2 Kɔlɛnt 3
3
Peelímoólí pá nikál niikɔ́si
1Tukaand kuamba ɛ́ɛ́ túpíák ó pusíó pasú muɛ́t á? Kúnyaánɛ tuákaamba ɛlɛɛ́ pɔsɔ́k pólotí imbɔp sítúfáánɛ́ɛ pukaaka káánɔ́, kúnyaánɛ túnúówun á? 2Ɔmbɔp wáásɔ́ nyɛ panúɛ, únyɛ ɔŋɔ́ŋɔ́n káásɔ́ kí itɛ́m, pɛɛnd kitikit nyɛ kumenyi na kulááŋa wɔ. 3Púnyɛ kémuémue ɛ́ɛ́ nunyɛ ɔmbɔp ú Kilíis umaátúfá á pusɔ́m, útipá ɔŋɔ́ŋɔ́n nɔ ɔmbɔk, maná ne emfún ú Támbákɛ́ɛ wɔɔkɔ́si, kútipá ká atányí, maná káánɔ́ kí itɛ́m. 4Pipíóndínyí ɔtɛ́m pikáánɛ́ tupianɛ́ɛ á Támbák é Kilíis. 5Pútipá káásɔ́ kí imbekí tunyɛɛ́ kuɛl puandá pasɔ́ pééŋényí, maná á Támbák imbekí túólinonée. 6Wúú wéényítúéyí peelímoólí pá nikál niikɔ́si, nítipá ní kikotí kínyɛɛ́ kiɔ́ŋɔ́, maná ní Emfúnukufúúmɛ; Á kiákí, kikotí kínyɛɛ́ kiɔ́ŋɔ́ ɔ́ɔ́kɔɔ́nɔnɛn, maná Emfúnukufúúmɛ éékeekenyi kusɔ́t. 7Tukál tú pikotí mapá tuɔ́ŋɔ́ ká atányí, Moyíis mapá ó puólí pú pikotí píekenyé nikú. Tɛ anakáánɛ́ pusɔ́m pukáánɛ́ éékenyi wɔ́ kiandákáand kí nukanyi. Tɛ mɔnɔ́ Isilaɛl timapá kutémbi wɔ́ eŋis ó pusíó na nukanyi nukáánɛ́ númaápunya, naánɛ́ kɔk ɛ́ɛ́ nútipá núkííka, 8tiɛkíɛ́ kɔk pusɔ́m pú Emfúnukufúúmɛ tiányípá kusol ɔyɔkɔn é kueki kiandákáand kí nukanyi? 9Índɛ kɔk pusɔ́m púpɛnɛnɛ́ mapá na nukanyi, tiɛkíɛ kɔk pusɔ́m pútúákanɛ́ indɛ́ndɛ́nɛ tiányíkányinɛ́ɛ kɔk kutápɔk? 10Nukanyi nú kikotí nyɛ sɛ́kísɛ́k, índɛ tusieketi núú á nukanyi nú Emfúnukufúúmɛ núpunyanɛ́ táásɛ. 11Epú púmaápá pútápukan, mapá puwóónón na nukanyi, tiɛkíɛ kɔk pú tenííké nyɛɛ́ kupa? 12Á pitálɛ́n ɛtɔ pikáánɛ́, tuákála tɛ puwaá kɔ́ ɔtɛ́m. 13Tutipá tuɛlɛ ɛlɛɛ́ Moyíise umaápá upíkindiken pusíó na kilaá ɛ́ɛ́ paán pí Isilaɛl tiɛ́n kuman kú nukanyi nútiányípá núkííka. 14Maná insiŋí yɔɔpɔ́ yaakua imbíne, kuasiám ɔ́ puɔ́s pú ínanɔ aká páanunanɛ́ nikál ní insúá, kiɛ́tɛ kilaá manyi, á kiákí ɛ́ɛ́ é Kilíis kiátukanɛ́ɛ. 15Índɛ́ kuasiám ínanɔ, aká páanunanɛ́ imbɔp sí Moyíis, imbíne nyɛ kɔ́ɔ́p kí itɛ́m. 16Púnyɛ kɔɔ́m á kupíkúŋɔn kɔ́ Ɔkɔ́n imbíne sákinanɛ́ɛ. 17É kémuémue Ɔkɔ́n nyɛ emfun, kɔɔ́mɔ emfun ú Ɔkɔ́n nyɛɛ́, kɔ́ɔk weéŋelí nyɛɛ́. 18Pasɔ́ peem kɔk pusíó puókúnón, túpúnya ne nukúm nú Ɔkɔ́n. Ɔkɔ́n unyɛɛ́ emfun, éétúnúkesi á nunamá nukáánɛ́ na nukanyi nunyɛɛ́ é tenííké kiandákáand.
© 2026, CABTAL