मत्ती 14
14
हेरोदेस राजा का यीशु कै बारै मुंजी शुणणा
(मर 6:14-29; लूका 9:7-9)
1तैसी सौमय दै चौथाई देश का राजा हेरोदेसे यीशु कै चौर्चा शौणै। 2औरौ आपणै नोकर खै बौल़ौ, “ऐजा यूहन्ना बपतिस्मा दाता मौरेयौंदे मुंजीदा जियुंदी हौए गौआ, इथकारिए तैणै चौमत्कार कै काम प्रगट कौरे लौवै।”
यूहन्ना कै मौत
3जिथुखै हेरोदेस राजाए आपणै भाई फिलिप्पुसे कै घोरवाल़ी हेरोदियास कै बौजैह शै, यूहन्ना बपतिस्मा दाता खै थाम्बैयौ बानै दिया, औरौ कोयदखाने दा पाए दिया। 4जिथुखै यूहन्नाए तैसीखै बौल़ै राए थियु, की इयौंकै राखणा ताखै ठीक ना आथी।
5औरौ सै तैसीखै मारै दैणा चांव थिया, पौरौ लोगौ दा डौरौ थिया, जिथु सै तैसीखै पौरमेशवर कै बातौ बौताणौवाल़ा मानौ थिए। 6पौरौ जोबै हेरोदेस राजा का जन्म दूस ओऊवा, तौ हेरोदियास कै बैटीए जन्म दूसौ कै खुशी पांदी नाचेबा हेरोदेस राजा खै खुश कौरा। 7इथकारिए तैणै शौं खाएयो वचन दिया, “जू किछै तू मांगलै हांव ताखै दैंदाए।” 8तियैं आपणी माँ कै शिखाएयौंदी बातौ कै बौल़ै, “की यूहन्ना बपतिस्मा दाता को मुंड काटैयौ मुखै ऐकी थालौ दौ मोंगाऐ दै।” 9राजा दुखी हौआ, पौरौ आपणी शौं औरौ पोऊंणै की बौजैह शै आज्ञा दै, कै दैय दैंव। 10औरौ कोयदखाने दै लोगौ खै भैजैयो यूहन्ना को मुंड कोटवाऐ दियु। 11औरौ तैसकौ मुंड थालौ उदु लोऊ, औरौ बाईटी खै दैय दियु; औरौ सै तिथुखै आपणी माँ कै धोरे लोए गौए। 12औरौ यूहन्ना कै चैलै आयौ, तैसकै लाश खै नियौ दबाए दै, औरौ जायौ यीशु खै समाचार दिया।
पाँच हजार लोगौ कै खियाणौ
(मर 6:30-44; लूका 9:10-17; युहन्ना 6:1-14)
13जोबै यीशुए ऐजौ शुणु, तौ सै किश्ती पांदी चौढ़ेयौ तिथैदा ऐकी शुनशान जौगैह दा इकली रौणौ हौटै गौआ, औरौ ऐजौ शोणेयो लोग नगर-नगर शै हांडेयो तैसकै पौछौड़ियौ हौटै गौवै।
14यीशुए किश्ती पौरैशौ उदे आयौ बौड़ी भीड़ दैखै, औरौ तैसी तिनु पांदी गीणौ लागी; औरौ तैणै तिनकै बीमारों खै ठीक कौरे।
15जोबै बैल़खौ हौंदौ लागौ, तोबै तैसकै चैलै तैसकै धोरे आयौ बौल़ौ, “ऐजै शुनशान जौगैह औसौ, औरौ बैरीन्दु लागै रौ। लोगौ कै जाणौ दै कै बस्तियौं दै जायौ आपी कारिए खाणौ खै मोलै लोंव।” 16औरौ यीशुए तिनुखै बौल़ौ, “तिनकौ जाणौ जौरुरी ना आथी! औरौ तुऐं ही तिनुखै खाणौ खै दैंव।” 17तिनुऐ तैसीखै बौल़ौ, “इथै तौ आमुकैंई पाँच रोटी औरौ दो माछी छोड़ेयौ कै किछै नै आथी।” 18तैणै बौल़ौ, “तिनुखै इथै मैरै धोरे लांव।” 19तोबै यीशुए लोगौ खै घासो पांदी बौठणौ खै बौल़ौ, औरौ तिनी पाँच रोटी औरौ दु माछी कौरी, औरौ स्वर्ग कै ढौबौ दैखैयो पौरमेशवर का धन्यवाद कौरा, औरौ रोटी तौड़ै-तौड़ेयो चैलै खै दैन्दा लागा, औरौ चैलै लोगौ खै दी। 20औरौ सौबै खाएयो छौकै गौवै, औरौ तिनुऐ बौचेयौंदे टुकड़ै की बारौ शैकड़ी भोरेयो टिपी। 21औरौ खाणौवाल़ी बैटमाणिशौ औरौ नानड़िया खै छोड़ेयौ पाँच हजार मर्द कै लमसम थिए।
पाणी पांदी यीशु कौ हांडणौ
(मर 6:45-52; युहन्ना 6:16-21)
22औरौ यीशुए तौलोंई आपणै चैलै खै किश्ती दै बोठाल़ै, कै सै तिनुदै आगै गलील झील कै ओकी ढौबौ पांडे जांव, तांव तौड़ी हांव लोगौ खै आगु डियाल़ु।
23सै लोगौ खै डियाल़ेयो, आपी प्रार्थना कौरणौ कै धारो पांदी हौटै गौआ; औरौ बैल़खै दा सै तिथै इकली थिया।
24तियौं घोड़ी दै किश्ती गलील झील कै बीच मुंजी लैहरो दै डगमगाऐ रौए थी, जिथु हावा बैरवें कै थी। 25औरौ झीशो, बियाणौ दै आगै यीशु झीलो पांदी चालैयौ तिनकै धोरे ओऊवा। 26औरौ चैलै तैसीखै झीलो पांदी हांडदै बैई दैखैयो घबराए गौवै, औरौ बौलदै लागै, “कै सै भूत औसौ!” औरौ डौर कै मारै लेलयांदै लागै। 27पौरौ यीशुए तौलोंई तिनुआरी बातौ कौरी, औरौ बौल़ौ, “हिम्मत राखौ, हांव औसौ; डौरेया नै।”
28पतरसे तैसीखै जोवाब दिया, “ओए रै प्रभु, जै तू ही औसौ, तौ मुखै आपणै धोरे पाणी पांदी हांडणौ कै आज्ञा दै।” 29औरौ तैणै बौल़ौ, “आए जा!” तोबै पतरस किश्ती पौरैशा ओतरेयो यीशु कै धोरे जाणौ कारिए पाणी पांदी हांडदा लागा। 30पौरौ हवा दैखैयो डौरे गौआ, औरौ जोबै डुबदा लागा औरौ जोर सै लैरौ मारैयौ बौल़ौ, “ओए रै प्रभु, मुखै बौचा।” 31यीशुए तौलोंई आपणा हाथ बोढ़ायो तैसीखै थामा, औरौ तैणै बौल़ौ, “ओए रै कम बिशवाश कौरणौवाल़ै, तुऐं किथुखै शक कौरा?” 32जोबै सै किश्ती पांदी ओऊवा, तौ हवा रौकै गौए। 33इथपांदी जू किश्ती दै थिए, तिनुऐ तैसीखै झोकैबा ढाल़ कौरेयौ बौल़ौ, “तू सौथी कै, पौरमेशवर का बैटा औसौ।”
यीशु दवारा गन्नेसरत प्रदेश दै कैई बीमारों कै ठीक कौरणै
(मर 6:53-56)
34यीशु औरौ तैसकै चैलै किश्ती शै गलील झील कै पार कौरेयौ गन्नेसरत प्रदेश दै पोऊंचे। 35औरौ तिथै कै लोगै तैसीखै पोयछाणैयो नेड़ी-बैड़ी कै सौबी देशो दै खोबर भैजी दी, औरौ सौबी बीमारों खै तैसकै धोरे लोऊवे। 36औरौ तैसी कैईंदै बिन्ती कौरदै लागै, कै सै तिनु आपणै खोटणो कै ही छुणौ दैंव; औरौ जैतरै तैसीखै छुआ, सैजै ठीक हौए गौवै।
Okuqokiwe okwamanje:
मत्ती 14: SRXNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
