मर्कुस 16
16
येसु मर्लबान जिउँते हक्ल
(मति २८:१-८; लुका २४:१-१२; युहन्ना २०:१-१०)
1बिस्राम-दिन सक्लपछि मरियम मग्दलिनि, याकुबकरि आमेक मरियम र सलोमिन बास्नादार तेल येसुकर लासनाइ लाइलाइ किन्ला। 2हप्ताकर पइलो दिन ब्यान घाम झुल्कितिन होलत चिहाननाइ जाइला। 3बाटनाइ जाइतिन गर्तिन होल्किन आफि-आफिनाइ बाज्ला, “चिहानकर मुखनाइ हक्ल पाथर कुनिन हटाइदिछइ?” 4किनारइभने ह्व पाथर एकदम बड्खो रल्ति। तर होलत चिहाननाइ पुग्तिन ह्व पाथर हटाइसक्ल देख्ला। 5अनि चिहानभित्र पसिके हेर्तिन होल्किन गोरो लुगा लाइल एउटो छोडारिलाइ दाइनेपटि ठडाइधर्ल देख्ला। ह्य देखिके होलत अचम्म मान्ला।
6तर ह्व छोडारिन होल्काइ बल्-ल्याक, “अचम्म जुनमानो, तोरा कुरुसनाइ झुन्डाइल नासरतकर येसुलाइ हेरिधर्लाछो। येसु इछि बइने, ह्व ता जिउँते हकिके उठिसक्लाछ। होलाइ धर्ल ठउँ हेरो। 7अब जाइके चेलाल्काइ, खासगरि पत्रुसलाइ बल्देइ कि ह्व तोराल्को अगि-अगि गालिलनाइ जाइतिन आछ। होइनिन तोराल्काइ बल्ल जिन्खाए होलाइ उछि देख्नारआछो।”#मति २६:३२; मर्क १४:२८
8होलत चिहानबान निस्किके कुत्तिन जाइला किनारइभने होलत अचम्म मान्तिन र डाराइके थरथर कामिधर्लाइ रइला। होइहुदान होल्किन ह्य कुरो कुनुकाइ बइबल्-ल्याक।
येसु मरियम मग्दलिनि हक्लनाइ देखा पर्ल
(युहन्ना २०:१०-१८)
9[हप्ताकर पइलो दिन ब्यान येसु जिउँते हक्लपछि पइला मरियम मग्दलिनि हक्लनाइ देखा पर्ले। होइबान येसुन सातुटाइ भुतलत निकाल्ल रइल। 10ह्व येसुराइ चेला हक्लनाइ पुग्तिन होलत बिलाप गर्तिन काँदिधर्लाइ रइला। होइनिन चेलाल्काइ बल्-ल्याक, 11“येसु मर्लबान जिउँते हक्लाछ, मुइनिन आफ्ने आँखिन देख्नाइ।” तर होल्किन मरियमकर कुरो पत्याइ बइपत्याइला।
येसु चेलाल्कोनाइ देखा पर्ल
(मति २८:१६-२०; लुका २४:१३-४९; युहन्ना २०:१९-२३)
12ह्व पछि दुइटाइ चेलालत गाउँदिस जाइधर्ल बेला होल्कोनाइ येसु अर्को रुपनाइ देखा पर्ले। 13ह्व दुइटाल्किन आइके ह्य कुरो आने चेलाल्काइ सुनाइला। तर चेलाल्किन होल्को कुरो पुनि बइपत्याइला।
14ह्व पछि एघारुटाइ चेलालत खाइधर्ल बेला येसु होल्कोनाइ देखा पर्ले। अनि येसुन होल्को अबिस्वास र आफ्ने मन कठोर पार्लनाइ हाकार्ल्याक। किनारइभने होल्किन येसु मर्लबान जिउँते हकिके उठ्लाछ बलिके आनेल्किन बल्ल कुरोनाइ बिस्वास गर्लाइ बइरइला। 15येसुन होल्काइ बल्-ल्याक,“सारा सन्सारनाइ जाइके सेब्बाइ मान्छेल्काइ सुसमचार पर्चार गरो।#पे १:८ 16जुनिन बिस्वास गरिके बप्तिस्मा लिछइ होइनिन मुक्ति पाइनारआछ, तर बिस्वास बइगर्नारचाइ दोसि ठहरिनारआछ। 17बिस्वास गर्नारकोसिन इन्खा चिन्न हक्नार आछि, मोर नाउँनाइ होल्किन भुतलत निकाल्नार आछत र नयाँ-नयाँ भासा बाज्नार आछत, 18होल्किन सापा आठाइनार आछत, कुनइ बिखालु कुरो खाइतिन तापुनि होल्काइ केइ हानि गर्नार बइने। होल्किन बिरामि उप्रान आफ्ने हात धर्तिन होलत बिसेक हक्नार आछत।”
येसुलाइ स्वर्ग उठाइ लाकाइल
(लुका २४:५०-५३; पेरित १:९-११)
19चेलाल्कोसिन इत्तिके कुरो गरिसक्ल पछि पर्भु येसुलाइ स्वर्ग उठाइ लाकाल्ते, र परमेसोरकर दाइने हातपटि बस्ले।#पे १:९-११ 20अनि चेलालत चारेदिस जाइके पर्चार गर्ला। पर्भु होल्कोसिन हकिके काम गर्ले र चेलाकिन पर्चार गर्ल कुरो सत्य हो बाजिके पर्मान अचम्मकर कामबान देखाइले।]#१६:९-२० ह्य पदलत गिरिक भासाकर कत्ता सोरोतनाइ बइने
Okuqokiwe okwamanje:
मर्कुस 16: MAJH
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 (Active), Mother Tongue Translators Society and Wycliffe Bible Translators, Inc. All rights reserved.
