LEWITIKUS 11
11
Kare meto je bahalap tuntang papa
(Deu. 14:3-21)
1 Tuhan manenga akan Moses tuntang Aron kare atoran toh 2-3akan bangsa Israel. Uras meto je belom intu hunjun petak je manyipa handue hayak tunjike basila jete meto bahalap tuntang tau kinan. 4-6Ela kuman onta, palanduk atawa kalinci. Meto te papa aloh manyipa handue, tunjike dia basila. 7Ela kuman bawoi. Meto te papa, awi aloh tunjike basila, ie dia manyipa handue. 8Isie dia tau kinan tuntang hantue kea dia tau inigong awi meto te papa.
9Keton tau kuman uras macam lauk je hakiting tuntang hatisik. 10-12Meto je belom intu huang danum tapi dia hakiting tuntang hatisik jete meto papa. Jete dia tau kinan, hantue dia tau inigong.
13-19Bara kare burong, awang toh je dia tau kinan awi papa ie te: burong rajawali, burong mangkong, uras macam antang, burong nasar, tingang, burong onta, kalialang, burong laut, uras macam bangau, boak, sabaru tuntang bangamat.
20Uras meto korik je barapalapas jete papa, 21suali je tau manangkajok. 22Maka sangkalap, jangkrik tuntang sangkalap bahijau tau kinan. 23Tapi uras meto korik beken je barapalapas tuntang manggayar jete papa.
24-28Ije biti oloh jari papa sampai matanandau belep amon ie manigong hantu je bara meto toh ie te: meto je hatunjik, suali je tunjike basila tuntang manyipa handue, meto je hapai epat tuntang aton sikue batajim. Ewe-eweh mimbit hantun meto je macam jete musti mampukan pakaiae, tapi ie magon papa sampai matanandau belep. 29-30Balawau petak, balawau hai, balawau korik, kadal, uras macam bakatak, tahatong, bajawak, sangahau, kalambuei tuntang angoi jete papa. 31Ewe-eweh je manigong meto te atawa hantue, ie jari papa sampai matanandau belep. 32Amon hantun meto te manjato akan ije ramo, maka ramo te jari papa. Taloh te manjadi uras akan macam ramo bara kayu, benang, upak, benang kampil, en ramo te kanjeran ihapan atawa dia ihapan. Ramo te musti lukum intu danum, tapi tetep papa sampai matanandau belep. 33Amon hantu te manjato akan huang balanai petak, uras taloh je aton huang balanai te papa, tuntang balanai te musti imusit. 34Panginan je buah danum bara balanai te papa, tuntang taloh ihop je aton huang balanai te papa kea. 35En bewei je buah jaton hantu te, papa. Tungku atawa eka mamapui bara petak musti imusit awi papa. Suali tahasak danum atawa kalin danum, 36uras taloh je beken jadi papa amon buah hantu. 37Amon hantu te manjato intu hunjun binyi je inawur, binyi te tetep barasih. 38Tapi amon binyi te kanjerae ilukum intu huang danum palus buah jaton hantu te, maka binyi te papa.
39Ewe-eweh je manigong hatun meto je dia pali jari papa sampai matanandau belep. 40Oloh je mimbit atawa kuman hantu te musti mampukan pakaiae, tapi ie tetep papa sampai matanandau belep.
41-42Uras meto je manyalantar intu hunjun petak, aloh je manggayar, je hapai epat atawa hapai are, jete papa tuntang dia tau kinan. 43Ela mamapa arepm awi kuman meto macam te. 44#Lew. 19:2; 1 Ptr. 1:16 Aku toh Tuhan, Hatallan keton, tagal te parasih arep keton awi keton patut barasih, awi Aku toh barasih. Ela keton mamapa arep keton dengan gagenep meto je manyalantar tuntang manggayar intu hunjun petak. 45Aku toh Tuhan je jari mimbit keton balua bara Misir, mangat Aku tau jadi Hatallan keton. Keleh keton barasih, awi Aku barasih.
46Jete atoran tahiu meto, tatamput burong, meto je beken intu huang danum tuntang je manyalantar intu hunjun petak. 47Keton musti tau mangasene taloh je barasih dengan taloh je papa, meto je tau kinan dengan meto je dia tau kinan.
Okuqokiwe okwamanje:
LEWITIKUS 11: NIJ
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume