Luk Gudoyahu m’andékehne gukaranku Injilo no Luk
Gudoyahu m’andékehne gukaranku Injilo no Luk
Líibáro inno «Injilo no Luk» garetaane mara údiigeeno m'aretuhne Luk añaañne. «Injilo» ingi guñaamolo homár ingine Kúmbuuñaamo Kúnsuuminno. Luk añaañaañ faka mees líibár adúk no Gúloku Díino. Líibáro nómár «Ho Ñambúuñuraaŋo Ankanne» garetuhne.
Angu, a líibáro inno n'ayéjuhne «Injilo no Luk», Luk, ho Yensa akanne ingi h'alóbne gañaañne. Gíyeji Yensa, Yensa m'ayéjuhne Umaasaŋo mu Díino Acaabenne gílobumohne. Luk amincinmincin balókunom a Kúmbuuñaamo Kúnsuuminno ku Yensa adootne mintor. Ingah! A Líibáro inno Luk asíibáásiib ki jamaŋo nip ampájul ni jégenenku wúuro ingi Díino ajóoninkuhne. Kanda guyroŋ mara Luk gankokayekokay ingi Yensa ingi ñantaalibehinem immereŋ haalaŋo ingi inako. Luk Uyahud gireŋ. Kara Luk, úmár údin Antiyos, bi didiirahu Siri, kara nuko úmár údin saareŋo n'aretuhne Filip? Hómár yaaŋáraŋ mintor hóbun. Kanda úmár usaajum m'akaraŋ dáde.
Horaŋ akanne ki Luk añaañi líibáro inno?
Túyomuŋ baŋ k'íteekinoonuŋ h'akanne Luk añaañi líibáro inno. Úpájuleŋ, a jamaanihu Luk índukoŋo imme na n'aŋŋay búfunnhu misaalaŋo k'anyéjeh «Yensa akankaan inini...», wola «Yensa ayéjyej inini..», agida h'anyéjeh marigen gireŋ. Angu, gúmár akanne Luk amajay bútibo fanfaŋ k'apiren apájul marigeno a nintiku ho Yensa akanne ingi h'alóbne. Ayéjyej, «Túyor k'ikaana sapatankum k'ídek imbi m'ankokayehne ingi Yensa ingi índukoŋo m'anséediyane ho Yensa akanne ingi h'alóbne.» Angu balóbi nim, akaan maŋ hómár h'alóbne. Atíbtib dáde búpájihu marigeno. Adékindekin fanfaŋ bápájulum marigeno ki babollay añaañur údiigeeno m'ayéjuhne Teyofil h'ayennehinne nip a gu Yensa.
Inini, túyor k'íteekinoonuŋ hotir a gubaarhu údiigeeno m'aretuhne Teyofil m'ajahne líibáro inno. Úpájuleŋ, údiigeeno úmár, apirenpiren aguy ummu kunyik, ingi wúur m'alah bado báde. Angu apirenpiren ayik maro Teyofil acaamcaam a nintiku haajanku Luk ki nim Luke apiren adék ba bumiihulaŋo a nintiku ho Yensa akanne ingi h'alóbne mees. Agida gureto gúmár, Teyofil, ingine ingi guñaamolo «M'apokunne Díino.» Gúmár akanne índukoŋo imme na n'anyéjeh yikireŋ údiigeen m'aretuh Teyofil mu Luk añaañur. Anyéjeh ka Luk añaañne «Teyofil,» na asíibáásiib búyejo añaañurñaañur jamaŋo nip m'ampokunne Díino. Nim índukoŋo ganyéjehne. Kanda haman maŋ nim, afeero mara Díino asíibáásiib ki ñanfiyunku Yensa ingi jamanku duniyaŋo nip anyennehin ho Luk añaañne, ki nim impirenoŋ ímpájuloŋ marigeno. Gúmár akanne Luk añaañi líibáro inno. Díino asíibáásiib bujellihinkintor arenn fet mara Yensa agune Umaasaŋo M'acaabenne. Nim ingine, úmár agune mu Díino abúuñurne ba a duniyaŋo inno ba bupahunkintor a kunyoku júnubonkintor k'aŋoyind mintor imbi Díino. Hómár Luk asíibane bujellihinkintor arenn.
Okuqokiwe okwamanje:
Luk Gudoyahu m’andékehne gukaranku Injilo no Luk: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal