mútíndátɔ́neémue ne eŋís átíndátɔ́neémue yɛ́nyɛɛ́ piliínditíe pítíndátɔ́neémue Támbák maátɔ́m e kúúsí kuum. 7Mɔnɔ́ kitúúmbɛ́ɛ weepísíít, waapákɔn kálatɛ kɔ́ ɔmbɔ́k wɔɔnɛ́m ú sɔ́k unyɛɛ́ ɔnyɔ́l kí indáŋa. 8Umɛɛlɛ́ upákuna kálatɛ, piluŋaluŋa epie píni na patambatámb pɛ́nyɛɛ́ nitín ne péni péesukin mɔnɔ́ kitúúmbɛ́ɛ tunúú e kúúsí. Siki mɔɔndɛ nɔ nikɔnyɛ́ nɔ mukɔ́pɔ mú kóol muwóónón ne peelepínde; peelepínde pakáánɛ́ pɛ́nyɛɛ́ imbísókólí sí peétépí pé Yésus. 9Pɔ́tɔ́ŋɔn Mɔnɔ́ kitúúmbɛ́ɛ asak wɔɔkɔ́si, wɔ́ɔyɔ ɛ́ɛ́: Anyɛ na pukaaka pú kukɔ́l kálatɛ no pú kuolun pilití, ó pusíó ɛ́ɛ́ pɔ́mɔkuɔ́n, manɔ́ŋ mááwɔ móond mááŋɔn pɛɛnd ké ésípi yeem, pá tukál tuum, pá punya pitɔŋɛ piim ó pusíó pú Támbák 10Ekeéyi pɔ́ nikúli na pafunɔ́fɔn pá Támbák; páányípá pefuŋ é kuendesi pɛɛnd pé kúúsí. 11Yaand oyoosin, yɔɔ́p ekelú ú pulúmbín pú Peéŋele pá Támbák, pámapá kutek ɛlɛɛ́ tɔɔ́ŋ; pɔ́ɔpɔŋ indáŋa, piluŋaluŋa na patambatámb. 12Pɔ́tɔ́ŋɔ mɔkɔ́n, pɛ́ɛlɛ ɛ́ɛ́: «Mɔnɔ́ kitúúmbɛ́ɛ pɔ́mɔɔ́n ɛ́ɛ́kɛɛsikɛnɛn kupia pukaaka, punɛ́m, tutátɔ́, imbekí, nukanyi, nuúmu no kiómoko.» 13Yɔɔkɔɔ́p andíkɛ́k piluŋaluŋa kitikit pínyɛɛ́ mɛnɛ́mɛnɛ́ɛ, e kúúsí, iŋúsúkúsíe na ká asaá nɛkɛtɛ́ɛ, piluŋaluŋa pí Támbák piim, tɔ́ŋɔ ɛ́ɛ́: «Ɛ́nyɛɛ́ kiómoko, nukanyi, nuúmu na pukaaka pá niap ní ewú unyɛɛ́ ɔnyɔ́l kí indáŋa nɛɛyɛ́ nɔ mɔnɔ́ kitúúmbɛ́ɛ é teeníík neníík!» 14Piluŋaluŋa epie píni áátapan: «Anakáánɛ́!» Posíósíó péesuk tunúú e kúúsí ó kuómokosi ewú unyɛɛ́ ɔnyɔ́l kí indáŋa nɛɛyɛ́ nɔ mɔnɔ́ kitúúmbɛ́ɛ.
© 2026, CABTAL