Luk 8
8
Jamaŋo m'ankokayehne ingi Yensa
1Angu, afúrumi na, Yensa adorulah a saariyeŋo ingi akooroŋo ba bukawandinku jamaŋo Kúmbuuñaamo Kúnsuuminno a gubaarhu maasayahu Díino. 2-3Agida f'aŋane hadéko, ankokaykokay ingi índiigeeno haalaŋo ingi inako m'anyéjuhne ñambúuñuraaŋo. Afak ayikyik indikaam ímpiinam m'ankokayer. Agida, imbi indikaamo immereŋ, ayikyik mi Yensa afúndureeniŋ fáguhoŋo ingi índukoŋo mi Yensa ajébunne a banérhinin b'anyikerne. Angu, aji Yensa ingi ñantaalibeŋo anyiki haaj, indikaamo immereŋ gandootoheeniŋne haajaŋo nómáráŋ. Harethu indikaamo inhahiye:
Mariyama, m'ayéjuhne Mariyama Magdala ummo na. Agida Yensa afúnduremfundur fáguhoŋ fámekila ingi fanakaŋ. Iyoo. Ingi Johanna, udikanku Susa. Agida údiigenkinem, Susa, úmár gamarahne díku umaasaŋo m'aretuhne Herod. Ingi udikaamo m'aretuhne Susan, ingi indikaam índukoŋ mees. Immereŋ nip gankokayehne ingi Yensa ingi ñantaalibehinem k'andoohoh nááfihinin k'antopotokeeniŋ.
Funaareŋo a nintiku kantígeŋo karenekeŋo ka pampaŋo aworumaane
4Angu afúrumi na, ayikyik bísiba, jamaŋo anfúruntifurunt saariyeŋo alabayeŋ k'andéker ankol Yensa anrumun na tip. Angu aŋay bukawandinkinin. A kawandhánam afúnn funaareŋo unfu, ayéjeeniŋ:
5- Janteneŋ baŋ! Ayikyik úduk m'adék ba buworhu pampaŋo. Angu, adék f'adék apút a gurakánam. Bapúti na, atoŋ buworhu pampaŋo. Angu bawori, arúgelo adúko ahupaa agida a bikino. Angu, bahupay a bikino, jamaŋo anjégumeh, jatonoŋo annotor k'angu anrocoh.
6Ayéjeeniŋ:
- Arúgelhu pampaŋo adúkoŋ mungu ahupaa bi didiiraŋo aterne ki yikireŋ jamband. Angu, arúgelo ámár acumb k'awal. Kanda bísibaŋo bacukri, alaafun nip mara didiiraŋo ateter.
7Arúgelhu pampaŋo adúko mees ahupaa ka jakangulo agune. Angu, jakangulo jámár akut akúdin pampaŋo, k'angu pampaŋo nómár fúnnuroŋ haani.
8Abocin ayéjeeniŋ:
- Kanda arúgelhu pampaŋo adíinem, nómár ahupaa ka didiiraŋo ajónne. Angu, nómár akutkut k'awal n'añantane awal. Angu, f'awalne, kódeku pampaŋo koŋon koŋon afúnn hamaano keme.
Angu, Yensa afak aŋoolin alób kabaŋ ayéj:
- Angu, moŋon moŋon jantent hóbun h'éfurumne balóbo k'ukaan a jamméejhen.
Fo Yensa atéekinne ñantaalibehinem h'akanne anéereh funaareŋeŋo a kawandhánam
9Na ñantaalibeŋo anyéjne Yensa, karo apiren akeekireeniŋ funaareŋo. 10Angu, ayéjeeniŋ:
- Ninkinan! Jantenemuŋ baŋ k'íkeekiroonuŋ! Ingah! Díino nédeŋ jamaŋo nip k'ampájul ho maasayahánam, kanda ninkinan ñankokaykum mingu, anéeroonuŋneer k'úpájuláŋ. Aji úfegi anéeroonuŋ, ki nim upireneŋ úpájuláŋ ho yéegaaraŋne fam a gubaarhu maasayahánam. Kanda índukoŋo mingu, a funaareŋeŋo gandékehne ba bumuko. Danwut h'agune na. Nim ungu, maŋ ni anlóbne a Hañaañeno anyéj: «Ganninginkineninginkin funaareŋeŋo k'antíb búfego ho funaareŋo alóbne, kanda gara anfégeh na honj.»#8.10 Anabila Esay añaañne h'agoobane. Esay 6:9
Inini Yensa aŋoolinkinne a h'añaañaane a Hañaañeno ba búteekinku jamaŋo h'akanne afúnnoh funaareŋeŋo a kawandhánam.
Ka Yensa akeekirne ñantaalibehinem funaareŋo a nintiku kantígeŋo karenekeŋo ka pampaŋo aworumaane
11Yensa abocin ayéjeeniŋ:
- Inini, túyomuŋ baŋ k'ikeekiroonuŋ funaareŋo unfu. Arugelhu pampaŋo no ummu guraho aworne, nómár agune Gúloku Díino. Te didiiraŋo, dímár agune jamaŋo m'anjantenehne Gúloku Díino. 12Angu, k'élobne a gubaarhu arúgelo n'ahupaane agida a bikino, na gílobolob a gubaarhu jamaŋo m'anjantenne Gúloku Díino ki Iblisa adék awat h’anjantenne nip k'angu anfiiram hómár. Fégeŋ baŋ, Iblisa síibaaraŋ k'andóm gúlobo gúmár ki Díino apahuneeniŋ. Jamaŋo immereŋ angune iniman didiiraŋo d'agune a bikino.
13Angu, k'éyejne arúgelo adúko n'ahupaane ka didiiraŋo aterne, na gílobolob a gubaarhu jamaŋo m'anjantenne Gúloku Díino, ki banyennehini, andóm k'asúumeeniŋ. Kanda immereŋ mingu, Gúloku Díino nooroŋ a hafitenkinin mara immereŋ gara anlókiyeh ki gúlobo gúmár acumb k'ayik na ñanlib. Na jamaŋo immereŋ ammíirne ingi didiiraŋo dímár d'aterne. Angu immereŋ, ni ñanlibhinin yikireŋne sembe gara ammiñeh a binaahu Díino, mara d'anfékinehne baléer a binaalo, anhóobula binaalo bímár.
14Ayéjeeniŋ:
- Angu k'éyejne arúgelo adúko ahupaahup a didiiraŋo d'ayikne jakangulo, angu didiiraŋo dímár agune jamaŋo m'anyenehinne Gúloku Díino, kanda immereŋ, karo bukoriŋo b'anwosenehne atójuntojun jamméejenkinin, karo imme na n'antifilineh básunku duniyaŋo, karo imme na butifilinku kunyikhu duniyaŋo. Fégeŋ baŋ, hómáráŋ nip upireneŋ úmiirinahineŋ ingi jakangulo. Gúmár ingine, hómáráŋ nip agoobhuneh Gúloku Díino imbi immereŋ. Maŋ ni jakangulo akúdinne pampaŋo ki pirendeŋ k'afúnn, maŋ nim jamaŋo immereŋ dandék ba bukaano h’asúumhánehne Díino.
15Ayéjeeniŋ:
- Kanda índukoŋo imme na m'amíir ingi didiiraŋo díjooninno. Angu, arúgelo n'ahupaane a didiiraŋo díjooninno, hómár agune m'anjantenne Gúloku Díino ingi jamméej. Immereŋ, ii, ganyennehini Gúloku Díino andooh ankaan a jamméejenkinin. Angu immereŋ andék anguyhuneh jamaŋ mi hafitenkinin arenn, k'angu andék ankaan hakaanam h’asúnkánehne Díino. Angu, hakaanamo hámár akankaan ininkaman bídimerenku sinoŋo síjooninno. Immereŋ mingu anlakuneh binaalo aliŋ, haani a waathu baléero.
Funaareŋo a nintiku lampo
16Yensa abocin ayéj:
- Hóge wúur ajakálinkineh lampo k’adooh gusiyoŋo k'ahuuburin na? Wówo! Wúuro dakaan nim. Wola hóge ujakálinkineh lampo k’uŋan a bireŋununku ránjángálo? Wówo! Dukaan nim deh! Aji ujakálini lampo, uninkhineh kantíg k'ópájulne ayaaŋárinkineh gufaco nip. Nim ungu moŋon moŋon aŋantne, apiren afég h'agune a gufaco.
17Ayéjeeniŋ:
- Ingah! Hoŋon hoŋon gakubunaane waato inno, adék aréejhineh bísiba. Hoŋon hoŋon gasuturaane, hómár mees nip, adék afékunuh. 18Gúmár gitengahoonuŋne, guŋayeŋ bujantenku Gúloku Díino, ujanteneŋ ingi jamméej. Ingah, wúuro m'ajantenehne Gúloku Díino ingi jamméej, Díino akankáneh ki wúuro úmár afaŋunum n'apájul Gúlokunom. Alahinkinem ki dafiiram Gúlokunom. Ki wúuro mu gara ajantenehne ingi jamméej, fi mungu, h'ópájulerne adék aniimhuno.
Ka Yensa alóbne a gubaarhu m'antohne a bádinkinem
19Angu afúrumi na, fo Yensa aŋane bukawandinku jamaŋo, índoonenenkinem ingi nunom ampútor, kanda n'anhaajaham. Angu, f'ampúturne pirendeŋeŋ k'ampút ka Yensa aŋane kawando a gubaarhu ni jamaŋo anrumunne. 20Angu, ambúuñam k'andék antéekin Yensa k'anyéjem:
- Ingah! Nunkon ingi índoonenenken immeŋene beŋen n'anwonn, kanda anyéji fi ganhaajane.
21Angu, na Yensa ayéj jamaŋo m'anjógne na nip:
- Immeeraŋ angune nunenenkum ingi índoonenenkum, ingi indimaanankum? Janteneŋ baŋ! Moŋon moŋon ajantenne Gúloku Díino k'adék akaan maŋ ni gúmár amiihulne, immereŋ angune nunenenkum, índoonenenkum, indimaanankum.
Nim Yensa alóbne.
Ka Yensa alóbne ingi bawuco ingi gumbaŋo a jakaamo k'akaan ki bawuco ingi gumbaŋo ayohála
22Angu, abári bísiba, Yensa anyifa a sídeeno ingi ñantaalibehinem k'ayéjeeniŋ:
- Inini, injucoonuŋ!
Angu, antuŋul hadéko ba a saari adúk n'aguy a gúbido goŋon. 23Angu, f'ayifane a sídeeno, Yensa apah adúuf. F'apahne adúuf angu, bawuco atoŋ bumalo. Amalah dáde. Angu, sídeeno ayindinah, te faka gumbaŋo akeng fo baaruŋo aŋanar a sídeeno k'aŋay gugimunkinin, te a hómár ñankindenkinin amumur na. 24Angu ñantaalibeŋo, immereŋ nip andewun k'andék angefi Yensa anyéjem:
- Arafaŋ! Arafaŋ! Ninger baŋ sídeeno! Ba bulim gadékehne deh! Mintor nip inniirohunoŋ! Kenger k'upahun jamaŋo!
Angu, fo ñantaalibeŋo angefiyemne, Yensa akeng. Bakengi asekur bawuco ingi gumbaŋo mees. Agida, gumbaŋo nómár ayikyik sembe dáde. Ayéj:
- Bawuco! Wonnor k’úbenn bumalo.
Angu, bawuco ahar ayohála bumalo, baaruŋo anoohun tum. 25Ayéj ñantaalibehinem:
- Ninkinan, horaŋ akanne fiyundumuŋ?
Agida ñantaalibeŋo mingu, banfégi ho Yensa akanne, ambenuh fanfaŋ, afak alaaleeniŋ dáde k'anyéjeh:
- Jeh! Mintor! Ningeŋ baŋ! Uraagofoŋo ummu agune hantaŋ, fo gayéji bawuco ingi gumbaŋo «Bénner bumalo!», bawuco ingi gumbaŋo anhar ambénn bumalo?
Ka Yensa atíbarne fáguhoŋo imbi údiigeeno mu Gadara
26Angu afúrumi na, Yensa ingi ñantaalibehinem, banjuci jakaamo mees, didiiraŋo d'annohumne anjuj, Gadara garetuhne. Agida Gadara aningayningay ingi didiirahu Galile b'anfúruntne. 27Angu, bampúti Gadara, ankuc a sídeeno. Kanda, fo Yensa aninkne sídikinem a réeŋo, údiigeen úduk, údin Gadara, adéker ba burahálinkinem. Agida údiigeeno úmár mu fáguhoŋ falabahiyeŋ anruur. Úmár ii, gara akaanah gusol, ingi búlimo gadékehne. Gara aguyoh a hádigeŋo. A bawúboŋo gaguyohne.
28-29Agida, gúduk ungo na, fáguho gakengilini imbi údiigeeno, akaanam asaŋari. Angu aji akaanem k'asaŋari, jamaŋo, ceeneŋo gandoohohne k'annéebinem a halaho ingi a hádiho mees. K'angu anningihem na biki adék apah. Kanda gúduk ungo na, ahallun ceeneŋo nómáráŋ nip k'apah. Angu gapahi, agír ba a kantíg kayeerer ka fáguho anohálinemne. Údiigeeno úmár nim gakaanahne biriman fam.
Angu dam, údiigeeno bafégi Yensa, adék aruŋa a hádikinem k'awuugah ingi sembehinem nip, ayíililineh ayéjeh:
- Fi Úbáku Díino N’afaŋunumne N’ayik Sembe, horaŋ gútibehne a binaam? Ingah! Bonkerer! Bonkerer, k'úbenneem fereŋ! Dahu uyeheneem!
Agida aji úfegi n'ayéjne nim, Yensa ayéjyejer fáguho:
- Fút imbi ummu!
30Angu, Yensa ayéjem:
- Fi, gurethen neeraŋ?
Fáguhoŋo anjaabiyem anyéjem:
- Mint, harethint «barumuno»!
Aji úfegi n'anyéjne nim, mara fáguhoŋo fámáráŋ jup anruurne údiigeeno, 31angu, anyéjeh Yensa:
- Fi, bonkerer! Sabarer! Bént! Dahu úduk uŋan mint a dasuno da mukuroŋne baŋaantino!
Nim gankiinahne dam Yensa anrukoh.
32Agida, ka Yensa ingi údiigeeno anwonnáne ŋantinayereŋeŋ ingi koore adé no jifekeŋo#8.32 Ñanyahudo gara ankunoh jifekeŋo. Aguyhuneh m’ammuyeeniŋne ñansooninke wola Ñanyahudo mi gara ambúuñah Umuyhintor. n'aŋŋay gufoola a jídonku montaaño. Angu, fáguhoŋo anning k'anyéj Yensa:
- Inini, bént mint k'ígirmiŋ ídek iŋŋanmiŋ a kooreŋo noŋon no jifekeŋo!
Angu, Yensa ayéjeeniŋ:
- Aca! Dékereŋ ba a koorehu jifekeŋo!
33Angu, maŋ ni alóbne nim, fáguhoŋo anfúr nip imbi údiigeeno k'angir andék aŋŋan a koorehu jifekeŋo. Baŋŋani arinenku jifekeŋo, jifekeŋo nómáráŋ nip angír ankuc a jídonku montaaño k'andak annen a jakaamo anlím na k'anniiro.
34Angu ñankooño mingu, banfégi hómár, immereŋ angír k'andék antéekiner jamaŋo. M'angune a kanaŋaŋo ingi m'angune a saariyeŋo andak antifureeniŋ h’ayikne nip. 35-36Angu immereŋ nip andéker ba búfego h'ayikne. F'ampúturne, m'anfégne ho Yensa akanne antifureeniŋ h'anfégne nip. Angu na, immereŋ nip ambenuh dáde. Angu anningeh údiigeeno mu fáguhoŋo anruurerne fam n'anoone, akaanah bayaah, ingi ni jamméejhinem aŋoolintne. Anohunnohun tum a hádiku Yensa. 37-39Angu immereŋ jamanku Gadara nip andewun dáde k'anyéj Yensa:
- Inini fi, fo úfur nanka a didiirahint k'údek!
Banlóbi nim, Yensa atuŋul hadéko ba a sídeeno, úmár ingi ñantaalibehinem. Baŋŋay hadéko, údiigeeno mu Yensa apahunne imbi fáguhoŋo ayéj Yensa:
- Arafaŋ! Túyor k'ikokulinoonuŋ k' iguy utaalibehen! Bonkereri!
Angu, na Yensa ayéjem:
- Wówo! Ŋoolint ba a díken! Gúputi, úteekin jamaŋo ho Díino akandárenne nip.
Yensa balóbi nim, ayifa a sídeeno k'adék adoona, úmár ingi ñantaalibehinem. Údiigeeno mu Yensa ajébunne mungu, adék akaan maŋ ni Yensa alóbemne. Aŋoolin ba a bukokánom. Bapúti, adorla bukooro nip ba búteekinkinin ho Yensa akandáremne.
Yensa afaŋi n'afuuh banéro ingi biniiroŋo
40Angu Yensa, f'anyifane a sídeeno ingi ñantaalibehinem, anjucor aŋŋooliner ba a didiirahu Galile. Angu a didiirahu Galile, na galahunne jamaŋo jup n'anjógne bútuyhunom. Immereŋ ankucunemkucun hóbun. 41-42Angu, údiigeen úduk apútor. Gurethinem Jayirus. Úmár agune ulaameku jaameŋo. Angu Jayirus bapútri, adék aruŋa a hádiku Yensa k’akiinaham amaanenem ayéjem:
- Arafaŋ! Ingah! Bonkerer, k'úduk újebindem kógidhum. Kógidhum anéner fo biniiroŋo bareŋ afallahemne. Bonkerer k'índokoŋ k'újebundem.
Agida Jayirus, kógid ínkonduk gayikne, te kógido kómár bi díineŋ haala ingi anakaŋ gayikne. Angu, fo Jayirus akiinane Yensa k'ajébundem kógidhinem, Yensa alóki k'antuŋul hadéko k'ankokay ingi barumuno nip. Angu jamaŋo n'arumunne dáde, baŋŋay hadéko anloŋunoh Yensa te nongároŋoŋ. Agida immereŋ nip n'aŋŋay hadéko ankokoh bi díku Jayirus.
43Angu a barumuno bámár, ayikyik udikaam m'anér k'aleeñeh abena. Angu, asaajasaaja f'ayoh buruhu díineŋ haala ingi anakaŋ, k'acaam bakodihinem nip. Haani maŋ nim, pirendeŋeŋ k'ansaajam.
44Angu, fo barumuno aŋŋane hadéko ba a díku Jayirus, udikaamo úmár ajokula a mángáku Yensa k'ahana silakánam amapun réeŋununku sabadóorhunom. Maŋ ni amapunne sabadoorhu Yensa, udikaamo ajéb. Angu, fo udikaamo amapunemne, Yensa ayéj:
45- Hantaŋ amapuneemne?
Angu, jamaŋo aññopoh ki Piyer ayéjem:
- Arafaŋ! Ingah! Jamaŋo maŋ ni anrumunne aññufñufoh ammapunko, umiihila hantaŋ amapunenne?
46Yensa aŋoyindem ayéjem:
- Ingah! Ayikyik m'anong bumapunkum ki nim íjebinem. Afereemfeer mara sembe afúrfur a binaam.
47Angu, udikaamo úmár, f'apájulne mara Yensa apápájul h'akanne, adék angu aruŋa a hádikinem k'añaŋunah kumbenuho. Angu, atifur Yensa ingi m'angune na nip h'akanne amapuni Yensa. Ingi mees, atéekineeniŋ maro f'amapunemne, ajéb maŋ fam. Suturaaraŋ haman hotir h'ayikeemne.
48Batífi, badétuni, Yensa ayéjem:
- Udikaam! Aji úfegi h'akanne k'újeb, n'ufiyumeemne. Upiren údek angu ingi básuum.
49Angu, fo Yensa aŋane balóbo, ayik wúur m'afak apútor na, agida n'afúrumor a díku Jayirus, Jayirus ulaameku jaameŋo. Angu bapútri, ayéj Jayirus:
- Jayirus! Ingah! Dahu uyehen arafaŋo. Bágidhen Díino bénnurom a duniya.
50Angu, wúuro balóbi nim Jayirus, Yensa ayennehin. Ayéj Jayirus:
- Jayirus! Ingah! Dahu ubenuh. Ku k'ufiyumeem. Índek índokoŋ. Bágidhen ajébhineh.
K'ankokay, andék f'andék ampút a díku Jayirus.
51Angu, f'ampútne a díku Jayirus, Yensa ayéj biki jamaŋo aŋŋan, fo úmár Yensa ingi ñantaalibehinem Piyer ingi Saŋ ingi Jak ingi ñamboshu wolo, immereŋ bareŋ aŋŋan a gufaco ka bágido agune. 52Angu beŋen beŋen, jamaŋo anhooŋoh ingi anlóblobindinah gu kógido. Angu, na Yensa ayéjeeniŋ:
- Hey! Dahu uhooŋoŋ! Bénteŋ jihooŋo! Wolo niirooroŋ. Sínduuf gaŋane.#8.52 Agida Yensa apápájul mara wolo aniironiiro. Kanda apápájul mees mara ba bukenginkinem a biniiroŋo gadékehne. Gúmár akanne ayéji sínduuf fanta gaŋane.
53Angu, immereŋ ankíileh anyeefileh Yensa, agida n'afeereeniŋ mara wolo Díino adoohemdooh. 54Angu, Yensa alah silaku kógido k'alób wolaŋ ayéjem:
- Kobákum! Kenger!
55Angu fo Yensa alóbne nim, háteku wolo ahar aŋooliner arinkinem k'afak aŋoolin ajéb angu. Angu maŋ fam kógido akeng k'awonn. Angu wolo bakengi, Yensa ayéjeeniŋ:
- Ingah! Nétemeŋ k'ayaahála!
56Angu ñamboshunom, banfégi wolo n'akengne, hómár abineeniŋ dáde ingi amapuneeniŋ mees. Yensa ayéjeeniŋ:
- Ingah! Ninkinan, h'ófegeŋne gub, ñantaaroŋ úduk úteekineŋ wúur.
Okuqokiwe okwamanje:
Luk 8: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
