ba imbi Ñammi Filip 4
4
Gudoyaŋo gu Pol abiyamne gudoyahu ñanfiyunku Yensa mi Filip
1Ninkinan índoonenenkum ingi indimaanankum imbi Yensa, m'ipokunne dáde. Me, ihaamihaami dáde ba búfekánan. Me, iyikyik básuum báde a hafithum a gubaarhu ninkinan. Fégeŋ baŋ, hakaanankánan h'okaaneŋne asúumeemsuum baman a hafithum dáde f'eñaagára a gubaarhu ninkinan. Angu inini, a gubaarhu h'élobne nip, me mo bim n'ibocin ikiinahoonuŋ k'uwonnoŋ hádih hanak ingi Umuyhintor, bísiba bísiba.
2Inini, ninkinan indimaanankum imbi Yensa, Yuwodi ingi Sintise, me mo bim n'ikiinahoonuŋ k'úbenneŋ sinhoojinayo k'ubaalayeŋ. Hómár gísiibane gukiinahánan. Ingah! Ninkinan uñantaheŋ ubonkerayeŋ k'újoonineŋ bajégenenkinan, k'uyennehinayeŋ. Aji úfegeŋ íyejoonuŋ, uñantaheŋ újoonineŋ bajégenenkinan, mara ninkinan inako badonkay imbi Umuyhintor. 3Ingi, fi uñankum m'imbaboŋne doho k'ifiyumo,#4.3 Na pájiiraa wúuro mu Pol alóbumohne, kanda afeero maro m'anjahne letaro inno immereŋ ampápájul wúuro. me mo bim n'ikiinaho, k'údek uhuyeeniŋ k'újoonin bájegenenkinin. Fég baŋ, me ingi immereŋ Yuwodi ingi Sintise, ijummiŋjum dáde a dohohu Kúmbuuñaamo Kúnsuuminno. Ankááñinahineemkááñinahin dáde, ki nim Kúmbuuñaamo Kúnsuuminno apas imbi jamaŋo. Agida, údiigeeno mees m'aretuhne Keleman ingi índinemeŋ, immereŋ anjumjum mees a dohoŋo nómár. Harethinin nip inha bim n'añaañaa a líibáro no kanjébo ka bandór, líibáro n'agune bim arjanna.
Aji úsiibay k'uyik básuum a hafithen, inini guñantane ukaan
4Inini, ninkinan, índoonenenkum ingi indimaanankum imbi Yensa, añantay asúumoonuŋ ni Umuyhintor agune ingi ninkinan. Uñantay uguyoŋ jamaŋ mi hafitenkinin agillen a gúbidhu ho Umuyhintor akandoonuŋne ingi a gubaarhu n'amíirne mees. Ninkinan, túyoreŋ k'iŋoolinkin imincin hómár. Ninkinan, jamanku Yensa, uñantay uyikeŋ hafit hagilleni a gubaarhu Umuyhintor waatowaat!
5Angu ninkinan, jellihinteŋ jamaŋo nip bamoyahánan. Ingah! Umuyhintor ŋantinayeroŋoŋ ingi mintor. Atéejateeja deh! 6Inini, ninkinan, dahu ukoriheŋ hogurumaareŋ a duniyaŋo inno! Neŋen neŋen gagune, dahu ukoriheŋ deh! Bukorimeŋ, ukiinahaŋ nómár Díino. Te guŋayeŋ gukiinahánam, ubabahineŋ na buramunkánam mees a gubaarhu bajónkánom nip. 7Ingah! Aji ukaaneŋ nim, Díino anékunoonuŋ básuum báde b'apút a hafitenkinan, te wúur pirendeŋ aliihahin básuumo bámár. Ingah! Básuumo bámár b'agune a hafiteninkinan akooñhuneh jamméejenkinan ingi hafitenkinan ki nim ilaahánan apiren awaana. Agida, Díino anékunoonuŋ básuumo bámár maro ingi Yensa Umaasaŋo mu Díino Acaabenne guguyeŋne.
8Inini, ninkinan indimaanankum ingi índoonenenkum imbi Yensa, me mo bim n'ídekireh ba búbujulinku balókum nanka. Íyeji, káánánteŋ h'agune a jamméejenkánan. Ingah! Jamméejo, iññantahoŋñanta inkokuroŋ a ho marigeno, iñantay inkokuroŋ jamméejenkintor a h'ajónne dáde, iñantay inkokuroŋ jamméejenkintor a h'awúuhne, iñantay inkokuroŋ jamméejenkintor a h'arennáne, iñantay inkokuroŋ jamméejenkintor a h'ajónne butifilin, iñantay inkokuroŋ jamméejenkintor a h'ajónne bufuuhurin. Indimaanankum ingi índoonenenkum, kokuteŋ jamméejenkánan a hómáráŋ hójooninno. Káánánteŋ hójondoŋne nip.
9Inini, ninkinan ñanfiyunku Yensa mi Filip, ayikyik h'ésiibane k'ukaanaŋ. Ingah! H'ekawandinoonuŋne ingi h'ejellihinoonuŋne, me mo bim n'ikiinahoonuŋ k'úduk ukaanaŋ maŋ nim. H'élobne ingi h'ófegeŋne a níndékoorunkum f'eguyerne ingi ninkinan, hómár nip gísiibane k'ukaanaŋ. Te, aji ukaaneŋ n'íloboonuŋne, Díino Amunduko n'anéerumehne básuumo aguyhuneh ingi ninkinan.
Ka Pol aramunne jamanku Filip bakodiŋo b'ambúunutemne ingi kunwonno k'anwonnáne ingi úmár
10Inini, me mo bim n'ídekireh ba balóbo a gubaarhu bakodiŋo b'óbuuñutemuŋne. F'éfegne bakodiŋo bámár, iramunramun Umuyhintor dáde. Asúumeemsuum fanfaŋ. Famo akankaan, kanda ípápájul mara ninkinan fiirandumuŋ. Ninkinan, guyroŋ kari uhoobálahemuŋhoobálaher. Hóobulaarumuŋ deh! Ípápájul maro ninkinan úsiibááhaŋsiibaher ba bukááñinahinkum a nintiku haajankum, kanda yikinaaroŋer. 11Kanda ingah! Aji úfegeŋ ílobi nim, guyroŋ kara nanka k'egune iŋaaybeŋaaybe a nintiku kunyik. Ŋayberi haman hotir. Ingah! K'egune a waato inno, hoŋon hoŋon ayikeemne a duniyaŋo inno, hómáráŋ dapiren k'afúnn básuumo b'eyikne a hafithum. Mara hómár gilinnane a gubaarhu h'ayikeemne a duniyaŋo inno. 12Gúduk ungo na, Díino alahinem k'iyik jup, gúduk ungo na diyik fereŋ, imuña maŋ na. Hoŋon hoŋon gayikeemne, me iyikyik básuum a hafithum, mara hómár gilinnane a gubaarhu h'ayikeemne a duniyaŋo. Haman kúugo alahaam, kúug gara alakum, haman ísiiba nintiku haajankum, wola iyik. Hoŋon hoŋon ayikeemne, me iyikyik básuum a hafithum. Aléeri, asúum, iŋooyind Díino Amánduko k'iyik básuum a hafithum mara hómár gilinnane a gubaarhu inho h'ayikeemne a duniyaŋo inno. 13Me mungu ipiren imuña hogurumaareŋ, mara Umaasaŋo mu Díino Acaabenne gabocindukumne sembeŋo nómár k'ipiren imuña.
14Inini, ninkinan, buyennehineŋ mara me k'egune kantíg k'aléeri dáde, uwonnoŋ ingi me ba búkááñinahinkum. A kunwonnáhánan kúmár me mo bim n'iramunkoonuŋ dáde. 15Ninkinan, ñanfiyunku Yensa mi Filip, fiirandoŋ waato aliiho n'egune a didiirahánan di Masadon, waato n'iŋayne bukawandinku jamaŋo Kúmbuuñaamo Kúnsuuminno. Ninkinan, fiirandoŋ waato nómár. Kanda biriman maŋ ni ífutne a didiirahánan, yikireŋ dayrahu Yensa a saari adúk n'elahayminne,#4.15 Hómár ingine Pol akawandinkawandin immereŋ jamanku Filip. Na gakááñinahineŋne. Immereŋ mingu anahnah Pol bakodiŋo ki nim apiren adék atéekin jamaŋo Kúmbuuñaamo Kúnsuuminno. fo ninkinan bareŋ. Ninkinan bareŋ, ñanfiyunku Yensa mi Filip ulahinemuŋne a waato nómár. 16Ifak ífurum a bukokánan k'ídek ba a bukoku Tesalonik. Na faka ayikyik h'óbuuñutemuŋne waasaŋ anakaŋ k'ipiren ikaan haajankum. A kunwonno kúmár mees, me mo bim n'iramunkoonuŋ dáde. 17Kanda aji úfegeŋ k'ílob inini, guyroŋ kara k'ufak ubocinditemuŋ hóduk deh! Nim gireŋ. Aji úfegi n'ílobne nim, ísiibáásiib ki Díino akanduroonuŋ barake báde a gubaarhu hójooninno h'okandáremuŋne. Hómár gísiibane ki Díino akanduroonuŋ.
18Inini, me mo bim n'íteekintuhoonuŋ maro údiigeeno m'úbuuñureŋne, Epafrodit, anéereemneer h'ónetemeŋne nip. Inini iyikyik jup. Bakodiŋo bámár afaŋfaŋ haajankum. Bakodiŋo b'óbuuñutemuŋne amímiir ininkaman sadahu kárámánjo n'anfúnnohne k'asúumum Díino.#4.18 Ñanyahudo gúduk anfúnnhuneh kárámánjo maŋ ni sada. Díino aféfeg h'okandutemuŋne te asúumemsuum. 19Agida Díino n'efuuhurinehne, nómár mungu amune nááfulo nip. Angu afeereemfeer mara Díino anékunoonuŋ, ninkinan mees, k'upireneŋ ukaanaŋ haajankánan nip. Fégeŋ baŋ, Díino ba gukandákánan nim maro ingi Yensa, Umaasaŋo M'Acaabenne guguyeŋne. 20Angu, a gubaarhu hómáráŋ nip infuuhurinoonuŋ gurethu Bááhintor Díino k'aramunaa baman dagurumaareŋ. Díino akaan hómár adék aguy a binentor.
Ka Pol aramurne jamanku Filip
21Inini, ísiibáásiib k'uramáramuŋ jamanku Díino nip m'angune ingi Yensa, Umaasaŋo mu Díino Acaabenne. Moŋon moŋon ísiibáásiib k'uramáramuŋ buramun b'apút. Índoonenenkum ingi indimaanankum imbi Yensa m'angune nanka, immereŋ mees anramároonuŋ. 22Jamanku Díino nip anramároonuŋ. Kanda m'andóolohne a díku umaasaŋo údenno Sesar, immereŋ mingu, anramároonuŋ dáde deh!
23Angu, me mo bim n'iduwathunoonuŋ. Díin akaan kabonkero k’afúruntohne imbi Umuyhintor Yensa Umaasaŋo Mu Díino Acaabenne, Díin akaan kabonkero kámár aguy a binanan, ninkinan jamanku Filip.
Inini, me Pol, nanka gúlokum amukne.
Okuqokiwe okwamanje:
ba imbi Ñammi Filip 4: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal