Ansa 2
2
UgaꞋin u cicoꞋo
1Maku ma̱ va̱,
vu ushuku baci n kadanshi ka̱ va̱.
ɗa kpamu vu zuwai
uneki kadanshi ka̱ va̱ a̱ ka̱tsuma̱ ka̱ nu,
2vu ka̱na̱ kuzuwa atsuvu o cicoꞋo,
vu zuwa ka̱ɗu ka̱ nu e kuyeve,
3Mayun, folono kuyeve
ka̱ta̱ vu la̱nsa̱ kuyeve ki ili ya atakaci e kuyeve,
4vu la̱nsa̱ baci ku ɗa tsa azurufa,
vu la̱nsa̱ ku ɗa tsu na kpamu a̱ tsu la̱nsa̱ uciyi,
5ka̱ta̱ vu yeve wovon u Vuzavaguɗu,
ka̱ta̱ vu ciya̱ kuyeve ku Ka̱shile.
6Adama a na Vuzavaguɗu u tsu neke ta̱ cicoꞋo,
a̱ una̱ u ni u ɗa kpamu kuyeve n uyevi u tsu uta̱.
7U tsu neke ta̱ aza a na
i o kutono mejege ulyaꞋi,
a̱yi ɗa ma̱ra̱ga̱ wa aza
a na i n unushi ba,
8adama a na u tsu ere ta̱
uye wa aza a usuɓi,
wu ere kpamu uye wa aza a̱ ma̱riki.
9Ka̱ta̱ i yeve ukuna wu usuɓi n u mejege,
n ukuna u mayun
n uye u singai dem.
10Adama a na vi ta̱ a̱ kuciya̱ cicoꞋo a̱ ka̱ɗu ka̱ nu,
kuyeve kpamu ki ta̱ e kuneke wu ma̱za̱nga̱.
11Kusheshe ku singai ki ta̱ e ku ere wu
kuyeve ki ta̱ o kutono n avu.
12CicoꞋo ci ta̱ a̱ ku uta̱ka̱ wu a ka gbani-gbani,
a kadanshi ka uma a kavama.
13aza a na a̱ tsu ka̱sukpa̱ uye u mejege,
adama a na a wala a uye u ka̱yimbi,
14aza a na a tsu pana uyoꞋo
u kuyaꞋan ka gbani-gbani,
a̱ ma̱za̱nga̱ n ka gbani-gbani.
15aza a na uye u le wi magaba ba,
aza a na uye u le u ma̱ya̱nsa̱ka̱ u ɗa.
16CicoꞋo ci ta̱ e ku ere wu e ekiye a kashakanlai,
ci ta̱ e ku ere wu e ekiye a vuka vu kavama,
a vuka vu una̱ wu uyoꞋo,
17vuza na u iwain kamana ka̱ ni,
vuka vu na u tsu koɗo uzuwakpani
u na u yaꞋin e kelime ka̱ Ka̱shile.
18Adama a na kpaꞋa ku ni uye wu ukpa̱ u ɗa,
uye u ni a kubana a̱ ubuta̱ wa̱ a̱kpisa̱ u ɗa.
19Vuza na baci dem u banai a̱ ubuta̱ u ni,
u tsu bono ba.
Wi o kudoku kubono a uye u wuma ba.
20Adama a nannai, mayun ɗa i wala a uye u uma a̱ ma̱riki,
i ka̱na̱ kutono uye wa aza a usuɓi.
21Aza a na i a kuyaꞋan ukuna u mejege,
ele ɗa a̱ kuda̱sa̱ngu a iɗika ya,
aza a na i n unushi ba i ta̱ o kuyongo punu,
22ama Ka̱shile ki ta̱ a̱ ku uta̱ka̱
aza a gbani-gbani punu a iɗika ya,
ka̱ta̱ u takpa aza a unambi u ma̱riki punu a i ɗa.
©️2025 Language Development and Translation Initiative (LDTI)