Luk 2
2
Fo Yensa Umaasaŋo mu Díino Acaabenne abosaane
1Inini, a waato no Yaya abosaane a didiirahu Israyel, ayikyik umaasa m'aguy a didiiraŋo d'ayéjuhne Itali. Umaasaŋo úmár gurethinem Oogust, te bunoohunkunom a bukooro b'aretuhne Rom maŋ na a didiirahu Itali gagune. Agida, Oogust agune a bigoku ñammaasaŋo índukoŋo. Angu, a gubaarhu hómár anhuyom Umaasaŋo Údenno. Inini, a jamaanihu Yaya, Umaasaŋo Údenno ingi jamanku Rom, didiira dilabayheŋ gammarahne a duniyaŋo. Didiirahu Israyel atotoh a didiiraŋo d'ammarahne.
Inini Oogust asíibáásiib búpájul jamaŋ iliheeraŋ angune a maasayahánam. Angu, ayikyik bísiba adandála ayéj:
- Moŋon moŋon uñantay údek ba a saariŋo n'obosaane k'aññaañ gurethen!
Nim Oogust adandálane. 2Agida buñaañhu jamaŋo ba bútebhinin, gúmár guliih a didiiraŋo di ñammi Rom ammarahne. Fo Kiriniyus amarahne didiirahu Siri, a waato nómár gantébne jamaŋo.
3Angu, fo jamaŋo anyennehinne ho umaasaŋo adandálane, moŋon moŋon údek ba a saarihen k’aññaañ na gurethen. 4Angu, ayikyik údiigeen m'aretuh Isuf m'aguy a didiiraŋo d'aretuhne Galile. Agida Galile, a didiirahu Israyel gatohne. Kanda Isuf anébneber udikaam. Angu banyennehini ho umaasaŋo údenno adandálane, immereŋ inako anfúrum saarihinin n'ayéjuhne Nasaret, k'antuŋul hadéko ba a saariŋo n'ayéjuhne Betlihem. Agida Betlihem a didiirahu Júde gagune. Angu, aji úfegi ni Isuf añantane adék ba Betlihem, úmár Isuf, a muhenku umaasaŋo Dawuda gafúruntne. Agida Dawuda, úmár údin Betlihem. Gúmár akanne añantay adék ba Betlihem. 5Angu, Isuf adooh Mariyama, udikaamo m'anébne k'andék ba na ki k'aññaañ harethinin. Agida Mariyama n'aguy ingi badooh. 6-7Angu, andék f’andék ampút Betlihem.
Angu, Isuf ingi Mariyama, bampúti Betlihem andék ba a dígo n'ankucunohne ñandékaŋo. F'ampútne na, anlahun jamaŋo n'anrumun tip a dígo nómár. Yikireŋ kanooh. Angu, miñireŋ búyeku udikankánam Mariyama anaaŋina. Angu, fo búyeero anaaŋinane, angohuleeniŋ ba ka abónoŋo anguyohne. Bampúti na aŋan wol údiigeen, koliikinem. F'aŋanne wolo údiigeeno, andooh tabén k’angubinem. Bambollay anjubunom a gunoŋo g'ankandárahne abónoŋo jafoolaŋo.
Fo maleekaŋ andanterne ñankooño maro Umaasaŋo mu Díino Acaabenne abosaabos angu
8Agida, jaketo no Mariyama aŋanne, na Betlihem ayik ñankooñ m'aŋŋay bikooño a kanaŋaŋo k'agune a mángáku hádigeŋo. 9Angu, ayik maleeka no Umuyhintor n'afúror maŋ na k'aŋŋane bikooño. Angu, fo maleekaŋo afútne, ayik jiyaaŋ j'afúrumor a raafo adék ba a réeŋo k'alahunteeniŋ na. Agida jiyaaŋo jímár agune leerhu Umuyhintor, te jiyaaŋ jíde. Angu, fo ñankooño anfégne maleekaŋo ingi jiyaaŋo, ambenuh dáde. 10Maleekaŋo, bafégi ñankooño n’ambenuhne ayéjeeniŋ:
- Ninkinan! Buku ubenuheŋ! Ingah! Me ii, idotoonuŋdot kúmbuuñaam kúnsuumi. Aji uyennehineŋ kúmbuuñaamo kúmár, ninkinan ingi jamaŋo nip usewohunoŋ dáde.
11Abocin ayéjeeniŋ:
- Ingah! Íbuuñuraabuuñ ba gúteekinkinan mara ayikyik wol údiigeen m'abosaa gub. A saariŋo n'ayéjuhne Betlihem gabosaane, saarihu umaasaŋo mu fam m’aretuhne Dawuda. Kanda ingah! Wolo úmár agune údiigeeno m'útuyhoŋne ki k'apahunoonuŋ. Hómár ingine, úmár agune Umaasaŋo mu Díino Acaabenne, maŋ Umuyhintor.
Ayéjeeniŋ:
- Inini, dékereŋ ba na k'úfegeŋ wolo úmár! 12Inini, búpájihu wolo úmár, búmár agune, aji úputeŋ na, úfekineŋ wol m'agubinaane ingi tabén k'anjubunom a gunoŋo g'ankandárahne abónoŋo jafoolaŋo. Inini gíteŋ k'uningeŋ wolo!
13Angu, maleekaŋo, balóbi nim mees, maleekaŋaŋ adúkoŋ anfúror anrumun tip. Maleekaŋaŋo nómáráŋ, arjanna ganfúruntne k'andak anlahun na ñankooño. Angu, maleekaŋaŋo nómáráŋ nip anfuuhurineh Díino a gubaarhu wolo m'abosáraane anyéjeh:
14- Díino abábár buramun baman arjanna nip! Immajahoŋ bufuuhurinkinem!
Ki a réeŋo, jamaŋo nip m'ansúumne Díino a hakaanankánin, Díin akaan anguy a básuum.
Nim maleekaŋaŋo anséediyane wolo m'abosaane dam. Bambollay gúseediyaŋo, aŋŋoolin ba arjanna b'anfúruntne.
15Angu maleekaŋaŋo, baŋŋoolini ba a raafo, ñankooño anyéj:
- Inini, índek índokoonuŋ ba Betlihem k'índek ínfeguroŋ ho Umuyhintor ajellihinne mintor.
16Angu, banlóbi nim antuŋul hadéko aññufa ba na. Bampúti, anlahun Mariyama ingi Isuf. Anfég kowolo n’ajubunaane a gunoŋo g'ankandárahne abónoŋo jafoolaŋo. 17Angu banfégi hómár, ankeng ba guŋoolino. Afúrumi na, antoŋ búteekinku jamaŋo nip a gubaarhu h'anfégne ingi ho maleekaŋo atéekineeniŋne a gubaarhu wolo. 18Angu, jamaŋo nip abineeniŋbin ho ñankooño anséediyane. 19Agida Mariyama mungu, h'ayikne nip ingi ho ñankooño anlóbemerne nip inho na a jamméejhinem k'alentála. Waatowaat aŋoyin na jamméejhinem.
20Angu ñankooño mingu, aŋŋoolinŋoolin ba bulahunku saahaŋaŋo b’ambénireeniŋne. Kanda baŋŋay hadéko ba bulahunku saahaŋankánin b'ambénnáreeniŋne, anfuuhurineh Díino a gubaarhu h'anfégne ingi h'anyennehinne dam. Angu immereŋ anramunkam dáde f'andék ampút imbi saahaŋaŋo. Úpájuli, maŋ ni maleekaŋo atéekineeniŋne, maŋ hómár faŋ ganfégne na dam.
F’ankandurne Yensa gureto
21Angu, afúrumi na, da wolo ayikne lóokum, dam gansunnemne k'ankandáram gurethu Yensa. Angu, aji úfegi n'ankandáremne gureto gúmár, maleekaŋo Jibril ayéjyejer Mariyama abosháneh kowol kódiigeen, kanda ki k'akandáram gurethu Yensa. Agida, jandiŋ Mariyama badoohumne badooŋo, maleekaŋo atéekinemne gureto gúmár.
F’andékurne Yensa a Jaameŋo Adénno
22Afúrumi na, maŋ ni waato abárne, Isuf ingi Mariyama ingi kóbákánin andék ba a Jaameŋo Adénno Jerusalem. Angu, f'ampútne a Jaameŋo, ankaan ni Luwanku Musa amiihulne ki nim Mariyama apiren arenn imbi Díino.#2.22 Agida Mariyama rennireŋ imbi Díino a gubaarhu kaboshu wolo. Kanda d'ayikne ásibaŋ jamaŋinak káriman d'aŋane, Mariyama añañtañanta afúnnur Umuyhintor leeya a Jaameŋo Adénno. Nim Luwahu Díino amiihulne. Udikaamo gakaani nim mees arennhineh a gúbidhu Díino. Apiren angu ambabay ingi índukoŋo ba buramunku Díino. (Ninger líibáro n'aretuhne Batébo 12.1–8). Ingi mees, na gandékne ba gujellihinku Umuyhintor kóbákánin, mara ámár Díino amune wolo úmár. 23Agida Luwahu Umuyhintor ayéjyej: Aji uyiki kowol koliiho kódiigeen, kowolo kómár inko Umuyhintor.#2.23 Ninger líibáro n'aretuhne Gúfuro 13.2 Nim gaññaañne a Luwaŋanku Díino. Gúmár akanne andékuri wolo ba bujellihinku Umuyhintor. 24Angu, anfúnn maŋ na leeyaŋo iniman ni luwahu Umuyhintor amiihulne. Agida binaalo ayéjyej aññanta ambuj «bakuyeereŋ banakaŋ wola baláábánáŋ banakaŋ bádoon.» Bámár gaññantane ambuj ba leeyaŋo. Angu nim gankanne.
Ho Simeyon alóbne a gúbidhu Yensa
25-26Angu, a waato nómár ayikyik údiigeen úduk m'aguy Jerusalem m'aretuh Simeyon. Angu Simeyon awúuhwuuh, abúuñabuuña Umuyhintor dáde, te faka úmár ii, apápájul maro Díino abúuñokuneh údiigeeno m'adékehne bupahunku jamanku Israyel. Afak apápájul maro údiigeeno úmár aguyhuneh m'ayéjuhne Umaasaŋo Mu Díino Acaabenne. Angu, aningeh atúyoh údiigeeno úmár. Úpájuleŋ, Jamméejhu Díino Jarenninno inja na imbi Simeyon. Jámár ajellihinemne mara, úmár Simeyon, daniiro ni fégireŋ Umaasaŋo úmár mu Umuyhintor abúuñokunehne.
27Angu, ayikyik bísiba Jamméejhu Díino Jarenninno anohálinemne k'adék ba a Jaameŋo Adénno. Angu, bísibaŋo ímbenduko ñamboshu Yensa, immereŋ mees andékdek ba a Jaameŋo Adénno ingi kóbákánin ba bukanku ho Luwanku Díino amiihulne. Angu dam, immereŋ, Isuf ingi Mariyama, f'ampútne na anlahuntar Simeyon. 28Angu, Simeyon, f'afégne wolo adoohom k'apeefaham k'aramunah Díino, ayéj:
29Umuyhum, inini ífefeg mara ukankaan h'ójikirindeemne nip mara ífefeg Umaasaŋo mu fi ucaabenne.
Ingah! Me údoolhon, aji udooheem angu, iguyhuneh a básuum
30-31mara n'ífegne ingi sígihum wúuro m'ucaabenne
ba bupahunku jamaŋo mi siyeŋo nip a kunyoku jínubonkánin.#2.30-31 Maŋ Jamméejhu Díino Jarenninno ajellihinne Simeyon hómár.
32Afeereemfeer mara wolo ummu agune jiyaaŋo j'adékehne buyaaŋárindiku mi guyroŋoŋne Ñanyahud nip ki nim ampájul gu Díino.
A gubaarhu úmár, gurethu jamankan mi Israyel abúuñahunuh k'ayoofunaa.
33Nim Simeyon alóbne f'afégne Yensa. Angu, fo bááhu Yensa ingi nunom anyennehinne ho Simeyon alóbne a gubaarhu úbákánin, abineeniŋ dáde. 34Angu Simeyon balóbi nim, aduwar ñamboshu wolo. Angu babollay guduwakánin, ayéj nunku Yensa:
- Janten baŋ k'íteekino ho Díino alefne ba bukaano imbi úbákán! Ingah! Wolo ummu adék akankáneh ki ñanlabahi mi Israyel ankúbul jamméejenkinin imbi Díino. Angu ankubuldir jamméejenkinin imbi Díino, hómár ayoofunkuneeniŋ. Kanda índukoŋo mingu, danlóki úbákan. Angu, immereŋ andék anhunankuneh Díino, k'angu hómár aguy jinenkinin nuko. Ingah! Úbákán aguyhuneh tamaseer no Díino abúuñurne ba butengahu jamaŋo. Jamaŋo ambicayhineh a gubaarhu úmár. Índukoŋo anfoyhunom, índukoŋo anlókihinem. 35Te faka , úbákán akankáneh ki h'agune a hafithu jamaŋo afúror k'afégaa. Kara hafithu wúuro arennrenn, karo hafithu wúuro arahayrahay, hómár nip afékunuh a gubaarhu úbákán ummu.
Angu Simeyon balóbi nim mees, abocin faka ayéj Mariyama:
- Inini, fi nunom, úfekineh baléer báde. Akankáneh maŋ ni andoodooh busandiŋo k'ancuk a hafithen.
Nim Simeyon alóbne Mariyama k'akir aŋoyindem wolo.
Anabiyoŋo adikaamo m’aretuhne Anna
36-37Angu, a Jaameŋo Adénno ayikyik anabiyoŋ adikaam m'aretuh Anna. Anna úmár, báábám gurethinem Fanuwel. Bádinkinem Aser. Angu, Anna alaamerlaamer dáde. Ayikyik díineŋ jamaŋirenek ingi arenekeŋ. (84 katrá van katrá.) Agida Anna f'aroŋne bágid ajahaajaher. Angu, a bajaho bámár díineŋ amákilaŋ ingi anakaŋ gayikne. Angu údiigenkinem, Díino adék adoohom. Angu, maŋ ni údiigenkinem aniirone, úmár angu ŋoolindeŋ afak ajahaa. Angu úmár, a Jaameŋo Adénno gara afama. Gadékedek ba bútuyhu Díino jaket báárig. Asaliyeh, asumoh, akaanah ho Díino ayéjne. Nim gakaanahne.
38Angu, a waato no Simeyon aŋane buwooño ingi ñamboshu Yensa, Anna adék alahuneeniŋ na. Agida apápájul mara wolo m'andoorne, úmár agune mu Umuyhintor acaabenne ba bupahunkintor. Angu f'afégne wolo, aramun Díino. Angu, afúrumi na adék alahun jamaŋo m'antúyohne ki Díino apahun jamanku Jerusalem ingi immi Israyel nip. Bapúti ayéjeheeniŋ:
- Ingah! Wúuro m'íntuyohoŋne apútriput!
Nim Anna gatéekinehne jamaŋo káriman d'afégne Yensa.
39Afúrumi na, f'ankanne ho Luwahu Umuyhintor amiihulne nip, Isuf ingi Mariyama andooh wolo k'aŋŋoolin ba a saarihinin n'ayéjuhne Nasaret a didiirahu Galile. Bim gaŋŋoolinne.
40Angu wolo, maŋ ni alaamerehne, maŋ nim sembehinem ingi jamméejhinem gabocinahne f'adék atijen, ayik jamméej. Barakehu Díino mees imba na a binaanam.
Ho Yensa akanne f'ayikne díineŋ haala ingi anakaŋ
41Inini, ayikyik gújuŋ gu Ñanyahudo ankaanahne díin díin. Gújuŋo gúmár, Gújunku Guwusunaamo ganyéjehne. Angu, díin díin ñamboshu Yensa gandékedek a Gújunku Guwusunaamo a bukooro b'ayéjuhne Jerusalem. 42Angu, fo Yensa ayikne díineŋ haala ingi anakaŋ, ankokay ingi ñamboshunom ba a gújuŋo gúmár Jerusalem, maŋ ni cosaano amiihulne.#2.42 Agida cosaano nómár Luwahu Díino amihulmiihul k'ankaanah.
43-44Angu bampúti, ankaan gújuŋo. F'ankanne gújuŋo mees, nunom ingi báábám anlahar binaalo ba gúŋuño. Angu dam ñaŋŋuño anrumunrumun tip a binaalo. Angu, Isuf ingi Mariyama anlahlah karo ankokayrikokay ingi Yensa, kama wolo afallarifalla bim, immereŋ ni pájiireŋeŋ. Angu andék f'andék anyik bísiba a binaalo. Angu adékiidek anningilin. Banningilini, fégireŋeŋ Yensa. Angu ammiih m'ankokayne. Ammih jamankánin. Ammih m'ampájulayne. Immereŋ nip gammihne. 45-46Immereŋ fégurom. Angu, nunku Yensa ingi údiigenkinem Isuf aŋŋoolin baman Jerusalem b'anfúruntne. Angu f'ampútne Jerusalem, ankaan ásibaŋ alallaŋ a saariŋo bútibhinem, kanda fégurom. Angu f'andékne ba a Jaameŋo Adénno, na ganlahunemne n'anooh a bájegenenku arafaŋaŋo no Ñanyahudo. Ajantenkeeniŋ ingi jamméej, amiikeeniŋ. Immereŋ mees ammikem. Úmár ajaabiheeniŋ hóbun. 47Moŋon moŋon gayennehini h'alóbne, alaalam. Afak alaalam a básuumhu jamméejhinem. 48Angu báábám ingi nunom, banlahuntem na, immereŋ faŋo mees alaaleeniŋ dáde ki nunom ayéjem:
- Úbákum! Fi! Neeraŋ gukanne mint? Mint ítibomiŋtib fanfaŋ. Me ingi bááhán ikorimiŋkori dáde.
49Úmár aŋoyindeeniŋ ayéjeeniŋ:
- Abó! Ayo! Horaŋ akanne k'utibemuŋ? Me ilahlah karo ninkinan úpájuleŋpájul maro me momiye nanka a díku Bááhum?#2.49 Na a gubaarhu Jaameŋo Adénno galóbumohne.
Nim gajaabiyeeniŋne dam.
50Kanda bayéji nim, immereŋ wuturoŋoŋ hóbun ho Yensa asíibane balóbo.
51Angu, afúrumi na, akeng k'ankokay ingi immereŋ ba a saarihinin Nasaret. Kanda gabúuñaheeniŋbuuña dáde. Nunom mungu, h'awusunaherne nip inho na n'aguy a hafithinem, te gúduk alentála hómár. Agida hómár amapunemmapun dáde. 52Angu Yensa mungu, maŋ ni alaamerehne, maŋ nim nuko ganik ayikehne jamméej. Jamméejhinem jámár adékdek f'arumun tip a binaanam. Hakaanankánam nip gasúumosuum Díino ingi jamaŋo mees.
Okuqokiwe okwamanje:
Luk 2: GD
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Copyright Vision Intégrale, Senegal
