मत्ती 24
24
मिन्दर गै बिनास गै परमेसर गी बात
(मरकुस 13:1,2; लूका 21:5,6)
1जद यीसू मिन्दर मू बारै आयो तो बिंगा चेला बिनै मिन्दर गी बणावट दिखाण कनै ले गया। 2जद यीसू बानै केयो, “ओ मकान थे सीधो खड़यो देखो। मैं थानै साची केऊं, ईं पर लगाएड़ी एक एक ईंट पटीज्यैगी।” 3यीसू जद जेतुन प्हाड़ पर बेठयो तो चेला बिंगै कनै आ'गे पूछयो, “म्हानै बता, ऐ बातां कद हो'सी? संसार गो अंत कद हो'सी अर थारै आण गै निसान गो म्हानै किंया ठा लागसी?” 4यीसू उतर दियो, “सावधान रेईयो, थानै कोई भटका ना दैय। 5मैं ओ ईंखातर केऊं, हिस्या भोत है झिका मेरै नाम में आ'गे केसी, मैं मसी हूं। बे भोत लोगां नै आ'गे भटकावैगा। 6जद थे लड़ाईयां गी बातां सुणो तो डरियो ना। इंया तो होवैगो पण ओ अंत कोनी हो'सी। 7हर एक राज एक दूसरै गै बिरोध में खड़या होज्यैगा अर काळ पड़ैगा अर भुचाळ आवैगा। 8पण जद लुगाई गै जापै गै टेम झिको बिनै दुख होवै इंयाई दुख सरू होवैगो। 9बिं टेम बे थानै सजा देण खातर पकड़ावैगा अर मरवावैगा अर सारी जातां गा लोग थारूं बेर करसी क्यूंकै थे मेरा चेला हो। 10बिं टेम भोत सै लोगां गो बिस्वास टूट ज्यैगो। बे एक दूसरै नै पकड़ावैगा अर एक दूसरै ऊं बेर करैगा। 11भोत सारा झूठी बात बताण आळा खड़या होज्यैगा अर लोगां नै भटकावैगा। 12क्यूंकै अधरम बढज्यैगो अर लोगां गो आपसरी गो प्रेम कम होज्यैगो। 13पण झिको आखिर तांई टिक्यो रेवैगो बिंगो ई उद्धार होवैगो। 14सुरग गो सुब समाचार सारै संसार में सारी जातियां नै सुणाई ज्यैगो जद अंत होज्यै'गो।”
बोळै तकड़ै दुख गी सरुवात
(मरकुस 13:14-23; लूका 21:20-24)
15“ईंखातर जद थे खतरनाक बिनास आळी चिज झिकी गै बारै में दानिएल परमेसर गी बात बताण आळै बतायो, थे मिन्दर गी पवितर जिग्यां में खड़यो देखोगा, (झिका पढै बे इनै समझो) 16जद झिका लोग यहुदियां में है बे प्हाड़ां पर भाज जाईयो। 17झिको आपगी छत पर होवै बो कीं लेण नीचै ना उतरै। 18झिको खेतां में काम करण लागरयो है बो आपगा गाबा लेण पाछो ना आवै। 19अर झिकी लुगाईयां पेट ऊं होवै अर झिकी छोटै टाबरां नै दूध पियांवंती होवै बां खातर भोत दुख भरयो हो'सी। 20पराथना करो कै थानै पाळै गै टेम अर सब्त गै दिन ना भाजणो पडै़। 21बिं टेम हिसी बिपती आवैगी जद परमेसर धरती बणाई बिंऊं लेगे आज तांई कदी कोनी आयी अर ना'ई आवैगी। 22अर जे परमेसर बां दिनां नै घटावंतो ना तो कोई कोनी बचतो। पण बो आपगै चुणेड़ै लोगां खातर दिन कम करैगो। 23बां दिनां में जे थानै कोई केवै, देखो मसी अठै है या बठै है तो बिंगो बिस्वास ना करियो। 24क्यूंकै कपटी मसी अर झूठी बात बताण आळा खड़या होज्यैगा कै हिस्या चमत्कार गा काम दिखावैगा अर चुणेड़ा लोगां नै बी भटका देवैगा। 25ईंखातर थे याद राखियो, मैं थानै सारो कीं बता दियो। 26जे थानै कोई केवै, बो बिं कमरै में लुकेड़ो है या बन उजाड़ में है बठै ना जाईयो अर ना'ई बां पर बिस्वास करियो। 27मैं थानै केऊं जिंया बिजळी अगूणूं लेगे आथूण तांई चमकै बिंया ई मिनख गो बेटो परगट होवैगो। 28जिंया गिरजा नै ठा लागै लोथ बठै पड़ी है बिंयाई थे निसान देखोगा कै मिनख गो बेटो आवै।”
मिनख गै बेटै गो दुसर आणो
29बां दिना में झिका दुख पड़सी।
“बिंगै बाद हातो हात ई सूरज काळो पड़ज्यैगो
अर चांद गी रोसनी कोनी निकळैगी
अर आकास गा तारा पड़ज्यैगा
अर आकास गी सारी सकतियां हलाइजैगी।”#यसयाह 13:10; 34:4
30बिं दिन मिनख गै बेटै गै आण गो निसान आकास में परगट हो'सी। जद धरती गा सारा लोग दुख करैगा। अर बे बिनै सकती अर मेमा सागै सुरग ऊं आवंता देखैगा।#दानिएल 7:13-14 31बो ऊंची आवाज में तुरई बजागे आपगै सुरगदूतां नै घालैगो। बे फेर एक कूंट ऊं दूसरी कूंट तांई आपगै चुणेड़ा लोगां नै भेळा करसी।
अंजीर गै दरखत गी मिसाल
(मरकुस 13:28-31; लूका 21:29-33)
32अंजीर गै दरखत ऊं सीख ल्यो। जिंया बिंगी डाळी पोली होज्यै अर पता फूटण लागज्यै तो थानै ठा लागज्यै कै गरमी आण आळी है। 33बिंयाई जद थे सारो कीं होवंता देखोगा तो समझ लेईयो बो टेम कनै आ'ग्यो। 34मैं थानै साची केऊं जद तांई ऐ सारी बातां पूरी ना होज्यै जद तांई ईं पीढी गो अंत कोनी होवैगो। 35धरती अर आकास टळ सकै पण मेरी बातां कोनी टळ सकै।
36बिं दिन गै बारै में कोई कोनी जाणै, ना सुरगदूत अर ना खुद बेटो। एकलो परमेसर ई जाणै। 37जिंया नूह गै दिनां में होयो बिंयाई मिनख गै बेटै गो आणो हो'सी। 38जिंया जल प्रळय आणूं पेलां नूह जहाज पर चडण गै टेम तांई लोग मोज मस्ती में रेवंता अर आपगा सारा काम काज करता। 39जद जल प्रळय आयी तो बण सारा नै डबो दिया। मिनख गै बेटै गो बी इंया आणो हो'सी। 40बिं टेम खेत में काम करता दो आदमियां मू एक नै उठाइज्यैगो अर एक नै बठै छोडिज्यैगो। 41चकी पीसती दो लुगाईयां मू एक उठाइज्यैगी अर एक बठै छोडिज्यैगी। 42थे चोकस रेईयो क्यूंकै थे कोनी जाणो थारो प्रभु कद आसी। 43जे मालिक नै ठा होवै कै चोर कद आसी तो बो जागतो रेवै अर घर में चोरी कोनी होण दैय। 44ईंखातर थे बी तैयार रेओ, जद थे सोच्यो बी कोनी होवैगो, बिं टेम मिनख गो बेटो आज्यैगो।
बिस्वास योग्य दास अर बुरो दास
(लूका 12:41-48)
45एक बिस्वास योग्य नोकर बो ई है झिको आपगै मालिक आपगै नोकरां पर अधिकार दियो है कै बानै टेम पर रोटी दैय। 46जे बो मालिक आगै आपगै नोकर नै काम करतो देखै तो बो बिनै जरूर बिंगो प्रतिफल दैयगो। 47मैं थानै साची केऊं, बो बिनै आपगी सारी संपती गो अधिकारी बणासी। 48पण जे बो दुस्ट दास सोचण लागज्यै कै मेरो मालिक अब कोनी आवै। 49अर आपगै साथी दासां नै कुटण लागज्यै अर पीण आळा गै सागै खाण पीण लागज्यै। 50बिं दास गो मालिक हिस्यै दिन आवैगो जद बिनै अडीक कोनी होवैगी। अर हिस्यै टेम झिकै नै बो जाणतो ई कोनी हो'सी। 51जद बो मालिक आ'गे बिं दास नै भोत ललकारैगो अर बिंगो भाग दुस्ट लोगां सागै ठेरावैगो। बठै रोणो अर दांतां गो पीसणो होवैगो।
Okuqokiwe okwamanje:
मत्ती 24: BGQ
Qhakambisa
Dlulisela
Qhathanisa
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved. © WIn Publishing Trust
