Eksodusi 21
21
1Leyi hi milayo, leyi u ta nga yimisa ka vona:
2Loku u xava a khumbi ya muHeberu, yi ta ku tirela a ntlhanu wa malembe ni ginwe; kanilezi hi lembe ga wuntlhanu ni mambiri, yi ta tlhatlheka basi, na yi nga rihangi nchumu. Deut. 15:12; Jer. 34:14
3Loku yi tile ka wena yi hi yoce, yi ta tlhela yi hi yoce; loku yi tile ni sati, yi ta suka ni sati wa yona.
4Loku a nwinyi wa yona a yi nyikile sati, zonake loye wasati a beleka vanana, a wasati ni vanana vakwe va tava va nwinyi wa yona; kanilezi yona yi ta huma yoce.
5Loku a khumbi yiku; Nza ranza a nwinyi wa mina, ni sati wa mina, ni vanana va mina; a nzi lavi ku suka;
6zonake a nwinyi wa yona i ta yi neha mahlweni ka Nungungulu, a yi tshineta kusuhani ni livati laha ka mhanze ya laha nyangweni; zonake a nwinyi wa yona a yi bhoxa ndleve hi litlhawo. Zonake yi ta mu tirela wontihe masiku.
7Loku a munhu a xavisile a nhanyana wakwe, a mu maha khumbi, a nga ha humi kambe kota a khumbi ya xinuna yi humako.
8Loku a nga xalalisi mahlweni ka nwinyi wakwe loyi a nga lava ku mu teka, i ta mu vumela ku tiruliwa. Ngha a nga mu xavisi ka wamatiko, hakuva i mu kanganyisile.
9Loku a lava ku mu nyikela ka mufana wakwe, i ta mu khoma kota a nhanyana wakwe.
10Loku a teka munwani sati, a nga hunguli nchumu ka zakuga, ni tinguwo, ni tifanelo ta wukati.
11Loku a nga mu maheli a zilo lezi zinharu, i ta tlhatlheka basi, na a nga rihangi nchumu.
12Loku a munhu a daya munwani, yenawu i fanele ku dawa futsi. Gen. 9:6; Mat. 26:52
13Loku a nga mu dayangi ha womu, kanilezi na hi Nungungulu a mu nyikeleko canjeni gakwe, nzi ta ku lavela wutshamu laho a ta nga tsutsumela kona.
14Loku a munhu a vukela munwani munhu hi wurena, a mu daya ha womu, u ta mu khoma u mu daya yenawu, hambu loku a tsutsumele alatini.
15Loye a bako raru wakwe kutani nyine wakwe, i ta dawa.
16Loye a yivako a munhu a mu xavisa, kutani a kumiwa mandleni yakwe, a khamba lego gi ta dawa.
17Loye a rukatelako a raru wakwe kutani nyine wakwe, i ta dawa. Levi 20:9; Mav. 20:20; Mat. 15:4
18Loku a vanhu va holovisana hi timhaka, zonake munwani aba munwani hi ribye, kutani hi xibhakela, a ngafi, kanilezi a etlela sangweni;
19loku a vuka a chetengela hi nhonga, loyi a nga muba a nga ta kuva ni nanzu; kanilezi i ta mu riha lezi a nga tshama sangweni, ni ku mu chuma a kala a kalamuka khwatsi.
20Loku a munhu aba a nanza gakwe ga xinuna, kutani ga xisati, gi fela mandleni yakwe, i ta tsayiswa.
21Kanilezi loku a hanya a siku ginwe kutani mambiri, a nga ta tsayiswa hakuva i mali yakwe.
22Loku a vanhu valwa, zonake va bayisa wasati a nga ni rumbu; loku a rumbu lego gi goheka, kanilezi yena a ngafi, zonake i ta rihiwa hi tsengo lowu a ta nga wu wula a nuna wakwe; i ta ya rihiwa mahlweni ka Valamuli.
23Kanilezi loku wasati afa, zonake U ta rihisa wutomi hi wutomi, Deut. 19:21; Mat. 5:38
24a tihlo hi tihlo, a tino hi tino, a woko hi woko, a nenge hi nenge,
25a kuhiswa hi kuhiswa, a mbanga hi mbanga, a mbirimbi hi mbirimbi.
26Loku a munhu aba a nanza gakwe ga xinuna kutani ga xisati, a gi bhoxa tihlo, i ta gi tlhatlha gi ti fambela hi kota ya tihlo ga gona.
27Loku a tshova a tino ga nanza gakwe ga xinuna kutani ga xisati, i ta gi tlhatlha hi kota ya tino ga gona.
28Loku a homu yi tlhava wanuna kutani wasati hi timhonzo ta yona, afa, a homu leyo yi ta gandliwa hi maribye; ni nyama ya kona ngha yi nga giwi. Kanilezi a nwinyi wa homu a nga tava ni nanzu.
29Kanilezi a homu loku gi hi tshamela ga yona ku tlhava hi timhonzo ta yona, ni nwinyi wa yona a tiviswa, kanilezi a nga cheli kota hi ku yi hlayisa; zonake loku yi daya wanuna kutani wasati, yona yi ta gandliwa hi maribye, yenawu nwinyi wa yona i ta dawa. Gen. 9:5
30Loku a rihiswa, i ta humesa a tsengo lowu wu ringanako a wutomi gakwe, kota lezi va ta nga mu byelisa zona.
31Loku a homu leyo yi tlhavile a jaha kutani nhwana, yi ta mahiwa hi lowo nayo.
32Loku yi tlhavile a khumbi ya xinuna kutani ya xisati, a nwinyi wa khumbi i ta rihiwa hi tsengo wa 30 wa maxekeli, ni homu yi ta gandliwa hi maribye.
33Loku a munhu a kelile rinzi kutani khele, a wuya a nga vali, zonake loku a homu kutani mbongola yi wela lomo,
34a nwinyi wa rinzi i ta riha a nwinyi wa xifuyo hi tsengo wa xona, kanilezi ni nyama ya kona yi tava yakwe.
35Loku a homu ya munhu yi tlhava a homu ya munwani, yifa, a va xavise a homu leyi yi hanyako, va avana a mali ya kona, va avana kambe ni homu leyi yi fileko.
36Kanilezi loku a homu leyo yi tibyilwe hi kale lezaku i tshamela ga yona ku tlhava, kanilezi a nwinyi wa yona a nga yi hlayisi, i ta riha homu hi homu, kanilezi leyi yi fileko yi tava yakwe.
Okuqokiwe okwamanje:
Eksodusi 21: TSC72
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Tshwa Bible © Bible Society in Mozambique, 1972, 2007.